Bahebelu 13 - Kulimama Kwakupya

Mwakuwahililishila Nyambi

¹ Zaminenu kulihaka umo na wamina.

² Hinga muvulama kukobelela bayeni, ndaba nohobene, bamo bakobelelele mangeloyi hinga babula kulimuka.

³ Anukenu aba banamangiwi mu tolongo, lihanganikenu ngo munamangiwi hamo nabo. Anukenu bali mu malwa, lihanganikenu ngo mulinabo mu malwa.

⁴ Maluwo alemekiwe ku bantu nimwabo, kami wulili wa maluwo hinga wikala na wubi. Ndaba Nyambi ukayata bakalwiholwiho na bakawunjenge.

⁵ Nyinkalo yenu yinge yakubula kuhaka mali, wahililenu na byuma mulinabyo, ndaba Nyambi unamba ngayi, “Kukakushiya nifwako, hinga kukufutamina nifwako.”

⁶ Nohobene tukutwesha kwamba hinga twakanca ngayi, “Mwene niye mukakunyavwa, kukatina nifwako. Muntu ukutwesha kutenda bishini?”

⁷ Anukenu bakakumitwaminina, aba bambile lizu lya Nyambi kukwenu. Hanganikenu eshe bayoyele, hembwilizenu kukulupila kwabo.

⁸ Yeshu Kilishitu niye umo nzona nalelo na mwayile myaka.

⁹ Hinga mushanushiwa na kulongesha kwa mishoboshobo kwashenge. Ndaba shuma shashiwahe ngayi mutima ushumishiwe na nceshe za Nyambi, kaliha na kwombatala ndayano za byakulya ziya zinabulu kuyavwa aba banazizundamini.

¹⁰ Tuli na shihanda, ngoboni hinge bakankombela batendanga milimo ku mwanya wakulemeshela, bafwazo ngovu za kulya bya ha shihanda.

¹¹ Mukulwane wa Bakankombela Nimwabo watwalanga mukeza wa tuyamana mu Mwanya Wakuyela Shikuma na kwinga nkombela ya ha wubi, ngoboni bimamo bya tuyamana babihokeshelanga hamunkanda wa ntanda.

¹² Nohobene Yeshu kami wafwililile hamunkanda wa lukena ngayi mwanga ayeleshe bantu nimwabo na mukeza wendi.

¹³ Nohobene tuyenu kuli Yeshu hamunkanda wa ntanda, mwanga tushimbe lisheni lyendi.

¹⁴ Ndaba etu kaliha tuli na lukena lwa mulaluke hano hanci, ngoboni tuli na kutatilila lukena luya lukeza.

¹⁵ Haya tuyenu tutwalilileho kutupula nkombela ya kuyemeza Nyambi kupitila muli Yeshu, iya tukutupula na mivumbo yetu oho tukulishisha ku lizina lyendi.

¹⁶ Ngoboni hinga muvulama kutenda shiwahe na kuliyavwa umo na wamina, ndaba Nyambi ukuwahilila na zinkombela za nobo.

¹⁷ Ombatalenu aba bakumitwaminina, kami tendenu ebye bakumitongweza, ndaba bakulifulankana ha myoyo yenu, kami banafwanini kupana wupaki wa milimo yabo. Bombatalenu ngayi batende milimo hinga bawahilila. Ndi bakutenda milimo hinga bayena, pe bafwako kukamiyavwa.

¹⁸ Mutulombelele, ndaba tunalimuku shiwahe ngayi tunashoboloko mubihanganiko, pe tukushinga kutenda shiwahe mu byuma nimwabyo.

¹⁹ Nikuminyepa shikuma mwanga mulombele ngayi nitweshe kuboka kukwenu wanguwangu.

²⁰ Mwanga Nyambi mukakupana kumwena, ou washangwile Mwene wetu Yeshu ku bafu, ou Mulishani Wamunene wa bambelele, kupitila ha mukeza wakulimama kwa mwayile myaka,

²¹ amipane byuma nimwabyo byabiwahe ngayi mutende shifungo shendi, pe atende milimo mumwetu iya ikumuwahililisha, kupitila muli Yeshu Kilishitu. Kukwendi kwikale wuwahe wa mwayile myaka! Ameni.

Mazu a mamaninino

²² Bawushinda nikuminyepa, tambulenu elye lizu lyami lya kumikowamina, ndaba namitikitila mazu amashe omu mu lin̄wati.

²³ Nikushinga mulimuke ngayi kawushinda wetu Timoteo unashoboloko mu tolongo. Ndi ukwiza kuno nawangu, pe tukeza hamo na kumimona.

²⁴ Shangwishenu bakakutwaminina nimwabo na bakakuyela nimwabo. Bantu ba ku Itali bakumishangwisha.

²⁵ Nceshe zikale kukwenu nimwenu.