2 Kolinte 6 - Kulimama Kwakupya

¹ Nohobene ha milimo yetu hano nanenu, tukumilomba ngayi hinga mutambula nceshe za Nyambi ngayi zibipe nahiya.

² Ndaba Nyambi unamba ngayi, “Namiyuvwile ha shikati sha kuyamiziza kwami, kami namiyavwile ha mutena wakupulwishiwa.” Monenu, wuluno nisho shikati sha kuyamiziziwa, monenu, uno niwo mutena wakupulwishiwa.

³ Kushinga ngayi muntu wamina anyance milimo yetu tufwako, nohobene, kuyaka shipukalisho mu nzila ya muntu tufwako.

⁴ Ngoboni mu byuma nimwabyo tukutenda, tukumonesha ngayi tuli bakamilimo ba Nyambi, hinga twekala na lunzewe lwalunene, mu makando na mu makalikiza na mu malwa.

⁵ Tunakamiwi na kuyakiwa mu tolongo, kami tunayakiwi mu mishunga. Tunatende milimo shikuma, ha shikati shamina tunakonkama na tulo, hinge kwikala kwakubula byakulya.

⁶ Na kuyela na kalimukisho na lukakatila na nceshe na Moyo Wakuyela na shishemo shakubula shishweka,

⁷ tunashimikili lizu lyakupwisha na ngovu za Nyambi. Kwoloka nisho shilwisho shetu shiya tukuliyavwisha ha kulwa na ha kulilamwina.

⁸ Banatupana maleema kami banatuhandulu, banatutukana, kami banatuyemeze, batutoyo ngayi tuli bakakwongeza, ngoboni tuli bakupwisha.

⁹ Tunengi ngo bakubula kulimukiwa, ngoboni tuli bakulimukiwa, tunengi ngo baya banafu, ngoboni tulinakuyoya. Hinge ndi tukushushuliwa, ngoboni kuzihiwa tufwako.

¹⁰ Hinge ndi tukuyeneshiwa ngoboni tukuwahilila shikati nimwasho. Hinge ndi tuli bakushepwa, ngoboni tukuhetesha babengi. Tunengi ngo bakubula shamina, ngoboni tunahete byuma nimwabyo.

¹¹ Enu Bakakolinte! Tunamba shintwantwa kukwenu, kami tunashinkululu shikuma mitima yetu kukwenu.

¹² Etu shilolo twikale na mitima yakubula kushoboloka kukwenu, ngoboni enu muli na mitima yakubula kushoboloka kukwetu.

¹³ Haya nikwamba kukwenu ngonehe bana bami, tumoneshenu bifungo bya kufweka ngo biya tulinabyo etu hahenu. Shinkululenu shikuma mitima yenu.

Kushiwulula ha bya kukonka litunga

¹⁴ Hinga mumangiwa ku mpongoho hamo na bakakubula kukulupila. Ndaba kwoloka kukulilumikila nahiti na kutengama? Hinge lumuni lukulilumikila nahiti na mincimpwe?

¹⁵ Kati Kilishitu na Mbeliyalu bakutwesha kuliyuvwashana ndi? Hinge mukakukulupila, ukutwesha kulilumikila nahiti na mukakubula kukulupila?

¹⁶ Kami Litala lya Nyambi likutwesha kuliyuvwashana nahiti na tunankishi? Ndaba etu tuli Litala lya Nyambi wakuyoya. Nehi Nyambi ambile niye mwine ngayi, “Nikekala mumwabo kami nikenda hakati kabo, nikenga Nyambi yabo, pe bakenga bantu bami.”

¹⁷ Ebye nibyo akwamba Nyambi ngayi, “Nohobene fumenu mukati kabo, mwinge bakakulitapa nabo. Hinga mukwata shuma sha mazilo, pe ami nikamitambula.

¹⁸ Nikenga tatiyenu, pe enu mukenga bana bami ba balume na ba bambuyama. Ebye nibyo anamba Mwene Mpandashilanga.”