2 Timoteo 2 - Kulimama Kwakupya

Kanzita wakupwisha wa Kilishitu Yeshu

¹ Nohobene obe mwanami, shumankana mu nceshe eze zili muli Kilishitu Yeshu.

² Byuma ebye unayuvwu kukwami hinamba mukati ka bapaki babengi, nibyo upana bantu bakupwisha, aba kami bakutwesha kulongesha bamina.

³ Zumanana mu makalikiza hamo netu ndaba uli kanzita wamuwahe wa Yeshu Kilishitu.

⁴ Ndi kanzita uli ha milimo kulifungila na bantu bali tuhu mwa nahiya wufwako, ngoboni washinganga kuwahililisha mukulwane wendi.

⁵ Nohobene muntu ukwituka ngayi awane ncungu, wufwako kukatambula munana ndele ombatale ndayano.

⁶ Ndimi ou ukutenda milimo na kukalamana, ukufwanina kutambula shitapilo sha kutatika ha kuteza.

⁷ Hanganika shiwahe byuma ebye nikwamba, Mwene ukakuyavwa kuyuvwishisha byuma nimwabyo.

⁸ Anuka ngayi Yeshu Kilishitu ou washangukile ku bafu, wengile muzukulu wa Ndavita, ngonehe byalongeshiwile mu ncango zaziwahe ezi nikushimikila.

⁹ Ndaba yakushimikila ncango zaziwahe, nikuyanda na kumangiwa ngonehe shikelemi, ngoboni lizu lya Nyambi kumangiwa lifwako.

¹⁰ Nohobene nikuzumanana mu byuma ebye nimwabyo ndaba ya bakakuhatiwa, ngayi nanibo kami batambule kupuluka kuli muli Kilishitu Yeshu na wuwahe wa mwayile myaka.

¹¹ Eye nyambilo yenga yakupwisha ngayi, “Ndi tunafu nendi, tukayoya nendi kami.

¹² Ndi tukuzamana, nanetu kami tukalela hamo nendi. Ndi tukumukana, niye kami ukatukana.

¹³ Ndi tukubula kukulupila, niye ukwinga mukakupwisha. Ndaba kutwesha kulikana niye mwine wufwako.”

Mukamulimo unetabilishiwi kuli Nyambi

¹⁴ Ubanukishenga ebye byuma na kubambila ku meho a Mwene ngayi hinga balikanganisha ha mazu akubula kuyavwa, aya akubipisha bantu bakuwayuvwa.

¹⁵ Zundamina shikuma ngayi winge mukakwitabilishiwa kuli Nyambi, na mukamulimo wakubula kuyuvwila lisheni mulimo wendi, mukakushimikila shiwahe lizu lyakupwisha.

¹⁶ Hinga utenda nkani zowa za kubwaya, ziya zikutandila bantu kwakutali na Nyambi.

¹⁷ Bilongesha byanoho binafweke ngo shitombo sha mbongola shiya shanenehanga. Hemeniyashi na Fwiletashi nibo balume babili bakulongesha byanoho.

¹⁸ Banashanuku kukupwisha, bakwamba ngayi kushanguka kwapitakale, nohobene banakulobesha bakakukulupila bamina.

¹⁹ Ngoboni mwimbi ou Nyambi azikile wakushuma, pe hahawo hanatikitiwi ngayi, “Mwene ukulimuka aba banengi bendi” kami ngayi “Muntu nimwendi ukuyemeza lizina lya Mwene nafwanini kutenguluka kufuma ku wubi.”

²⁰ Mu litala lya linene, kaliha muli tuhu bingwalingwali bya ngolinde na shiliva, ngoboni muli na bya bitondo na bya lima. Byamina bya kuliyavwisha ha bikati bimo, byamina bya kuliyavwisha ha bikati nimwabyo.

²¹ Nohobene ndi muntu ukuliyelesha ku byuma nimwabyo bya wubi, ukenga ngonehe shingwalingwali sha kuliyavwisha ha bikati byamina, ndaba niye unatapuluku kami Hekulyendi namwingi wa kuliyavwisha, pe unalibalakanya kutenda milimo nimwayo yayiwahe.

²² Tina mahungu amabi a wundumbana, ngoboni konka kwoloka na kukulupila na shishemo na kumwena, hamo nanibo bakwihana kuli Mwene na mutima wakuyela.

²³ Hinga utenda nkani zakuyeba na za wulube, ndaba ukulimuka ngayi zaletanga mangunga.

²⁴ Mukamulimo wa Mwene kaliha wafwanina kwinga wa nkani, ngoboni unafwanini kwinga wa nceshe ku bantu nimwabo, mukakutwesha kulongesha shiwahe na lunzewe,

²⁵ enge wakulilimbwilisha oho akushiwulula bakumulwisha ngayi kampe Nyambi ukabapanika shikati sha kutenguluka ngayi balimuke kupwisha.

²⁶ Mwanga bakapanze ku kantamba ka Mukawubi, ou wabayakile mu wutampwa wakutenda shifungo shendi.