Bahebelu 11 - Kulimama Kwakupya

Kukulupila

¹ Kukulupila kwenga shilimukisho sha byuma bya kulumbeza na kuyuvwishisha byuma byakubula kumoneka.

² Bantu ba kushikale bengile babawahe ku meho a Nyambi, ndaba ya kukulupila, bashikale batumbalalile.

³ Na kukulupila, tukuyuvwishisha ngayi matunga alengiwile na lizu lya Nyambi, kami ebye bikumoneka byatendiwile ha byuma byakubula kumoneka.

⁴ Na kukulupila, Abele watupwile nkombela kuli Nyambi yakupitakana ya Kaina. Na kukulupila, Nyambi wamutambwile ngayi wakwoloka, oho atambwile ntupu yendi. Hinge ndi Abele wafwa, ngoboni ushili kwamba kupitila mu kukulupila.

⁵ Na kukulupila, Enoki wanungulukile ngayi abule kumona lufu, kaliha wawaniwile ndaba Nyambi wamunungulwile. Ndaba oho shilolo anunguluke, byatikitiwa bikwamba ngayi, wawahililishile Nyambi.

⁶ Ndaba ndi kowa kukulupila, shashikalu kuwahililisha Nyambi ndaba nimwendi ukwiza kuli Nyambi ukufwanina kukulupila ngayi Nyambi nikwo ekala, kami wapananga ncungu nimwabo baya bakumushinga.

⁷ Na kukulupila, Nowa oho Nyambi amushiwulwile ha byuma bikeza kumbili biya abula kumona, wombatalile, pe watendele wato muya bapulukilile niye wengile mukakukona kwoloka ndaba ya kukulupila.

⁸ Na kukulupila, Abulahama oho ehaniwile ngayi aye ku litunga liya amukulupishile Nyambi ngayi amupane, wombatalile, pe wafunzukile hinga abula kulimuka oku akuya.

⁹ Na kukulupila, wekalile mu litunga lya shikulupisho shimo.

¹⁰ Ndaba watatilililenga lukena luli na mwimbi, lunazikiwi na kutendiwa na Nyambi.

¹¹ Na kukulupila, Shala kami watambwile ngovu za kwimita, pe wabelekele mwana oho wakulumpalakale, ndaba wakulupilile ngayi ou wamukulupishile wakupwisha.

¹² Nohobene ku muntu umo, ou wengile ngo muntu wa kufwa, kunahemuwu bazukulu babengi ngo wingi wa nyenye za muyilu, hinge ngo lihekelela lili ha shibumbo sha liwate.

¹³ Nimwabo aba bafwile hinga bakulupila, kaliha batambwile bikulupisho, ngoboni babimonenene kwakutali, pe byabawahililishile, kami betabilile ngayi nibo bengile bayeni na banyambangizi mu kaye.

¹⁴ Ndaba bantu bakwamba ebye bakulimonekesha shiwahe ngayi bashili kushingishisha litunga lyabo.

¹⁵ Mwashikuma shinga bahanganikilenga bya litunga liyo bafumine, shinga bekalile na shikati sha kuboka.

¹⁶ Ngoboni bekalile na nyumwa ya litunga lyaliwahe shikuma, liya lili muyilu. Nohobene Nyambi kuyuvwa lisheni wufwako, ndaba unabawahishili lukena.

¹⁷ Na kukulupila, Abulahama oho ezekiwile watupwile Ishake. Abulahama ou watambwile bikulupisho, waliwahishilile ngayi atupule mwanendi umo tuhu.

¹⁸ Ou watoyiwile ngayi, “Muli lshake nimo eze ukekale na bazukulu ba shikulupisho.”

¹⁹ Abulahama wahanganikile ngayi Nyambi ukutwesha kushangula bafu, nohobene Abulahama watambwile lshake ngo uya unashanguku ku bafu.

²⁰ Na kukulupila, lshake wafuywelele Yakobo na lshau ha biya bikeza kumbili.

²¹ Na kukulupila, Yakoba oho ashingile kufwa, wafuywelele bana ba Yoshefwa wubili wabo, pe walemeshele hinga ayendamina ha mushako wendi.

²² Na kukulupila, Yoshefwa oho shilolo afwe wambile bya kututika kwa bana ba lshalela mu Engipita, kami wabatongwezele oku banafwanini kukamufunda.

²³ Na kukulupila, bahemi bendi Moshesha bamuholekele zingonda zihatu kufuma ha kuhemuwa kwendi, ndaba bamonene ngayi wengile mwana wamuwahe, kaliha batinine ndayano za Mwene.

²⁴ Na kukulupila, Moshesha oho akulile, wakanine kutumbiwa ngayi mwana wa mwana Falo wa mbuyana.

²⁵ Moshesha wahatile kwikala mu makalikiza hamo na bantu ba Nyambi kupitakana kuwahilila mu nkwela ya wubi mu kashikati kakashe.

²⁶ Moshesha wetabilile makalikiza akuyandila Kilishitu kupitakana wuheti wa Engipita, ndaba walifulankanine biya akatambula kumbili.

²⁷ Na kukulupila, Moshesha washiyile Engipita, kaliha watinine wukali wa mwene, pe wazumananine ndaba wamonene ou wakubula kumoneka.

²⁸ Na kukulupila, walamine Shimbo sha Kupitilila, pe watongwezele Baishalela ngayi bamyanzile mukeza ha bipana byabo ngayi uya Mukakulobesha bamyeli hinga akaziha bana babo.

²⁹ Na kukulupila, Baishalela bombokele Liwate lya Kufubila hinga lyayuma, oho Baengipita bezekele kutenda noho bakupukile.

³⁰ Nakukulupila, twimbi twa Yeliko twawile hanci, oho Baishalela bamanishile kutuzinguluka matena mutanu na abili.

³¹ Na kukulupila, mukalwiholwiho Lahabi ndaba watambwile bakakuhokela, kaliha wazihiwile hamo na bakakubula kwombatala.

³² Kati nikamba byakukuma hati? Shikati nifwasho shakwamba bya Ngindiyoni na Mbalaka na Shamishoni na Njefuta na Ndavita na Shamwele na bya bamiluwe.

³³ Kukulupila kwabo kwabayavwile kukona bamyene, kami batendele byakwoloka, pe batambwile bikulupisho. Bashinkile tunwa twa babimbwi.

³⁴ Bazimine ngovu za mundilo, bapanzile ku mukwale wa bakankole. Bengile bakupopa ngoboni bashumankanine, pe bekalile na ngovu za kukona nzita ya mapukwenda.

³⁵ Na kukulupila, bambuyama batambwile bawushinda wabo baya bashangukile ku bafu. Bamina bamonene malwa, pe bakanine kushoboloka ngayi mwanga bakashanguke shiwahe.

³⁶ Bamina babakumangizile na kubazipula zimpafwa, babamangile na kubayaka mu tolongo.

³⁷ Bamina babapuhile mamanya, babatabwile hakati na shaha, bamina babazihile na mukwale. Bamina bavwalile tuhu bitembe bya bambelele na bampongo, bekalile na wuvwu, pe bayandishiwile, kami bamonene malwa.

³⁸ Kaye kaliha kengile kakawahe kukwabo. Bendanganine mu mabelelengwa na mu mapili, na mu manzolongoma na mu mateke a mu litunga.

³⁹ Nimwabo aba, bali na mpupo yayiwahe ndaba ya kukulupila kwabo, ngoboni kowa ou watambwile shiya shikulupisho.

⁴⁰ Nyambi watuwahishilile shuma shashiwahe shikuma, washingile ngayi ndele etu twakaliwanika hamo nabo, noho bakakume ha shikonkwani.