2 Kolinte 8 - Kulimama Kwakupya

Kupanika kwa bakakwitabila

¹ Bawushinda, tukushinga ngayi mulimuke eshe Nyambi atandalishile matengo a ku Mashendoniya.

² Bakakwitabila bapitile mu byezeko byabinene shikuma, ngoboni bawahililile shikuma, hinge ngayi bengile bakushepwa, ngoboni bapanikile mukuwahilila.

³ Ami nikupaka ngayi bapanikile ngo kutwesha kwabo na kupitakana, ndaba nisho bashingile nibobene.

⁴ Kwakubula muntu wakubakandamika batulombele na kutukowamina shikuma ngayi tubetabilishe ngayi nabo kami bapanike byakuyavwa ku bantu ba Nyambi ba ku Yundeya.

⁵ Batendele eshe kupitakana nehi twahanganikile, ha kutatika balipanine kuli Mwene, kuya na shamutima wa Nyambi balipanine na kukwetu.

⁶ Nohobene twashingile ngayi Taitashi, nehe atatikile ou mulimo wakukungulula bya kupanika byakuyavwa nahiyo amanishilile mumwenu nceshe eze kami.

⁷ Nohobene nehe mukuhanya mu byuma nimwabyo, mu kukulupila na nyambilo na kalimukisho na shizundami nimwasho na mu shishemo kukwetu, tilaminenu ngayi muhanye mu nceshe eze kami.

⁸ Kaliha nikwamba na ndayano. Ngoboni ndaba ya shizundami sha bamina, nikushinga kufwanikiza kukanguka kwa shishemo shenu ndi shakupwisha.

⁹ Mukulimuka nceshe za Mwene wetu Yeshu Kilishitu. Hinge wengile mukakuheta, ngoboni ndaba yenu wafutukile mukakushepwa, ngayi enu na wuyande wendi mutweshe kuheta.

¹⁰ Bihanganiko byami ha shuma nikumibela ebye, shuma eshe sha kufwanina ngayi enu mumanishilile byuma mwatatikile mwaka, kaliha kushinga kubitenda ngoboni ku zundamina kami.

¹¹ Nohobene wuluno manishililenu kutenda. Ndaba nehi mwazundaminine na kushinga kutenda, nahiyo tendenu na kuzundamina ngayi mumanishilile na byuma mulinabyo.

¹² Ndi muntu ulina lunzewe lwa kupanika, Nyambi watambulanga na kuwahilila byuma biya muntu alinabyo, kami kukandamika muntu wufwako ngayi apanike byuma akubula.

¹³ Kushinga nifwako ngayi enu muyande bamina bahehupile, ngoboni ngayi mwezekele hamo,

¹⁴ ngayi enu muli na byabingi ha shikati shino, munafwanini kuyavwa banabulubyo, ngayi ku matena akwiza nibo bakawana bakamiyavwe enu mwakabulukabyo.

¹⁵ Nehi kwatikitiwile ngayi, “Muntu ou wabungikile byabingi kowa shuma shashalile, na nou wabungikile byabishe, kaliha wabulile.

Taitashi na bahoni bendi

¹⁶ Tukukambilila kuli Nyambi, ou wayakile mu mutima wa Taitashi shinzundami ngonehe etu tukumiyavwa.

¹⁷ Ndaba niye kutambula wufwako tuhu ebye twamulombele, ngoboni ndaba ya kuzundamina kwendi kwakunene, wahanganikile kwiza kukwenu.

¹⁸ Hamo na Taitashi tukutuma kawushinda wetu uya, ou matengo nimwawo akumuyemeza ndaba ya mulimo wendi wakushimikila ncango zaziwahe.

¹⁹ Kaliha ebye, ngoboni matengo amuhatile ngayi akatushindikize hakutwala biya bishemo, shikutendiwa netu kupana wuwahe kuli Mwene, na shimonekesho sha shizundami sha mutima wenu.

²⁰ Kushinga tufwako ngayi muntu atunyance mukutwala byakuyavwa ebi binahanya.

²¹ Tukushinga kutenda byuma byakwoloka, kaliha ku meho a Mwene tuhu, ngoboni na ku meho a bantu.

²² Pe twakutuma hamo nabo kawushinda wetu, tunamwezeke bikati byabingi, tunamumono ngayi mukakuzundamina mu byuma byabingi. Wuluno ulinakuzundamina ndaba ya kutemba kwendi kukwenu.

²³ Ngoboni Taitashi, muhoni wami ukuyavwa mu mulimo wakumiyavwa. Hinga bakwipula ndaba ya bawushinda wetu, nibo bantumwana ba matengo na wuwahe wa Kilishitu.

²⁴ Nohobene moneshenu shishemo shenu kukwabo, ngayi matengo nimwawo ashimone na kulimuka ngayi tufwako kubipisha oho tukuliyemeza ndaba yenu.