Bahebelu 6 - Kulimama Kwakupya

¹ Nohobene tuyenu tushiye bilongesha bya kutatika bya kulongesha kwa Kilishitu, tuyenunga kumbili ku kulembuluka. Kaliha na kuzika kami shishimi sha kutenguluka ku milimo ya kufwa, na bya kukulupila muli Nyambi,

² bya kulongesha kwa kuzubilisha na bya kukambika maboko na kushanguka kwa bafu na kuyata kwa mamaninino.

³ Ndi Nyambi ukwitabila, pe tukatende noho.

⁴ Bantu bakufutamina kukulupila kwabo bakatwesha nahiti kubokeshiwa ku kutenguluka? Aba bekalile mu lumuni lwa Nyambi, aba bekalile na kalimukisho ka bishemo bya muyilu, batambwile nabo Moyo Wakuyela,

⁵ kami banalimuku wuwahe wa lizu lya Nyambi na ngovu za kaye kakeza.

⁶ Bakafutamina kukulupila kwabo, shinengi shashikalu kubaleta ku kutenguluka, ndaba bakukoleka kami Mwana Nyambi ha shishempakano na kumuhandula ku likunge.

⁷ Nyambi wafuywelenga livwu elye mvula alokelangaho bikati byabingi na kumenesha mbuto yakuyavwa kukwabo bakulima.

⁸ Ngoboni nilyo likumenesha mihengela na nyawe lifwako kuyavwa, kami lili hahepi na kukutiwa, kukotoka kwalyo kwenga kuhokeshiwa.

⁹ Ngoboni enu bakakuhakiwa bami, hinge ndi tukwamba noho tunakashuku ngayi kuli byuma byabiwahe banamikowezele bikupitakana ebye, kami bikamipulwisha.

¹⁰ Ndaba Nyambi wenga mukakwoloka, wufwako kuvulama milimo yenu na kukalamana kwa shishemo munamumoneshe oho munayavwa bantu bendi na neshe mushili kubatendela milimo.

¹¹ Kami tukushinga ngayi muntu nimwendi kukwenu amoneshe kuzundamina kwanoho kutwala ku kukotoka, nohobene byuma mukulumbeza bikenga byakupwisha.

¹² Tufwako kushinga ngayi mwinge bavwa, ngoboni mwinge bakakukonka bantu aba, obo bakukulupila na lunzewe bakatambula ebye Nyambi akulupishile.

Shikulupisho sha Nyambi shakupwisha

¹³ Nyambi wakulupishile Abulahama, ndaba kwabulile muntu wakumupitakana wakulibeza nendi, walibezele niye mwine na lizina lyendi.

¹⁴ Pe Nyambi wambile ngayi, “Mwashikuma nikakufuywela na kukupana bazukulu babengi.”

¹⁵ Nohobene, Abulahama wazaminine, pe niho atambwile eshe akulupishile Nyambi.

¹⁶ Oho bantu bakulibeza, bakuliyavwisha lizina lya nou ukubapitakana na mbeza zikumanisha nkani nimwazo.

¹⁷ Nyambi ha kushinga kumonesha bakakukona shikulupisho ngayi shifungo shendi shikubula kufutuka, washishumishile na mbeza.

¹⁸ Nohobene kuli byuma bibili, shikulupisho na mbeza, bikubula kufutuka, kami Nyambi wufwako kutwesha kukana. Mu byuma ebye Nyambi ukushinga kutushumisha mitima etu tukutinina kukwendi ngayi tuzamine kulumbeza kwayakiwile kumbili yetu.

¹⁹ Kulumbeza oku tulinakwo kwenga ngo kakandikizo mu wumi wetu, sha kulaluka na kubula kunyenkanishiwa, kami shikwingina mukati kupitakana bela ya mu Litala lya Nyambi, kukakuma ku mwanya wa shizila.

²⁰ Yeshu watutwamininine mwaka kwinginamo ndaba yetu. Niye wengile Mukulwane wa Bakankombela Nimwabo wa mwayile myaka nehe shiheka sha Melukezendeki.