Bahebelu 7 - Kulimama Kwakupya

Mukankombela Melukezendeki

¹ Melukezendeki wengile mwene wa ku Shalema, pe kami wengile mukankombela wa Nyambi Wakukangana. Oho Abulahama afuminenga ku nzita na kuziha bamyene baana, Melukezendeki walihanganine nendi, pe wamufuywele.

² Abulahama wamupanine shitapilo sha wulikumi ku nimwabyo. Ha kutontolola kwa lizina lyendi lya kutatika, Melukezendeki kunengi “Mwene wa Kwoloka.” Wengile Mwene wa Kumwena.”

³ Ufwaye tatiyendi hinge ndi mandiyendi, wufwawo mukoka, hinge kutatika kwa mitena, hinge kukotoka kwa wumi, ngoboni watendiwile ngo Mwana Nyambi, ukwinga mukankombela myaka nimwayo.

⁴ Hanganikenu wunene wa nou muntu, hinge Abulahama nkaka yetu, wamupanine shitapilo sha wulikumi sha shiketu shendi.

⁵ Ndayano zikwamba ngayi bana ba Levi, aba bakwinga bakankombela banafwanini kutambula shitapilo sha wulikumi ku Baishalela, nibo batambule ku bawushinda wabo, hinge ndi nabo banengi bazukulu ba Abulahama.

⁶ Hinge ndi Melukezendeki kaliha wengile muzukulu wa Levi, ngoboni watambwile shitapilo sha wulikumi kuli Abulahama, muntu ou Nyambi akulupishile.

⁷ Kowa wakukanangana ngayi muntu wamunene ou ukufuywela minendi kupitakana ou ukutambula mfuywezi.

⁸ Pe ku mbalila yetu bakankombela bakutambula shitapilo sha wulikumi, benganga bantu bafwanga, ngoboni Melukezendeki ou watambwilenga ukupakiwa ngayi ulinakuyoya.

⁹ Nikutwesha kwamba ngayi, Levi ou ukutambula shitapilo sha wulikumi, naye kami wapanikilenga shitapilo sha wulikumi kuli Abulahama,

¹⁰ ndaba hinge ndi Levi shilolo ahemuwe, wekalile mu lukanda lwa nkaka yendi Abulahama, oho Melukezendeki aliwanine nendi.

¹¹ Ndayano eze batambwile Baishalela, zemanine ha wunkombela wa Levi, hinge ngayi mulimo wa wunkombela wa Balevi wengile wakulembuka, hinge kufwanina tufwako kwamba bya mukankombela washenge, ngoboni tukwamba bya mukankombela wamina wakufweka Melukezendeki, kaliha wakulifweka na wa Aloni.

¹² Ndaba ndi ha wunkombela hakufutuka, pe shakufwanina kami ngayi ndayano zifutuke.

¹³ Mwene wetu Yeshu Kilishitu ou ukutoyiwa na byuma ebye wengile wa mushobo wamina, ku niwo kowa muntu watendele milimo ha shihanda.

¹⁴ Tukulimuka ngayi Mwene wetu wahemuwile ku lihumo lya Bayunda, ku mushobo ou Moshesha kaliha wambile shuma shimo sha bakankombela kufuma ku nou mushobo.

Mukankombela wamina wakulifweka na Melukezendeki

¹⁵ Shambo eshe shinatontoloko shiwahe, mukankombela washenge unaholoko mu shifwekesha sha Melukezendeki.

¹⁶ Mukankombela ou kaliha wezile na ndayano za bantu, ngoboni ngo ku ngovu za wumi wakubula kumana.

¹⁷ Ndaba mazu a Nyambi akupaka byendi ngayi, “Obe mukankombela wa mwayile myaka, ngonehe shiheka sha Melukezendeki.

¹⁸ Ndayano za mwaka zinabenguliwi, ndaba zengile zaziboto na kubula kuyavwa.

¹⁹ Ndaba Ndayano za Moshesha zatweshele kulembukisha shuma shimo, ngoboni na kwingiza kwa kulumbeza kwakupitakana na kulumbeza oku tukuhenyena kuli Nyambi.

²⁰ Kami Yeshu watendiwile mukankombela na kulibeza kwa Nyambi, ngoboni ku Balevi kaliha kwekalile kulibeza kwa Nyambi ku bakankombela.

²¹ Ngoboni Yeshu wengile mukankombela oho Nyambi ambile kukwendi ngayi, “Mwene walibezele, kami kukafutula bihanganiko byendi wufwako. ‘Obe ukenga mukankombela wa mwayile myaka.’ ”

²² Ndaba ya kulibeza oku, Yeshu wafutukakale kwinga nkombela ya kulimama kwakupitakana.

²³ Haya hali kutapuluka, kwekalile bakankombela babengi, ndaba ya lufu, pe kaliha batweshele kuzamina mu nou mulimo.

²⁴ Ngoboni Yeshu ukuyoya mwayile myaka, kami mulimo wendi wakwinga mukankombela wufwako kukanungulukila wamina.

²⁵ Nohobene ukutwesha kami kupulwisha bantu nimwabo bakwiza kuli Nyambi kupitila mumwendi, ndaba ukuyoya mwayile myaka na kubalombela.

²⁶ Ndaba nisho shikushingiwa kwikala ku Mukulwane wa Bakankombela Nimwabo wa noho, wakuyela, wakubula mulandu, wakubula wubi, wakulitapulula na bakawubi, watwaliwile kuyilu ya mayilu.

²⁷ Yeshu wufwako kufweka ngonehe bakankombela bamina. Aba bakukombelela ha mutena ha mutena, ha kutatika ndaba ya wubi wabo, niho ndaba ya wubi wa bantu, ndaba niye watendele eshe kamo oho alipehelelele niye mwine kwinga nkombela.

²⁸ Ndaba Ndayano za Moshesha zemikilenga bantu bakubota kwinga bakankombela ba bakulwane, ngoboni shikulupisho sha Nyambi shezile na kulibeza, kwezile munyima ya ndayano zikutenda Mwana, ou wakulembuka mwayile myaka.