2 Pita 3 - Kulimama Kwakupya

Shikulupisho sha kwiza kwa Mwene

¹ Bakakuhakiwa, lino nilyo lin̄wati lya wubili nikumitikitila. Namitikitila man̄wati awa, kupindula mitima yenu yakuyela na ku myanukisha.

² Nikushinga ngayi mwanuke mazu bambile mwaka bamiluwe bakuyela na ndayano za Mwene na Mupulwishi kupitila muli bantumwana benu.

³ Shuma sha kutatika mwafwanina kuyuvwishisha eshe, ngayi ha matena a kukotoka kukeza bakawuncengwe, bakakukonka mahungu abo, bakakukumangiza,

⁴ nakwamba ngayi, “Shikulupisho sha kwiza kwendi shili kuti? Ndaba hinga bafwila batati zetu, byuma nimwabyo binekala ngonehe byekalile kufuma ku kulenga kwa kaye.”

⁵ Bakutenda ntalu na kuvulama shuma eshe ngayi, na lizu lya Nyambi, mayilu ekalile mwaka na kaye kemanine hayilu ya mema, kami kazika mu mema.

⁶ Kami na nawa mema, kaye aka kekalileko mwaka, kakupukile na libazi, kami kalobele.

⁷ Kami na nelye lizu, mayilu na kaye ebye biliko shikati shino, binatatilili mundilo ha Mutena wa Kuyata na kuloba kwa bakawubi.

⁸ Ngoboni, bakakuhakiwa, hinga muvulama eshe shuma ngayi mutena umo kuli Mwene unengi ngo myaka likulukazi limo na myaka likulukazi limo yinengi ngo mutena umo.

⁹ Mwene kwihalisha wufwako shikulupisho shendi, ngonehe bantu bamo bakutoya ngayi kwihala, ngoboni uli na lukakatila kukwetu na kubula kushinga ngayi muntu wamina alobe, ngoboni ngayi nimwabo batenguluke.

¹⁰ Ngoboni Mutena wa Mwene ukeza ngo mwizi, pe mayilu akapita na miyoyo yayinene, na byuma bikanyangumuka na mundilo, na kaye na milimo yako bikapeluka.

Kuyavwa kwa kulibalakanya

¹¹ Ha kuwana ngayi byuma nimwabyo ebye bikanyangumuka, haya munafwanini kwinga bantu banahiti? Munafwanini kwinga bantu ba nyinkalo yakuyela na ya Wunyambi,

¹² oho munakutatilila kwiza kwa Mutena wa Nyambi, oho mayilu akabanga na kunyangumuka na mundilo!

¹³ Ngoboni kuya na shikulupisho shendi tukutatilila mayilu amapya na kaye kakapya, muya mwekala kwoloka.

¹⁴ Nohobene, bakakuhakiwa, ndaba mukutatilila byuma byanoho, zundaminenu ngayi muwaniwe kukwendi mu kumwena, bakubula libala, hinge nyanco.

¹⁵ Limukenu shuma eshe ngayi lukakatila lwa Mwene wetu lwenga kupuluka, ngonehe Paulu kawushinda wetu wakuhakiwa amitikitilile na ngana eze Nyambi amupanikile.

¹⁶ Unatikiti mu man̄wati endi nimwawo, kutoya byuma ebye mumwawo. Muya mu man̄wati endi muli byuma bimo byabikalu kubiyuvwishisha, ebye bakakubula kulilongesha na bakakubula kushuma mu kukulupila bakupeteka, kutwala ku kuloba kwabo nehi kami bakutenda ku byamina byatikitiwa.

¹⁷ Nohobene, enu bakakuhakiwa, ndaba munalimuku ebye byuma, keyenu kutina enu kami mushanuka na kuyongala kwa bakawubi na kuwa ku kushumankana kwenu.

¹⁸ Ngoboni kulenu mu nceshe na mu kalimukisho ka Mwene na Mupulwishi wetu Yeshu Kilishitu. Kukwendi kwikale wuwahe shikati shino na mwayile myaka! Ameni.