3 Yowano 1 - Kulimama Kwakupya

¹ Ami Mukulwane. Nikushangwisha Ngayushi ou nahaka shikuma.

² Wakuhakiwa, nikulombela ngayi byuma nimwabyo kwobe bikwendele na kupinduka shiwahe, ngonehe unashumu mu moyo.

³ Ami nawahilila shikuma oho bawushinda muli Yeshu bakumine kuno na kupaka kukulupila na nyinkalo yobe yakupwisha.

⁴ Shangwahilishanga shikuma oho nayuvwanga ngayi bana bami bakwenda mukupwisha.

Ngayushi ukuyemeziwa

⁵ Wakuhakiwa, ukukulupiliwa shikuma mu milimo ukutenda ku bawushinda muli Yeshu, hinge ngayi banengi bayeni kukwobe.

⁶ Balinakupaka shishemo shobe ku litengo, ukatenda shiwahe ndi ukabayavwa na shiheka sha Wunyambi, ha lwendo lwabo.

⁷ Bayile ha lwendo ndaba ya lizina lya Kilishitu nakubula kutambula shuma shimo ku bakakubula kukulupila.

⁸ Nohobene etu tukufwanina kuyavwa bantu banoho, ngayi twinge bakakutenda milimo hamo nabo wakushimikila kupwisha.

Ndotolofwashi na Ndemetiliyashi

⁹ Natikitila lin̄wati ku litengo, ngoboni Ndemetiliyashi, ou washinga shikuma untwamina, ulinakukana mazu wami.

¹⁰ Nohobene akeza, nikaholola ebye alinakutenda na mazu amabi alinakwamba hahami. Kaliha ukutenda obyo tuhu, wakananga kutambula bawushinda Baka Yeshu, kami ukukanisha aba bakushinga kubatambula na kubatanda mu litengo.

¹¹ Obe muhoni wakuhakiwa, hinga uhembwiliza ebye byabibi, ngoboni hembwiliza byabiwahe. Nimwendi ou ukutenda byuma byabiwahe wenga wa Nyambi, ngoboni ou ukutenda byabibi shilolo alimuke Nyambi.

¹² Ndemetiliyashi uli na mpupo yayiwahe ku bantu nimwabo, hinga kupwisha kukumupaka nanami kami nikumupaka, kami mukulimuka ngayi wupaki wami wakupwisha.

Kushangwisha kwa mamaninino

¹³ Nili na byabingi ebye nafwanina kukutikitila, ngoboni kutwesha kubitikita mu lin̄wati nifwako.

¹⁴ Nikulumbeza ngayi nikumone wanguwangu, mwanga tukambole ku meho na meho.

¹⁵ Kumwena kwikale nobe. Bahoni bobe nimwabo bakukushangwisha. Shangwisha bahoni betu oko ha mazina abo.