Bahebelu 3 - Kulimama Kwakupya

Yeshu ukupitakana Moshesha

¹ Bawushinda muli Yeshu, enu kami munehaniwi kuli Nyambi, ngayi nenu mwikale na wumi wa muyilu. Hanganikenu bya Yeshu ntumwana na Mukulwane wa Bakankombela Nimwabo wakukulupila kwetu.

² Yeshu wengile wakupwisha kukwendi ou wamuhatile kutenda ou mulimo ngonehe Moshesha kami engile wakupwisha mu litala nimwalyo lya Nyambi.

³ Muntu unatende litala ukuwana maleema kupitakana litala. Nohobene na Yeshu unafwanini kutambula maleema amanene kupitakana Moshesha.

⁴ Hinga ngayi litala nimwalyo lyatendiwile na muntu, ngoboni ou watendele byuma nimwabyo wenga Nyambi.

⁵ Moshesha wengile wakupwisha mu litala nimwalyo lya Nyambi, ngoboni mukamulimo ngayi apake byuma ebye bikwiza kumbili.

⁶ Ngoboni Kilishitu wengile wakupwisha mu litala lya Nyambi nehi mwana ukulela byuma nimwabyo bya nomu mu litala. Pe litala olyo lyenga etu, ndi tukuzamina kukanca kwetu munebye tukulumbeza.

Kukatala kwa bantu ba Nyambi

⁷ Nohobene ngonehe Moyo Wakuyela ukwamba ngayi, “Lelo ndi mukuyuvwa lizu lya Nyambi,

⁸ hinga mukaluhisha mitima yenu, ngonehe shiya batendele bankaka zenu, oho bafutukilile Nyambi, ngonehe shiya bengile ha mutena uya mulibelelengwa, oho nibo bamwezekele.

⁹ Nyambi wambile ngayi, oko bankaka zenu banyakilile mu shezeko na kunyezeka, bamonene milimo yami eye natendele mwaka mu makumi anaa.

¹⁰ Nohobene napilamine na mukoka uyo, pe nambile ngayi, ‘myaka nimwayo bakushanuka mu mitima yabo, kaliha banalimuku zinzila zami.’

¹¹ Nohobene na kulibeza nambile ngayi, ‘Bafwako kukengina mu litunga elye nabakulupishile ngayi bakakatale!’ ”

¹² Keyenu bawushinda bakakukulupila, kutina wamina kukwenu ekala na mutima wa wubi mukakubula kukulupila na kufwanina kuli Nyambi wakuyoya.

¹³ Ngoboni likowaminenu umo na wamina ha mutena ha mutena, oho kukutoyiwa mu lizu lya Nyambi ngayi, “Lelo.” Tendenu ebye kutina wamina kukwenu ukukaluhisha mutima na kwongeziwa kwa wubi.

¹⁴ Ndaba etu nimwetu tunengi mulwetu na Kilishitu, ndi tukuzamina kutwala ku kukotoka, kukulupila kwetu oku twekalile nakwo.

¹⁵ Nehi kwatikitiwa ngayi, “Lelo oho mukuyuvwa lizu lya Nyambi, hinga mukaluhisha mitima yenu, ngonehe shiya batendele bankaka zenu oho bafutukilile Nyambi.”

¹⁶ Kati bayuvwile lizu lya Nyambi na kumufutukila bengile bayani? Kaliha nimwabo baya Moshesha afumishile mu Engipita ndi?

¹⁷ Kati bayani aba Nyambi apilaminine myaka ya makumi anaa? Bengile bantu baya batendele wubi, kami mituntu yabo yashalile mu libelelengwa.

¹⁸ Kati bayani aba apilaminine ambile ngayi, “Bafwako kukengina mu litunga elye nabakulupishile ngayi bakakatale,” wambile ku bantu aba bamufutukilile.

¹⁹ Nohobene tukumona ngayi kaliha batweshele kwingina mu litunga liyo ndaba yakubula kukulupila kwabo.