1 Timoteo 3 - Kulimama Kwakupya

¹ Eshe shambo shinengi shakupwisha, ndi muntu ukushinga mulimo wa kutwaminina litengo ukushinga mulimo wawuwahe.

² Nohobene mukakutwaminina mu litengo ukufwanina kwinga mukakubula nyanco, mulume wa mukazi umo, mukakulizilikila, mukakushangama, mukamwombela, mukakukobelela bayeni, atweshe kulongesha,

³ kaliha mukakukolwa, kaliha mukamangunga, ngoboni wakubomba na kumwena, kaliha wafwanini kwinga wa kuhaka mali,

⁴ ntwamina wafwanina kulela bakalihumo lyendi shiwahe, na kufutula bana bendi kwombatala na kumupana maleema nimwawo.

⁵ Ndaba ndi muntu wufwako kulimuka kulela lihumo lyendi, pe ukalela nahiti litengo lya Nyambi?

⁶ Kaliha mukakwitabila wuluno, kutina alikatula na kuliyemeza na kuwa ku kuyata kwa Shatana.

⁷ Kami ukufwanina kwikala na mpupo yayiwahe ku bantu ba hamunkanda, kutina bamunyanca na kuwila mu shibulo sha Shatana.

Bakakutwaminina mu litengo

⁸ Bakakuyavwa mu litengo banafwanini kami kwinga banyinkalo yayiwahe, bakukulupiliwa, kaliha benga bakakukolwa, hinge ba mutongo wa mali,

⁹ banafwanini kwinga bantu bakulama ncimpi za kukulupila.

¹⁰ Bakufwanina kwezekiwa taha, ndi banapiti mukwezekiwa, pe nibo banafwanini kutenda mulimo.

¹¹ Nahiyo kami bakazi babo banafwanini kwinga ba maleema, kaliha bakakutungula, banafwanini kwinga bakubomba na kupwisha mu byuma nimwabyo.

¹² Mukakuyavwa mu litengo enge mulume wa mukazi umo na kulela shiwahe bana bendi, na kulela lihumo lyendi shiwahe.

¹³ Bakakuyavwa bakutenda mulimo wabo shiwahe bakaliwanina kwimana kwakuwahe, kami bakatwesha kwamba na kukanca ha kukulupila kwabo muli Kilishitu Yeshu.

Ncimpi zazinene

¹⁴ Oho nikutikita elye lin̄wati kukwobe, nikulumbeza kwiza na kukumona wanguwangu.

¹⁵ Ngoboni ndi nikwihala, lin̄wati elye likamitongweza eshe bantu bafwanina kwikala mu Litala lya Nyambi, elye linengi litengo lya Nyambi wakuyoya, niyo mpangwa na mwimbi wakupwisha.

¹⁶ Mwashikuma, kowa muntu ukatwesha kukanangana ha wunene wa ncimpi za Wunyambi wetu! Nyambi waholokele mu shifwekesha sha wuntu, Moyo Wakuyela wapakile ngayi wakwoloka. Mangeloyi* bamumonene. Washimikiwile ku bantu nimwabo, bantu ba muno mu kaye bamukulupilile, pe watwaliwile muyilu mu wuwahe.