1 Timoteo 4 - Kulimama Kwakupya

Balongeshi ba mahalo

¹ Moyo Wakuyela ukwamba shintwantwa ngayi, ha bikati bya kukotoka, bantu bamo bakafuma ku kukulupila, bakwombatala myoyo ya kwongeza na kukonka kulongesha kwa mayimbwe.

² Bilongesha byanehi bikufuma ku balongeshi ba mahalo, shikeketima shabo shinafu, ngo shinahokeshiwi na shondo sha mundilo.

³ Bantu aba bakulongesha ngayi wunengi wubi kuyeka na kuhatanga byakulya. Ngoboni Nyambi wabilengele ngayi bakakukulupila na naba banalimuku kupwisha, babilye na kukambilila kuli Nyambi.

⁴ Shuma nimwasho shiya alengele Nyambi shenga shashiwahe, kowa shuma shakufwanina muntu kuhata, ngoboni shuma nimwasho shikufwanina kutambuliwa na malombelo.

⁵ Ndaba shikuyeleshiwa na lizu lya Nyambi na malombelo.

Mukamulimo wamuwahe wa Kilishitu Yeshu

⁶ Ndi ukafundiziza bakakukulupila byuma ebye, ukenga mukamulimo wamuwahe wa Kilishitu Yeshu ukuleliwa na mazu a kukulupila na bilongesha byakupwisha, oku unalama.

⁷ Ngoboni kana tushimpu twakubula Wunyambi, ngonehe batukulukazi ba bakazi bambanga, shinene linzilishe kuyoya Wunyambi.

⁸ Ndaba kutenda milimo ya kushumisha bimamo bya lutu kukuyavwa, ngoboni kutenda bya moyo bilinakuyavwa mu nzila nimwayo ukukulupisha bya wuluno na bya kumbili.

⁹ Eshe shambo shakupwisha, shikufwanina kutambuliwa ku nimwabo.

¹⁰ Nohobene etu tukukalamana na kutambula makendu, ndaba tukukulupila muli Nyambi wakuyoya, niye Mulamwini wa bantu nimwabo, shinene wabo bakukulupila.

¹¹ Bapanike na kubalongeshi eze ndayano.

¹² Hinga witabila ngayi muntu umo ukuyinisha ndaba ushili ndumbana, ngoboni winge shihembwilizo ku bakakukulupila mu nyambilo na mu nyinkalo na mu shishemo na mu moyo na mu kukulupila na mukuyela.

¹³ Hantu nakeza, uzundamine mu kulabila bantu mazu a Nyambi, kubashimikila na kulongesha.

¹⁴ Hinga uyinisha shishemo sha moyo shili mumwobe, eshe shapanikiwile kukwobe oho bambile bamiluwe na bakulwane ba litengo oho bakukambikile maboko.

¹⁵ Tenda byuma ebye, pe ulipanike kukwabyo, ngayi bantu nimwabo bamone kukula kwa mulimo wobe wakushimikila.

¹⁶ Ulilame shiwahe obe mwine na kulama ebye ukulongesha, uzamine kutenda byuma ebye, ndaba ndi obe ukutenda noho, ukalipulwisha na bantu bakuyuvwa.