2 Kolinte 7 - Kulimama Kwakupya

¹ Nohobene ndaba tuli na bikulupisho ebye, enu bakakuhakiwa shikuma, tuliyeleshe ku biya nimwabyo bikuleta mazilo ku lutu na ku moyo, ngayi twinge bakakulembuka mukuyela kwa kuyuvwila Nyambi bowa.

Paulu ukuwahilila

² Mututambule na mitima yenu. Kowa ou tulinendi na mulandu, kowa ou tunabipishi, kami kowa ou tunakeyele.

³ Kaliha ngayi nikuminyanca oho nikwamba ebye, ndaba ngonehe ninamba mwaka, muli mu mitima yetu, pe tulihamo mukuyoya hinge mu lufu.

⁴ Ninamilumikili shikuma kami nikumiyemeza shikuma. Mu makalikiza etu nimwawo, nishili wakushuma shikuma kami nikuwahilila shikuma.

⁵ Ndaba hinge oho twakumine ku Mashendoniya, kaliha twekalile na shikati sha kukatala, ngoboni twakalikizile ku zimbalila nimwazo, twekalile na kulikananganisha na bamo, bowa wekalile mu mitima yetu.

⁶ Ngoboni Nyambi, ou mukakubengezeka bakakukendiwa, watubengezekele hakwiza kwa Taitashi.

⁷ Kaliha twawahililile tuhu oho ezile ngoboni nanoho twayuvwile ncango zendi za kututongweza kubengezekiwa oku awanine mumwenu. Watutongwezele shitima mulinasho ngayi mwize na kumona, na wunginga mulinawo, na ntukumina mulinayo hahami, nohobene nawahilili shikuma.

⁸ Ndaba hinge ndi lin̄wati lyami lyayuvwishile wunginga, ku linyanca nifwako. Hinge ndi nalinyancile mwaka, ninamono ngayi liya lin̄wati lyamiyuvwishile lisheni mu shikati tuhu shashishe.

⁹ Wuluno nikuwahilila, kaliha ndaba ya kumiyenesha, ngoboni ndaba liya lisheni lyamingishile ngayi mutenguluke. Nyambi waliyavwishile liya lisheni, nohobene kaliha twamiyuvwishile kukola.

¹⁰ Ndaba lisheni liya aliyavwishanga Nyambi, lyaletanga kutenguluka kwa mitima kuya kwaletanga kupuluka, pe kowa ntongawishi munebye. Ngoboni lisheni lya litunga lyaletanga lufu.

¹¹ Monenu ebye anatende Nyambi hanelye lisheni lyenu, monenu eshe munalifulankana, muli na shizundami shakumonesha ngayi mulandu mufwawo. Munapilama na kulikomokela. Muli na bifungo na lunzewe, kami munaliwahishili kushushula byakutengama. Munebye nimwabyo, munalimonekeshe ngayi muneshe shambo, enu mulandu mufwawo.

¹² Nohobene, hinge oho namitikitilile, kaliha natikitile ndaba ya uya watendele shibi, hinge ngayi ndaba ya uya babipishilile, ngoboni namitikitilile ngayi mwanga shizundami shenu hahetu shiholoke kukwenu ku meho a Nyambi.

¹³ Nohobene, tunabengezekiwi. Kaliha etu tuhu twabengezekiwile, shinene twawahililile shikuma ndaba ya kuwahilila kwa Taitashi, hanebye mwamuyavwile enu nimwenu.

¹⁴ Naliyemezele kukwendi ndaba yenu, pe lisheni nifwalyo. Shikati nimwasho tunamishimikili byakupwisha, nohobene kupwisha kunamoneke oho tunaliyemeze kuli Taitashi.

¹⁵ Kami shishemo shendi hahenu shinahanya, oho anukanga kwombatala kwenu nimwenu, na neshe mwamutambwile na bowa na kukanka.

¹⁶ Nohobene nikuwahilila ndaba ninalumikili shikuma mumwenu.