1 Yowano 3 - Kulimama Kwakupya

Bana ba Nyambi

¹ Monenu shishemo osho Tate atuhakile nasho shanahiti, ngayi tutumbiwe bana ba Nyambi, nohobene litunga likubula kutulimuka, ndaba kaliha lyamulimukile.

² Bakakuhakiwa, wuluno tuli bana ba Nyambi, kami shilolo shimoneke eshe tukenga, ngoboni tukulimuka ngayi oho niye, ndaba tukamumona nehi ekala.

³ Kami muntu nimwendi uli na kulumbeza oku mumwendi, ukuliyelesha niye mwine nehi niye wakuyela.

⁴ Nimwendi ukutenda wubi ukukiluka ndayano kami, ndaba wubi wenga kukiluka kwa ndayano.

⁵ Mukulimuka ngayi niye waholokele ngayi afumishe wubi wetu, kami mumwendi mowa wubi.

⁶ Nimwendi ukwikala mumwendi kutendanga wubi wufwako, nimwendi ukutendanga wubi, wufwako kumumona, hinga kumulimuka.

⁷ Bana bami babashe, hinga amyongeza muntu umo! Ou ukutenda kwoloka wenga wakwoloka, nehi niye wakwoloka.

⁸ Ou ukutenda wubi, wenga wa Shatana, ndaba Shatana watendanga wubi kufuma ku kutatika. Ndaba yaneshe Mwana Nyambi waholokele ngayi anongeshe milimo ya Shatana.

⁹ Nimwendi unahemuwu kuli Nyambi, wufwako kutendanga wubi, ndaba mbuto yendi ikwikala mumwendi, na niye kutwesha wufwako kutendanga wubi, ndaba unahemuwu kuli Nyambi.

¹⁰ Mu nisho bana ba Nyambi bakumoneka na bana ba Shatana, nimwendi ukubula kutenda kwoloka, kaliha wa Nyambi, hinga ou ukubula kuhaka kawushinda wendi.

Lihakenu umo na wamina

¹¹ Ndaba nisho shambo twayuvwile kufuma ku kutatika, ngayi tukufwanina kulihaka umo na wamina.

¹² Kaliha ngo Kaina ou wengile wa Mukawubi, wazihile kawushinda wendi. Ndaba ngani amuzihile? Ndaba milimo yendi yayibi na ya mukonzowendi yengile yayiwahe.

¹³ Hinga mukomoka, bawushinda wami, ndi litunga likumizimba.

¹⁴ Tukulimuka ngayi tunapiti kufuma ku kufwa kuleta ku wumi, ndaba tukuhaka bawushinda. Ou ukubula kuhaka kawushinda wendi ukwikala mu kufwa.

¹⁵ Nimwendi ukuzimba kawushinda wendi ukwinga mukakuziha, kami mukulimuka ngayi kowa mukakuziha uli na wumi wa mwayile myaka ha kwikala mumwendi.

¹⁶ Na neshe tukutosha shishemo sha Nyambi ndaba watulile wumi wendi hanci ndaba yetu, nanetu tukufwanina kutula wumi wetu hanci ndaba ya bawushinda.

¹⁷ Ngoboni nimwendi uli na wuheti wa litunga lino, amona kawushinda wendi hinga abula, pe ukukaluhisha mutima wendi kukwendi, kati shishemo sha Nyambi shikwikala nahiti mumwendi?

¹⁸ Bana bami babashe, hinga tuhaka na lizu, hinga na lulimi, ngoboni na mulimo na kupwisha.

Kukanca ku meho a Nyambi

¹⁹ Na neshe tukulimuka ngayi tukwinga bakupwisha, kami tukakashula mitima yetu ku meho endi.

²⁰ Ndaba ndi mutima wetu ukutunyanca, Nyambi wamunene ukupitakana mitima yetu, kami ukulimuka byuma nimwabyo.

²¹ Bakakuhakiwa, ndi mutima wetu wufwako kutunyanca, pe tuli na nkanca kuli Nyambi.

²² Kami nimwasho tukulombela, tukushitambula kukwendi, ndaba tukuholeka ndayano zendi na kutenda byuma ebye bikuwahililisha ku meho endi.

²³ Kami eshe shenga ndayano zendi, ngayi tukulupile ku lizina lya Mwanendi Yeshu Kilishitu na kulihaka umo na wamina, nehi atupanine ndayano.

²⁴ Kami ou ukuholeka ndayano zendi ukwikala mumwendi, naniye mumwendi. Na neshe tukulimuka ngayi ukwikala mumwetu na Moyo ou anapana kukwetu.