Bahebelu 5 - Kulimama Kwakupya

¹ Nimwendi Mukulwane wa Bakankombela Nimwabo wahatiwanga mukati ka baminendi bantu na kuhatiwa na kutendela Nyambi milimo na kubemaninako ngayi atupule zinkombela na zintupu ndaba ya wubi.

² Ngonehe anengi wakupopa mu zinzila zazingi, ukutwesha kwikala na bantu bakubula ngana na bakakubipisha.

³ Ndaba yaneshe ukufwanina kupehelela nkombela, ndaba ya wubi wa bantu.

⁴ Kowa muntu ukulishimbila maleema awa hakwinga Mukulwane wa Bakankombela Nimwabo, ndele ou ehanine Nyambi, nehi Aloni.

⁵ Mu nzila yimo Kilishitu kaliha walineneheshele niye mwine kwinga Mukulwane wa Bakankombela Nimwabo, ngoboni Nyambi wambile kukwendi ngayi, “Obe uli Mwanami, mutena walelo nafutuku kwinga Tatiyobe.”

⁶ Nehi anamba kami mu mwanya wamina ngayi, “Obe mukankombela wa mwayile myaka, mukankombela ngonehe shiheka sha Melukezendeki*.”

⁷ Yeshu mukuyoya kwendi hano hanci walombele na lukuwa shikuma na kulilila kukwendi ou watweshele kumulamwina ku lufu na kuyuvwiwa ndaba ya bowa wendi.

⁸ Hinge wengile Mwana Nyambi, walilongeshele kwombatala ha kutambula makando.

⁹ Munyima ya kumanisha mulimo ezilile, wengile mwine kupuluka kwa mwayile myaka kukwabo nimwabo bakumwombatala,

¹⁰ Nyambi wamuhatile kwinga Mukulwane wa Bakankombela Nimwabo kwinga ncwana Melukezendeki.

Kushiwulula ha kuleha kukulupila

¹¹ Tuli na byuma byabingi bya kufwanina kwamba, ngoboni shashikalu kutontolola, ndaba muli bakakwihala kuyuvwa.

¹² Ndaba enu shikati shino mukufwanina kulongesha baminenu, ngoboni mukushinga ngayi umo amilongeshe bilongesha bya kutatika bya Nyambi, shikufwanina kami enu kumilisha mahwe kupitakana byakulya bya kushuma.

¹³ Ndaba nimwendi ukushinga mahwe ushili mbututu, kami kutwesha wufwako kulama bilongesha byakwoloka.

¹⁴ Ngoboni kulya bya kushuma byenga bya bakulwane, nibo bakutwesha kulimuka byabiwahe na byabibi.