Bahebelu 4 - Kulimama Kwakupya

¹ Shikulupisho sha Nyambi ngayi tukengina mu mwanya wakukatala ou akulupishile. Haya tulamenu kutina wamina akwanga kukenginamo.

² Ndaba etu tunayuvwu ncango, ngoboni lizu lyashimikiwile kukwabo lyabulile kubayavwa, ndaba oho bayuvwile ncango, kaliha batambwile na kukulupila.

³ Etu tunakulupili tukenginamo mukukatala, nehi Nyambi ambile ngayi, “Nehi napilaminine na kulibeza ngayi, ‘Bafwako kukengina mu litunga elye nabakulupishile ngayi bakakatale.’” Wambile eshe hinge ndi mulimo wendi wamanine kufuma ku kulenga kwa kaye.

⁴ Ndaba hatikitiwa hamina hakwamba bya mutena wa mutanu na abili ngayi, “Nyambi wakatalile ku milimo yendi nimwayo ha mutena wa mutanu na abili.”

⁵ Hamo kami unakwamba byuma bimo ngayi, “Bafwako kukengina mu litunga elye nabakulupishile ngayi bakakatale.”

⁶ Nyambi wabalakanyine ngayi bantu bakengina mukukatala muyo, ngoboni baya batatikile kuyuvwa ncango za ziwahe, kaliha bengininemo ndaba yakubula kukulupila.

⁷ Niho Nyambi kami wahatile mutena wamina ngayi, “Lelo.” Munyima ya shikati shashitali Nyambi wambile bya nou mutena kupitila muli Ndavita mazu tunamba ngayi, “Lelo oho mukuyuvwa lizu lya Nyambi, hinga mukaluhisha mitima yenu.”

⁸ Ndaba shinga Yoshuwa wabapanine kukatala, Nyambi shinga kaliha watoyele mutena wamina.

⁹ Nohobene kunashala ku bantu ba Nyambi kukatala, nehi Nyambi akatalile ha mutena wa mutanu na abili.

¹⁰ Ndaba ou unengini mukukatala kuyo Nyambi akulupishile, ukakatala ku milimo yendi, ngonehe Nyambi eshe akatalile.

¹¹ Nohobene twezekenu kwinginamo mukukatala, kutina muntu wamina akakwanga nehi shiya bakwangile ndaba yakubula kukulupila.

¹² Ndaba lizu lya Nyambi lyenga lyakuyoya, likutenda milimo na ngovu, lyalitwe kupitakana mukwale wa wutwe kubili, likuyaha kukuma kwaliwanina mutima na moyo na manungilo na mongwami, lyayatanga bihanganiko na biheka bya bantu.

¹³ Kowa shibumbwabumbwa shikaholama ku meho a Nyambi, ngoboni byuma nimwabyo bya kulengiwa binafukuluku na kushinkuluka ku meho endi ou ukaholola milimo yetu nimwayo.

Yeshu Mukulwane Wamunene wa Bakankombela Nimwabo

¹⁴ Nohobene twezekenu kuzamina mu kukulupila kwetu. Ndaba tuli na Mukulwane wa Bakankombela Nimwabo, unayi na kukuminina kuli Nyambi, ou niye Kilishitu Mwana Nyambi.

¹⁵ Kaliha tuli na Mukulwane wa Bakankombela Nimwabo ukubula kutuyuvwila nceshe ndaba ya wuboto wetu, ngoboni Mukankombela wetu wa Mukulwane wezekiwile mu byuma nimwabyo ngo etu, kaliha watendele wubi.

¹⁶ Haya tuyenu na kukanca ku shuba sha Nyambi oku kuli nceshe zakuyavwa ha shikati shakubula.