2 Teshalonika 2 - Kulimama Kwakupya

Wamubi

¹ Bawushinda, ha byakwiza kwa Mwene wetu Yeshu Kilishitu na bya kukungulukila hamo kukwendi, tukuminyepa,

² ngayi hinga mulikekula, kami hinga mubazumuniwa na baya bakulubulula hinge baya bakwamba hinge na lin̄wati likumoneka ngo linafumu kukwetu, kwamba ha bya Mutena wa Mwene ngayi wakumakale.

³ Hinga mwitabila ngayi muntu wamina amyongeze na shiheka shamina. Ndaba oho uya Mutena shilolo wize, kukeza taha mukakushanwisha na muntu wamubi ukamoneka, uya muntu ukaloba.

⁴ Ukakanangana kami ukaliyemeza niye mwine hayilu ya byuma nimwabyo bikutumbiwa ngayi nyambi, hinge biya bikulemeshiwa. Ukatwala shipona shendi mu Litala lya Nyambi, ukalilundumika niye mwine ngayi niye Nyambi.

⁵ Kati kwanuka mufwako ndi? Oho nekalilenga nenu, namitongwezelenga ebye byuma.

⁶ Haya wuluno mwalimukakale eshe shikumukanisha kumoneka, ngayi mwanga akaholoke ha shikati shendi.

⁷ Ndaba ngovu za kuholama za kuholola Mukawubi zilinakutenda milimo, ngoboni kuli ou ulinakuzikanisha, pe uya Mukawubi kukamoneka wufwako, hantu uya ulinakukanisha ziya ngovu akafuma mu nzila.

⁸ Niho kukaholoke Mukawubi, pe Mwene Yeshu ukamufumisha na moyo wa mu kanwa kendi, kami ukamulobesha na kubyazima kwendi oho akeza.

⁹ Uya Mukawubi, ukeza na ngovu nimwazo za Shatana, pe ukatenda bimonekesho na bikomokesho bya mahalo,

¹⁰ kami ukatenda nimwabyo bya kutengama bya kwongeza baya bakaloba. Bakaloba, ndaba shilolo batambule shishemo shakupwisha, ngayi bapuluke.

¹¹ Ndaba yanebye, Nyambi ukabatumina ngovu za mukakwongeza ngayi bakulupile bya mahalo,

¹² ngayi nimwabo aba bakubula kukulupila kupwisha, baya bakuwahilila bya wubi mwanga balobe.

Munahatiwili wumi

¹³ Ngoboni etu tunafwanini kukambilila kuli Nyambi shikati nimwasho ndaba yanenu bawushinda wetu bakuhakiwa kuli Mwene, ndaba Nyambi wamihatile kufuma ku kutatika ngayi mupuluke, pe munayeleshiwi na Moyo, kami munakulupili kupwisha.

¹⁴ Kunebye, Nyambi wamihanine kupitila mu ncango zaziwahe twashimikilile kukwenu, ngayi mwanga mutambule shitapilo sha wuwahe wa Mwene wetu Yeshu Kilishitu.

¹⁵ Nohobene, bawushinda, shumishenu, kami kakatilenu ebye twamilongeshele na mazu a mu kanwa, hinge mazu a mu man̄wati etu.

¹⁶ Mwanga Mwene wetu Yeshu Kilishitu niye mwine na Nyambi Tatiyetu, ou watuhakile na kutupana kubengezekiwa kwa shikati nimwasho na kulumbeza kwakuwahe na nceshe zendi,

¹⁷ abengezeke mitima yenu na kumishumisha mu lizu nimwalyo na mu milimo yayiwahe.