Bahebelu 10 - Kulimama Kwakupya

¹ Ndaba ndayano zinengi tuhu mumvulu wa byuma byabiwahe bikeza, kaliha ngayi Ndayano za Bayunda nizo bene byabiwahe, nohobene ezi zinkombela zikutupuliwa shikati nimwasho ha mwaka na mwaka kutwesha kulembukisha aba bakwiza kuli Nyambi zifwako.

² Ndaba shinga zikutwesha kuyelesha wubi, shinga baleha mwaka kukombelela. Kami shinga bakakulemesha bayeleshiwile ha shikati shimo, pe shinga kaliha bali na shikeku sha wubi.

³ Ngoboni ziya zinkombela zenga shanukisho sha wubi ha mwaka na mwaka.

⁴ Ndaba mukeza wa bankuzi na zimpongo kaliha ukutwesha kufumisha wubi.

⁵ Nohobene oho Kilishitu ezile mu kaye, wambile kuli Nyambi ngayi, “Kaliha washingile zinkombela na zintupu, ngoboni unangwahishili lutu.

⁶ kaliha wawahililile mu zintupu za kuhokesha na zintupu za wubi.

⁷ Niho nambile ngayi, ‘Mona, ninezi na kutenda shifungo shobe obe Nyambi, ngonehi byatikitiwa mu libuka lya ndayano.’ ”

⁸ Oho ambile ngayi, “Zinkombela na zintupu za kuhokesha na zintupu za ha wubi, kaliha wazishingile, kami kaliha wawahilile nazo.” Hinge ndi bazitupwilenga ngonehe zikwamba ndayano.

⁹ Niho kami ambile ngayi, “Mona, ninezi na kutenda shifungo shobe, obe Nyambi.” Wafumishile zinkombela za kutatika ngayi ashumishe nkombela ya wubili.

¹⁰ Na shiya shifungo tunayeleshiwi na nkombela ya lutu lwa Yeshu Kilishitu kamo tuhu ha nimwabyo.

¹¹ Mukankombela nimwendi ukwimana ha mutena na mutena na kutenda milimo, ha shikati na shikati ukutupula zinkombela ziya zikubula kutwesha kufumisha wubi.

¹² Haya oho amanishile kutupula nkombela yimo ya ha shikati nimwasho ndaba ya wubi, wekalile ku liboko lya Nyambi lya shilyo.

¹³ Kufuma ku shikati shiyo unatatilili ngayi bakankole bendi batendiwe malyatilo a mawulu wendi.

¹⁴ Ndaba na nkombela yimo unalembukishi shikati nimwasho aba bali nakuyeleshiwa.

¹⁵ Na Moyo Wakuyela unapaka kukwetu oho unamba ngayi,

¹⁶ “Okwe niko kulimama nikatenda nabo munyima ya matena ayo, nisho akwamba Mwene. Nikayaka ndayano zami mu mitima yabo, kami nikazitikita mu ngana zabo.”

¹⁷ Niho anamba kami ngayi, “Wubi wabo na kutengama kwabo kukabyanuka nifwako.”

¹⁸ Haya ebye oho binayatiwili, nkombela ya kufumisha wubi kushingiwa yifwako.

Tuhenyenenu kwakwipi na Nyambi

¹⁹ Nohobene, bawushinda, ndaba tunashoboloko tukutwesha kwingina mu Mwanya Wakuyela Shikuma kupitila mu mukeza wa Yeshu.

²⁰ Watushinkwilile nzila yayipya yakuyoya, kupitila mu wumbo, hinge ngayi kupitila ha lutu lwendi.

²¹ Tuli na mukankombela wamunene uli na ngovu ha litala lya Nyambi.

²² Haya tuyenunga tuhenyene kuli Nyambi na mutima wakubomba na kukulupila kwakupwisha na mitima yinayeleshiwi yakubula bihanganiko byabibi na zinyutu zinayoweshiwi na mema akuyela.

²³ Tukakatilenu ebye tunakulupili biya tukulumbeza, ndaba ou watukulupishile wenga wakupwisha.

²⁴ Tulifulankanenu umo na wamina mu shishemo na mu milimo yayiwahe.

²⁵ Hinga tuleha kukungulukanga hamo, ngonehe bakutenda bamina, ngoboni tulishumankanishenu umo na wamina, nehi mukumona ngayi Mutena wa Mwene ulinakuhenyena.

²⁶ Ndaba ndi bantu bakutenda wubi na kufungasho, oho hinga balimuka kupwisha, kowa nkombela yamina kami iya yikatwesha kufumisha wubi.

²⁷ Bakakutenda byanehe, bali na mutentu kutatilila mundilo wa wukali, ou ukalobesha bakakukana Nyambi oho bakayatiwa.

²⁸ Muntu nimwendi wakilukile Ndayano za Moshesha wafwile kwakubula kuyuvwila nceshe ndi kuli wupaki wa bantu babili hinge bahatu.

²⁹ Mukuhanganika nahiti ha muntu uya ukulyatangila Mwana Nyambi na kulimbwilisha mukeza wa kulimama kwa Nyambi uya unamuyeleshe na kutukana Moyo wa nceshe? Kati kashushwilo kendi kakenga kanahiti?

³⁰ Ndaba tukumulimuka ou wambile ngayi, “Kubweshela kwenga kwami, nikabweshela.” Niye kami wambile ngayi, “Mwene ukayata bantu bendi.”

³¹ Shenga sha kutinisha shikuma kuwila mu maboko a Nyambi wakuyoya.

³² Haya anukenu matena akunyima, oho mwatambwile lumuni, hinge ndi mwekalile mu makalikiza, ngoboni mwazumananine mu nzita.

³³ Ha bikati byamina bamiyandishile na kumitukana hakati ka bantu, kami ha bikati byamina mwemanine na baya batendiwile nahiyo.

³⁴ Ndaba mwayuvwilile nceshe baya bekalile mu tolongo, kami mwetabilile hinga mwawahilila ngayi bapukule byuma byenu, ndaba mwalimukile ngayi enu muli na wuheti wawuwahe uya ukalaluka mwayile myaka.

³⁵ Nohobene shumishenu, ndaba mukawaninaho shitapilo shashinene.

³⁶ Munafwanini kwikala na lunzewe ngayi mwanga mutende shifungo sha Nyambi, pe mukatambula shikulupisho shendi.

³⁷ Ngonehi kwatikitiwa ngayi, “Kushili tuhu kashikati kakashe, pe mukakwiza ukeza, kukehala wufwako.

³⁸ Bantu bami bakwoloka bakayoya na kukulupila, ngoboni nimwendi ukashintuluka, nifwako kukawahilila nendi.”

³⁹ Ngoboni etu kaliha tuli bakakushintuluka ngayi tukalobe, ngoboni tuli bakakukulupila, pe tunapuluku.