1 Timoteo 1 - Kulimama Kwakupya

¹ Lin̄wati elye likufuma kuli Paulu ntumwana wa Yeshu Kilishitu mu shifungo sha Nyambi Mupulwishi wetu na Yeshu Kilishitu, kami niye ou nengi kulumbeza kwetu.

² Nikutikitila elye lin̄wati Kuli Timoteo, mwanami wakupwisha mu kukulupila. Nyambi Tate na Yeshu Kilishitu Mwene wetu mwanga bakupane nceshe na shikeketima na kumwena.

Kushiwulula kwa kulongesha kwa mahalo

³ Oho nayilenga ku Mashendoniya, ngonehe shiya nakukandikizile kwikala mu Efweshe, ndaba kuli bantu bamo kuyo balinakulongesha bya mahalo, pe nikushinga ngayi obe ubakanishe.

⁴ Batongweze ngayi balehe tushimpu na kushingishisha muhoko wa mazina a bankaka zabo, ndaba ebye bikuleta tuhu nkani, kaliha bikuyavwa muntu kuzikisha mu Wunyambi, oku kuli mu kukulupila.

⁵ Bihanganiko byami ha ndayano eze binengi kupindula shishemo shiya shikufuma mu mutima wakuyela na shikeketima shashiwahe na kukulupila kwakubula shishweka.

⁶ Bantu bamo banashanuku ku byuma ebye, banakonko nkani zakubula kuyavwa.

⁷ Bakushinga kwinga balongeshi ba ndayano za Nyambi, ngoboni nibo bafwako kuyuvwishisha mazu bakuliyavwisha hinge ebye bakushinga kulimuka.

⁸ Tukulimuka ngayi ndayano zinengi zaziwahe, ndi muntu ukutenda shazo mu nzila yakufwanina.

⁹ Shuma tukufwanina kuyuvwishisha ngayi, ndayano kaliha zatendiwila bantu bakwoloka, ngoboni ndaba ya bakakukiluka ndayano na bakamashewinizi, bantu bakawubi bakakubula kulemesha Nyambi bantu bakakuziha batati zabo, bamandi zabo, hinge bakakuziha bantu bamina.

¹⁰ Ndayano zatendiwila bakalinyawe, bakakulibipisha na baminabo balume na bakakuyiba batwanuke na bakakwongeza na bakakupaka mahalo hinge aba bakutenda shamina shashenge sha kulwisha kulongesha kwakupwisha.

¹¹ Kulongesha kwakupwisha kuyo kwawaniwile mu ncango zaziwahe zikwamba bya wuwahe na mfuywezi za Nyambi, ezi ampanikile.

Kukambilila ha nceshe za Nyambi

¹² Nikukambilila kuli Kilishitu Yeshu Mwene wetu, ou unantwesheshe mu nou mulimo. Nikumukambilila ha kundabila wakupwisha na kumpana mulimo wakumutendela.

¹³ Hinge ngayi mwaka nengile mukakumuhandula na kumuyandisha na kumutukana, ngoboni Nyambi wekalile na nceshe kukwami, ndaba nabitendele mu wulube, kami nengile wakubula kukulupila.

¹⁴ Mwene wetu Yeshu Kilishitu wekalile na nceshe zazingi zahanyinine shikuma hahami, pe wampanikile kukulupila na shishemo ebye byekalile mumwendi.

¹⁵ Shambo eshe shenga shakupwisha, shikufwanina kutambuliwa ku bantu nimwabo na kukulupila ngayi Kilishitu Yeshu wezile hano hanci mukupulwisha bakawubi, kami mukati kabo nili wamubi kubapitakana.

¹⁶ Ngoboni Nyambi wekalile na nceshe nanami mukawubi wakubapitakana ngayi Yeshu Kilishitu amoneshe lunzewe lwendi nimwalwo ashingile, ngayi ami ninge mwanza kukwabo bakamukulupila ngayi bakatambule wumi wa mwayile myaka.

¹⁷ Kuli Mwene wa mwayile myaka, wakubula kufwa, wakubula kumoneka, Nyambi umo pele, kukwendi kwikale maleema na wuwahe wa mwayile myaka! Ameni.

¹⁸ Timoteo mwanami, nikupanika ndayano eze kwezekesha nanashe bambile bamiluwe mwaka hahobe. Liyavwishe mazu awa ngayi enge bilwisho mwanga wulwe shiwahe.

¹⁹ Lama kukulupila kwobe na shikeketima shashiwahe. Bantu bamo banakwanga kuyuvwilila ku shikeketima shabo kami banalobeshe kukulupila kwabo.

²⁰ Hakati kabo hali Hemaniya na Alekizanda, aba nibo napanine kuli Shatana ngayi balilongeshe kuleha kuhandula Nyambi.