Bahebelu 1 - Kulimama Kwakupya

Mazu a Nyambi kupitila muli Mwanendi

¹ Ku shikale Nyambi wambile ku bankaka zetu bikati byabingi mu zinzila za kupitila muli bamiluwe,

² ngoboni mu matena ano a kukotoka unamba kukwetu kupitila muli Mwanendi. Nyambi walengele byuma nimwabyo kupitila mumwendi, ou ahatile kwinga mukakukona byuma nimwabyo.

³ Kilishitu niye kubyazima kukumonesha wuwahe wa Nyambi, kami niye shifwekesha shakupwisha sha mutuntu wa Nyambi na kwimanika byuma nimwabyo na lizu lyendi lya ngovu. Oho amanishile kuyelesha wubi wetu niye mwine, wekalile ku liboko lya shilyo lya wuwahe wa Nyambi Mpandashilanga.

Kilishitu ukupitakana mangeloyi

⁴ Kilishitu ukupitakana mangeloyi, na lizina ashwana lyakukangana kukwawo.

⁵ Ndaba hinge Nyambi kaliha wambile ku umo wa mangeloyi ha shikati shamina ngayi, “Obe uli Mwanami, mutena walelo nafutuku kwinga Tatiyobe.” Nyambi kaliha wambile ku lingeloyi ngayi, “Nikenga Tatiyendi, niye ukenga Mwanami.”

⁶ Ngoboni Nyambi oho atumine Mwanendi wa mweli mu kaye wambile ngayi, “Mangeloyi nimwawo akufwanina kumulemesha.”

⁷ Ku mangeloyi Nyambi wambile ngayi, “Ukatenda mangeloyi endi myoyo, na bakamilimo bendi milangi ya mundilo.”

⁸ Ngoboni bya Mwanendi unamba ngayi, “Obe Nyambi, shuba shobe shenga sha mwayile myaka! Ukalela bantu bobe na kwoloka.

⁹ Obe ukuhaka kwoloka na kuzimba wubi. Nisho shuma eshe ami, Nyambi yobe, nakukatulu na kuwabishi mazi akumonesha kuwahilila kupitakana baminobe.”

¹⁰ Wambile kami ngayi, “Obe Mwene, ha kutatika walengele kaye, watendele mayilu na maboko obe.

¹¹ Ebye nimwabyo bikamana, ngoboni obe ukekala, nimwabyo bikakulumpala ngo bivwalo.

¹² Kami ukabipeteka ngonehe shikobelo, kami bikafutuka ngonehe likwiza. Ngoboni obe wufwako kukafutuka, na myaka yobe ikabula kumana.”

¹³ Nyambi kaliha wambile ha umo wa ba mangeloyi bendi ngayi, “lkala ku liboko lyami lya shilyo hantu nafutulu bamalamo bobe kwinga shipona sha kulyata mawulu wobe?”

¹⁴ Kati mangeloyi enga shuma ngani? Nka nimwawo enga myoyo ya kutendela milimo Nyambi, kami yatumiwile kuyavwa aba bakatambula kupuluka.