2 Yowano 1 - Kulimama Kwakupya

¹ Ami Mukulwane. Nikushangwisha Mbuyama wakuhatiwa na bana bendi aba nahaka shikuma. Pe kaliha ami tuhu namihaka, ngoboni nimwabo aba kami banalimuku kupwisha.

² Tunamihaka ndaba yakupwisha oku kuli mumwetu, kami kukekala netu mwayile myaka.

³ Nceshe na shikeketima na kumwena, bikufuma kuli Nyambi Tate na kuli Mwene Yeshu Kilishitu Mwanendi, bikale netu mukupwisha na mu shishemo.

Kupwisha na shishemo

⁴ Nawahililile shikuma oho nawanine ngayi bana bobe bamo bali mukupwisha, nehi Tate atulayile ngayi tutendenga noho.

⁵ Haya nikukulomba mawa, ngayi tulihake umo na wamina kaliha ngayi nikukutikitila ndayano zazipya, ngoboni ezi twekalile nazo kufuma ku kutatika.

⁶ Osho nisho shishemo nikwamba ngayi etu twombatale ndayano za Nyambi. Ndayano eze nikumitikitila, nehi mwayuvwile ha kutatika ngayi mwinge bakakulihaka.

⁷ Ndaba bantu babengi bakakwongeza banengini mu kaye, aba bakubula kwitabila ngayi Yeshu Kilishitu waliholwele mu wuntu. Muntu wukubula kwitabila eshe mukakwongeza, kami mukakulwisha Kilishitu.

⁸ Keyenu mwanga mubule kuyawa byuma ebye munatendele milimo ngayi mukatambule ncungu sha kwinzala.

⁹ Nimwendi ukubula kwikala mu bilongesha bya Kilishitu, ngoboni hakuwezelelako, pe Nyambi ufwaye. Ou ukwikala mu bilongesha bya Kilishitu, uli nabo nimwabo Tate na Mwana.

¹⁰ Ndi wamina ukeza kukwenu nakubula kuleta kulongesha oku, hinga mumutambula mu litala lyenu, hinge kumushangwisha.

¹¹ Ndaba niye ukumushangwisha ukwinga mukakutambula shitapilo sha milimo yendi yayibi.

Mazu a mamaninino

¹² Nili na byabingi byakufwanina kumitongweza, ngoboni kutwesha nifwako ngayi nitikite munelye lin̄wati. Nikulumbeza ngayi nikeza kukwenu na kumimona mwanga nikabyambe ku meho na meho ngayi kuwahilila kwetu kwinzale.

¹³ Baminenu, bana ba mpazenu wakuhatiwa kuli Nyambi, bakumishangwisha.