Bahebelu 2 - Kulimama Kwakupya

Kupuluka kwakunene

¹ Nohobene tukufwanina kukwatisha shikuma kukupwisha oku tunayuvu, kutina ku shikati shamina bikatupuhumuka.

² Ndaba ndi mazu a Nyambi ambile na mangeloyi ashumine, ngayi muntu wakushanuka nimwako nakubula kwombatala, watambwile kashushwilo kakumufwanina.

³ Tukapanzana nahiti ndi tukukana kupuluka kwetu kwakunene kwanoho? Mwene oku ambile ha kutatika bya kupuluka, kami aba bamuyuvwile batumoneshele ngayi byakupwisha.

⁴ Nyambi kami wawezeleleko wupaki ku wabo na kutenda bikomokesho na kutapishila bishemo bya Moyo Wakuyela kuya na shamutima wendi.

Ou ukututwaminina ku kupuluka

⁵ Tukulimuka ngayi Nyambi unabulu kupanika ngovu ku mangeloyi ha kaye kakwiza,

⁶ ngoboni wamina watikitile ngayi, “Muntu nengi yani ngayi umuhanganike? Hinge mwana muntu nengi yani ngayi obe ulifulankane?

⁷ Ha shikati shashishe wamulengele kunceto ya mangeloyi, unamuvwaliki munana wawuwahe na maleema,

⁸ Wamwimikile kwinga kalela wa byuma nimwabyo.” Nyambi unapana muntu “kwinga kalela ha byuma nimwabyo,” kowa shuma shinashala shikubula kuyakiwa kunceto yendi. Ngoboni wuluno kaliha tukumona byuma nimwabyo binayakiwi kunceto yendi.

⁹ Ngoboni tukumona ngayi Yeshu, ou watendiwile ha shikati shashishe kunceto ya mangeloyi, watambwile munana wawuwahe na maleema, ndaba ya makando a lufu. Shatendiwile noho ndaba ya nceshe za Nyambi ashingile ngayi afwilile bantu nimwabo.

¹⁰ Ndaba Nyambi niye walengele byuma nimwabyo, kami byuma nimwabyo byenga byendi, pe Nyambi watendele shiwahe oho ayitabilishile Kilishitu kuyanda, ngonehe Kilishitu unakutwaminina bantu babengi ku wuwahe wendi na ku kupuluka.

¹¹ Yeshu niye ukuyelesha bantu ku wubi wabo, pe niye na bantu aba anayeleshe nimwabo Tatiyabo umo, ndaba ya shuma eshe, Yeshu lisheni ufwalyo kubatoya ngayi bawushinda wendi.

¹² Ukwamba kuli Nyambi ngayi, “Nikatongweza bawushinda wami, nikakuyemeza mu bikungulukilo byabo.”

¹³ Kami wambile ngayi, “Nikakulupila mumwendi.” Kami ngayi, “Ami nilihamo na bana ba Nyambi aba anapana.”

¹⁴ Pe ha kumona ngayi baya bana banengi bantu, bakuhemuwa ku wuntu na mukeza, Yeshu wahemuwile ku wuntu na ku mukeza ngayi abafweke. Watendele noho ngayi na lufu lwendi mwanga anongeshe Shatana wekalile na ngovu za lufu.

¹⁵ Ha kutenda noho washingile ngayi ashobole aba bengile bandungo myaka nimwayo yakuyoya kwabo ndaba ya bowa wa kufwa.

¹⁶ Ndaba mwashikuma Yeshu kaliha wayavwile mangeloyi, ngoboni wayavwile bazukulu ba Abulahama.

¹⁷ Nzila eye Kilishitu afwanina kutakela wukali wa Nyambi ou ukezila bakawubi, ndele ya kuhemuwa mu wuntu na kubafwila ngayi abakulize.

¹⁸ Ndaba niye mwine wayandile na kwezekiwa, pe kami niye ukutwesha kubayavwa aba bakwezekiwa.