2 Timoteo 4 - Kulimama Kwakupya

¹ Nikukutongweza ku meho a Nyambi na Mwene Yeshu Kilishitu, ou ukayata bantu nimwabo, babomi na bafu, oho akeza na kwinga kalela mu Wene wendi ngayi,

² liwahishile kushimikila ncango, bashimikile ha shikati bakuzishinga na ha shikati bakubula kuzishinga. Shiwulula, kalihila, shumankanisha na lunzewe nimwalwo.

³ Ndaba shikati shikeza oho bantu bakakana kulongesha kwakupwisha, ngoboni bakalikungwila balongeshi aba bakabalongesha biya bakashinga nibo bamwine biya bikayuvwanika matu abo akuyuwa.

⁴ Bakakana kuyuvwishisha byakupwisha, pe bakatengulukila ku tushimpu.

⁵ Ngoboni obe, utone ku byuma nimwabyo, zumanana mu makalikiza, tenda mulimo wakushimikila ncango zaziwahe. Kami tenda shiwahe mulimo wobe ndaba uli mukamulimo wa Nyambi.

⁶ Ngoboni ami wuluno nitupuliwe, kami shikati shami sha kuya kufuma mu wumi uno shakumakale.

⁷ Ninalu ngunga yayiwahe, ninalikwatishi kwituka, namanishi mukala wami, ninalama kukulupila.

⁸ Wuluno munana wakwoloka uli na kuntatilila ou Nyambi anantentekele, ou Mwene, mukakuyata mukwoloka, ukampanawo ha Mutena uyo, kaliha ami tuhu, ngoboni ku nimwabo baya bakutatilila ngayi amoneke.

Mazu amina

⁹ Ezeka shikuma ngayi wize kukwami wanguwangu.

¹⁰ Ndemashi unanciyi, ndaba ya kuhaka kano kaye, unayi ku Teshalonika. Kileshenci unayi ku Ngalatiya, Taitashi unayi ku Ndalamatiya,

¹¹ ndele Luka niye uli nanami. Pitula Mako wize nendi, ndaba niye ukutwesha kunyavwa mu mulimo.

¹² Natumine Tikikashi ku Efweshe.

¹³ Oho ukwiza, umpitwile canchi yami nashiyile ku Tolowashi kuli Kapashi na mabuka, ngoboni shinene akutenda ha bitembe.

¹⁴ Alekizanda mukakufula lubemba, wantendele shibi shikuma, ngoboni Mwene ukamubweshela ebye atendele.

¹⁵ Nanobe kami keya na Alekizanda ndaba niye wakananganine shikuma ncango zetu.

¹⁶ Ha kuliyawila kwami kwa kutatika, kowa muntu wemanine hamo nanami, ngoboni nimwabo banciyile, nikulomba kuli Nyambi ngayi hinga abalabila mulandu wabo.

¹⁷ Ngoboni Mwene wekalile nanami, kami wancumishile, ngayi kupitila mumwami ncango zaziwahe zishimikiwe ku Bakamatunga ngayi bayuvwe, napulukile ku kanwa ka shimbwi.

¹⁸ Mwene ukampulwisha ku byabibi nimwabyo na kuntwala shiwahe mu Wene wendi wa muyilu. Kukwendi kwikale wuwahe wa mwayile myaka! Ameni.

Kushangwisha kwa mamaninino

¹⁹ Shangwisha Pulishila na Akwila na bakalitala lya Oneshifwelashi.

²⁰ Elashitashi wekalile ku Kolinte, ngoboni Tolofwimashi namushiyile ku Miletashi hakola.

²¹ Ezeka shikuma kwiza kuno oho mupepo shilolo ukume. Yubulashi, Pundeshi, Linashi, Kilaundiya na bawushinda nimwabo bali na kukushingwisha.

²² Mwanga Mwene ekale na moyo wobe. Nceshe zikale nanenu.