Baloma 1 - Kulimama Kwakupya

¹ Ami Paulu mukamulimo wa Yeshu Kilishitu, wehaniwile ngayi enge ntumwana, wahatiwile ngayi ashimikile ncango zaziwahe za Nyambi.

² Ncango zaziwahe ziya Nyambi akulupishile kupitila muli bamiluwe ngonehe byatikitiwa mu Mabuka a Kuyela.

³ Ncango zaziwahe zikwamba bya Mwanendi ou Mwene wetu Yeshu Kilishitu. Mu shihemwa shendi sha wuntu, wengile muzukulya Ndavita,

⁴ ngoboni na Moyo Wakuyela waholokele na ngovu zazinene ngayi niye Mwana Nyambi oho ashangukile ku bafu.

⁵ Mumwendi etu tunatambulu nceshe na wuntumwana ngayi twihane bantu nimwabo ba mu matunga mwanga bakulupile, pe bombatale, ndaba ya lizina lyendi.

⁶ Nanenu kami muli mukati ka baya anehana Nyambi ngayi benge Bakayeshu Kilishitu.

⁷ Nohobene ninatikitili nimwenu muli mu Loma, bakakuhakiwa kuli Nyambi, baya anehana ngayi benge bakakuyela. Mwanga Nyambi Tatiyetu na Mwene Yeshu Kilishitu bamipane nceshe na kumwena.

Kulombela kwa kukambilila

⁸ Ha kutatika, nikukambilila kuli Nyambi yami muli Yeshu Kilishitu ndaba yenu nimwenu, ndaba kukulupila kwenu kunayuvwaniki mu kaye nimwamo.

⁹ Nyambi niye paki wami ngayi ebye nilinakwamba byakupwisha, Nyambi ou nikutendela milimo yakushimikila ncango zaziwahe za Mwanendi na mutima wami nimwawo, halimuka ngayi namyanukanga

¹⁰ shikati nimwasho oho nalombelanga. Nalombelanga kuli Nyambi ngayi mu shifungo shendi, mwanga ku mamaninino ancinkwilile nzila ya kwiza oko kukwenu shawuluno.

¹¹ Ndaba nikushinga shikuma kumimona, ngayi tulitapile bishemo bya moyo, bya kumishumisha.

¹² Ngayi mwanga enu nanami tulishumishe hamo na kukulupila kwa umo na wamina.

¹³ Bawushinda, kushinga ngayi mwikale mu wulube nifwako, ndaba bikati byabingi ninashingi kwiza kukwenu ngoboni ninakwanganga kukuma na ku shikati shino. Nikushinga niteze mukati kenu kami, ngonehe ninateze kami mukati ka Bakamatunga bamina.

¹⁴ Ami nili nanebye nafwanini kutenda ku bantu nimwabo, ku bakakulilongesha na kubaya banabulu kulilongesha, ku bakakukeya na bakakuyeba.

¹⁵ Nohobene niho nikushinga kami kwiza na kushimikila ncango zaziwahe kukwenu muli mu Loma.

Ngovu za ncango zaziwahe

¹⁶ Lisheni nifwalyo ku ncango zaziwahe ndaba nizo ngovu za Nyambi za kupulwisha muntu nimwendi ukukulupila, kutatika taha ku Bayunda niho ku Bakamatunga.

¹⁷ Ndaba mu ncango zaziwahe, kwoloka kukufuma kuli Nyambi kunamoneke. Nikwo kwoloka kuya kwezanga na kukulupila, kufuma ku kutatika kutwala ku mamaninino, ngonehe kwatikitiwa ngayi, “Bakakwoloka kukufuma kuli Nyambi, bakayoya na kukulupila.”

Mulandu wa bantu nimwabo

¹⁸ Ndaba wukali wa Nyambi unaholoka kufuma muyilu, unezi na kulwisha wubi nimwawo na kutengama nimwakwo kwa bantu aba bakukanisha ngayi kupwisha kuholoke ndaba ya kutengama kwabo.

¹⁹ Ndaba bya Nyambi ebye byafwanina kulimukiwa, nibo babilimuka shiwahe, ndaba Nyambi unabamoneshebyo.

²⁰ Ndaba kufuma kukulengiwa kwa kaye, byuma bya Nyambi byakubula kumoneka, ngovu zendi za mwayile myaka na Wunyambi wendi, binamoneke shiwahewahe mu byuma biya alengele. Nohobene, bantu kowa ebye bakutwesha kuliyawila.

²¹ Hinge ndi balimukile Nyambi, kaliha bamupanine maleema ngayi niye Nyambi, kami kaliha bamukambililile. Ngoboni bihanganiko byabo byengile bya kubenkanya, kami mitima yabo yashipile.

²² Hinge ndi baliyemezele ngayi nibo bakangana, bafutukile bakubula ngana.

²³ Balehele kulemesha Nyambi wakubula kubola, pe balemeshele bifwekesha bya kufweka muntu uya wabolanga, na tuyoni na twanzama twa mawulu anaa na biya byalikokanga.

²⁴ Nohobene Nyambi wabapanine ku mazilo a mahungu a mu mitima yabo, pe batendele bya lisheni ku zinyutu zabo ku umo na wamina.

²⁵ Bashiyile kupwisha kwa Nyambi, pe bakonkele mahalo, balemeshele na kutendela milimo ebye alengele Nyambi kupitakana niye Shakalenga, uya ukulemeshiwa mwayile myaka! Ameni.

²⁶ Ndaba yanebye, Nyambi unabalehe ngayi bakonke mahungu wabo a lisheni, ndaba hinge bambuyama, banalehe shiheka sha shihemwa ha bya maluwo, balinakutenda biheka byashenge.

²⁷ Na balume kami banalehe kwambola na bambuyama ngo mu shiheka sha shihemwa, bali na ntukumina ya mahungu ku umo na wamina. Mulume na mulume balinakutenda bya lisheni ku umo na wamina. Nohobene ndaba balinakutenda byakuluwa, bakatambula kashushwilo kanabafwanini.

²⁸ Ndaba baya bantu bakanine kuyuvwishisha kupwisha kwa Nyambi, Nyambi wabalehele ngayi bakonke bihanganiko bya kukontama ngayi mwanga batende byuma byakubula kufwanina.

²⁹ Banenzala na bya kutengama nimwabyo na bya wubi na mutongo na lwiholwiho. Banenzala na mwili na mponde na nkani na likeyela na nzimbo. Bakakatungwila,

³⁰ kami bakakwamba byabibi ha baminabo, bakakuzimba bya Nyambi, bakalihandu, bakakuliyemeza na kulilundumika. Bakakuhanganika zinzila za kutatika kutenda byabibi, bakakubula kwombatala bahemi babo.

³¹ Bakakubula kuyuvwishisha, bakakubula kutenda ebye banakulupishi, bakakubula shishemo, kami, bakancili.

³² Hibalimuka ngayi mazu a Nyambi akwamba ngayi bantu bakutenda byuma byanoho, bakufwanina kufwa. Ngoboni hinge ndi hibalimuka, kaliha bakutenda tuhu ebye byuma, ngoboni bakuyamiziza baminabo baya bakutenda byuma byanoho.