1 Teshalonika 5 - Kulimama Kwakupya

Liwahishilenu kwiza kwa Mwene

¹ Bawushinda, kaliha nafwanini kumitikitila ha bya bikati na matena oho kukatendiwa ebye nimwabyo.

² Ndaba enu bamwine mukulimuka shiwahewahe ngayi Mutena wa Mwene ukeza ngonehe ezanga mwizi wushiku.

³ Ndaba oho bantu bakamba ngayi, “Kuli kumwena, kami nimwabyo bili shiwahe,” byakulobesha bikabashintikiza ngonehe kukola kuya kwezilanga mbuyama ha shikati sha kushampuluka, pe kukapanza bafwako.

⁴ Ngoboni enu, bawushinda kaliha muli mu mincimpwe ngayi mutena uyo ukamibazumune ngonehe mwizi.

⁵ Enu nimwenu muli bantu bakundama ku lumuni, muli baya bakundama ku mutena. Kaliha tuli ba ka wushiku hinge ba ka mincimpwe.

⁶ Nohobene hinga tulala tulo ngonehe bakwinga bamina, ngoboni tutone na kushangama.

⁷ Ndaba bakakulangana, balangananga wushiku, kami bakakukolwa, bakolwanga wushiku.

⁸ Ngoboni ndaba etu tuli ba ka mutena, tunafwanini kulilama na kuvwala kukulupila na shishemo, ngayi shiyinge shivwalo shetu sha ha kapumpo, pe kulumbeza kwa kulamwina yiyinge niyo hoshi yetu.

⁹ Ndaba Nyambi kaliha watuhatile ngayi tukayande ku wukali wendi, ngoboni ngayi tutambule kulamwina muli Mwene wetu Yeshu Kilishitu,

¹⁰ niye watufwilile ngayi hinge ndi tushilikuyoya, hinge ndi tukufwa, mwanga tukayoye hamo nendi.

¹¹ Nohobene lishumankanishenu umo na wamina na kuliyavwa umo na wamina, ngonehe mulinakwinga ha shikati shino.

Mazu a mamaninino na kushangwisha

¹² Kami tukuminyepa bawushinda ngayi mupane maleema aba bakutenda milimo mukati kenu, baya bali hayilu yenu muli Mwene, baya balinakumilongesha.

¹³ Bapanenu maleema shikuma na shishemo ndaba ya mulimo wabo. Ikalenu na kumwena mukati kenu.

¹⁴ Wuluno tukumikowamina bawushinda, shiwululenu bakamashewinizi, shumishenu bakakubota mu mitima, yavwenu bakakupopa, ikalenu na lunzewe ku bantu nimwabo.

¹⁵ Keyenu ngayi kubule muntu wakubokesha wubi na wubi, ngoboni bikati nimwabyo tendenu byabiwahe mukati kenu na ku bantu nimwabo.

¹⁶ Wahililenu shikati nimwasho,

¹⁷ lombelenu na kubula kuleha,

¹⁸ kambililenu mu byuma nimwabyo, ndaba eshe nisho shifungo sha Nyambi hahenu muli Kilishitu Yeshu.

¹⁹ Hinga muzima mundilo wa Moyo Wakuyela,

²⁰ hinga mukenda biya anahololo Nyambi muli muluwe.

²¹ Ezekenu byuma nimwabyo, kakatilenu ku byuma byabiwahe,

²² bengukenu ku byuma nimwabyo byabibi.

²³ Nyambi wa kumwena niye mwine amiyeleshe shwe. Mwanga moyo wenu nimwawo na mutima na lutu, bikale na kubula shihepwa kutwala hakwiza kwa Mwene wetu Yeshu Kilishitu.

²⁴ Niye unamihana wakupwisha, pe ukatenda ebye anamihanini.

²⁵ Bawushinda, tulombelelenu nanetu.

²⁶ Shangwishenu bakakukulupila nimwabo na kuzupeza kwakuyela.

²⁷ Nikuminyepa na ngovu za Mwene ngayi elye lin̄wati lilabiwe ku bakakukulupila nimwabo.

²⁸ Nceshe za Mwene wetu Yeshu Kilishitu zikale nenu.