2 Kolinte 1 - Kulimama Kwakupya

¹ Ami Paulu, ntumwana wa Yeshu Kilishitu kuya na shifungo sha Nyambi. Nili hamo na kawushinda wetu Timoteo. Tukutikitila ku litengo lya Nyambi lili mu Kolinte, hamo na bakakuyela nimwabo bali mu Akaya.

² Mwanga Nyambi Tatiyetu na Mwene Yeshu Kilishitu bamipane nceshe na kumwena.

Paulu ukukambilila kuli Nyambi

³ Tuyemeze Nyambi Tata Mwene wetu Yeshu Kilishitu. Tata nceshe nimwazo, na Nyambi wa kubengezeka nimwako!

⁴ Nyambi ukutubengezeka mu makalikiza etu nimwawo, ngayi nehe niye akutubengezeka, ngayi netu kami tubengezeke baminetu bali mu makalikiza amina.

⁵ Ndaba nehi tukuyuvwa makando amengi hamo na Kilishitu, nahiyo kami kubengezeka kwetu kami kukuhanya na Kilishitu.

⁶ Hinga ndi tukuyandishiwa, ngayi enu mukabengezekiwa na kutambula ngovu za kukulupila oho mukutambula makando owo twatambwile netu.

⁷ Kulumbeza kwetu kukwenu kukushuma. Tukulimuka ngayi nehi mukutambula makando hamo netu, nahiyo mukatambula kubengezeka kami hamo netu.

⁸ Pe bawushinda, tukushinga ngayi mulimuke makando twawanine mu litunga lya Esha, ngayi engile amanene shikuma kupitakana ngovu zetu, twalehele kulumbeza kwa wumi.

⁹ Etu twahanganikile ngayi twatambula kuyata kwa kufwa. Ebye byatendiwile ngayi hinga tulikulupila etu bamwine, ngoboni tukulupile muli Nyambi ou ukushangula bafu.

¹⁰ Niye watupulwisha ku kufwa kwakunene kwa nahiyo, pe kami ukutupulwisha. Tukukulupila kami ngayi ukatupulwisha kumbili.

¹¹ Enu kami mulikwatashane netu ha kutulombelela. Pe bantu babengi bakakambilila kuli Nyambi ndaba yetu, ndaba ya byuma ebye anatutendele mu nceshe zendi.

Bihanganiko bya Paulu bikufutuka

¹² Shuma tukuwahilila nasho tuhu ndaba shikeketima shetu shikupaka nyendelo yetu mu litunga, shinene kukwenu, nyendelo yetu yengile yakuyela nakubula nyanco. Shekalile noho kaliha ndaba yakukeya kwa bantu, ngoboni na nceshe za Nyambi.

¹³ Nikumitikitila byuma ebye mukutwesha kulaba na kuyuvwishisha. Kami nikukulupila ngayi,

¹⁴ nehi enu bamina mukuyuvwishisha shashishe, mwakayuvwishisha ha Mutena wa Mwene Yeshu mukenga bakuwahilila ndaba yetu, nehi etu tukuwahilila ndaba yenu.

¹⁵ Ndaba napwishile mu bihanganiko byami ngayi nafwanini kutatika kwiza na kumizingula oko. Nashingile ngayi mutambule shitandalisho sha wubili.

¹⁶ Nawahishile mukala wami ngayi nipite kukwenu hakuya ku Mashendoniya na hakuboka kami kufuma ku Mashendoniya. Nashingile ngayi hakutenda noho mwanga mukanyavwe ha mukala wami wakuya ku Yundeya.

¹⁷ Kati oho nahanganikile nahiyo, enu mukuhanganika ngayi natendele ebye na ngana za wanuke ndi? Hinga byuma nikuhanganika nikubihanganika na wuntu, nambe ngayi, “Ingoi, ingoi,” hinga ndi “Byo, byo” ha shikati shimo ndi?

¹⁸ Ngoboni nehi Nyambi enga wakupwisha, lizu lyetu kukwenu kaliha “Ingoi” na “Byo.”

¹⁹ Ndaba Yeshu Kilishitu Mwana Nyambi, ou ami na Shilashi na Timoteo twashimikilile kukwenu, kaliha wengile “Ingoi” hinga ndi “Byo.” Ha shikati shimo, shikati nimwasho wengile “Ingoi” wa Nyambi,

²⁰ ndaba Yeshu niye “Ingoi” ha mutuntu, ou nalete bikulupisho bya Nyambi. Nibyo tukwambila muli Yeshu ngayi, “Ameni” mu kuyemeza Nyambi.

²¹ Wuluno Nyambi niye unatushumishi hamo nenu muli Kilishitu. Niye watuwabishile,

²² na kuyaka shilimukisho kukwetu na kutupana Moyo Wakuyela.

²³ Nyambi paki yami, oho nabulile kwiza oko ku Kolinte kutina nimiyuvwisha lisheni.

²⁴ Kaliha ngayi twinge bakubusha kukulupila kwenu, ndaba mukwimana mu kukulupila, shinene tukushinga kulikwatashana hamo ngayi mwinge bakuwahilila.