2 Teshalonika 1 - Kulimama Kwakupya

¹ Ami Paulu na Shilashi na Timoteo, tukutikitila ku litengo lya bantu ba mu Teshalonika muli Nyambi Tatiyetu na Mwene Yeshu Kilishitu.

² Nceshe na kumwena, bikufuma kuli Nyambi Tatiyetu na Mwene Yeshu Kilishitu bikale nenu.

Kuyata kukekalako hakwiza kwa Kilishitu

³ Bawushinda, etu tunafwanini kukambilila kuli Nyambi shikati nimwasho ndaba yanenu. Shinatufwanini ngayi tutende noho, ndaba ngayi kukulupila kwenu kuli na kukula shikuma na shishemo shenu nimwenu ku umo na wamina shili na kuneneha.

⁴ Nohobene etu tuli na kuliyemeza mu matengo a Nyambi ndaba ya lunzewe lwenu na kukulupila kwenu hinge oho mulinakumona makando na malwa munazumanana.

⁵ Ebye nimwabyo bikulubulula ngayi kuyata kwa Nyambi kwenga kwakwoloka, ngayi mwanga mwinge bakakufwanina Wene wa Nyambi, owu mukuyandila.

⁶ Nyambi wenga wakupwisha, ukabweshela makalikiza kukwabo baya bakumiyandisha.

⁷ Pe ukakwangulukisha enu muli na kuyandishiwa, nanetu kami ukatukwangulukisha. Ebye bikatendiwa oho Mwene Yeshu akaholoka kufuma muyilu na mangeloyi endi a ngovu mu milangi ya mundilo,

⁸ pe ukashushula baya bakukana Nyambi na baya bakubula kwombatala ncango zaziwahe za Mwene wetu Yeshu Kilishitu.

⁹ Bakashushuliwa na makalikiza a mwayile myaka, bakafumishiwa ku meho a Mwene na ku wuwahe wa ngovu zendi,

¹⁰ oho akeza ha mutena uyo, kwiza na kutambula wuwahe ku bantu bendi bakuyela nimwabo na kutambula maleema ku bakakwitabila, nanenu kami mukekala mukati kabo ndaba mwetabilile ncango twamitongwezele.

¹¹ Nohobene twamilombelelanga shikati nimwasho. Twanyepanga Nyambi ngayi amitwesheshe mwanga muyoye wumi uya unafwanini baya anehana. Mwanga na ngovu zendi, enzalishe bifungo byenu nimwabyo byabiwahe na kumanishilila milimo yenu ya kukulupila.

¹² Tukulombela ngayi lizina lya Mwene wetu Yeshu Kilishitu lilemeshiwe mumwenu, nanenu mumwendi, ngonehe ku nceshe za Nyambi yetu na Mwene Yeshu Kilishitu.