1 Teshalonika 1 - Kulimama Kwakupya

¹ Ami Paulu na Shilashi na Timoteo, tukutikitila ku bantu ba ku litengo lya mu Teshalonika lili muli Nyambi Tate na muli Mwene Yeshu Kilishitu. Mwanga mwikale na nceshe na kumwena.

Wumi na kukulupila kwa Bakateshalonika

² Twakambililanga kuli Nyambi shikati nimwasho ndaba yanenu nimwenu, twamitoyanga mu malombelo etu shikati nimwasho.

³ Twanukanga mulimo wenu wa kukulupila na kukalamana kwenu kwa shishemo na lunzewe lwenu lwa kulumbeza muli Mwene wetu Yeshu Kilishitu.

⁴ Bawushinda, hitulimuka ngayi Nyambi wamihaka, kami unamihata.

⁵ Ndaba ncango zaziwahe ezi twaletele kukwenu kaliha zengile za lizu lyanahiya, ngoboni lyezile na ngovu na Moyo Wakuyela na kuyuvwanika kwakwinzala. Mukulimuka eshi twayoyele mukati kenu ndaba yanenu.

⁶ Nanenu mwafutukile kwinga bakakukonka etu na Mwene, hinge ndi mwatambwile lizu hinga mwekala mu makalikiza amanene, mwengile bakuwahilila mu Moyo Wakuyela.

⁷ Pe, mwengile shihembwilizo ku nimwabo bakakukulupila mu Mashendoniya na mu Akaya.

⁸ Ndaba kukwenu kaliha kwafumine tuhu ncungumina ya lizu lya Mwene lyayile mu Mashendoniya na Akaya, ngoboni na kukulupila kwenu muli Nyambi kunatumbalala ku zimbalila nimwazo, nohobene kowa shuma shamina tukufwanina kwamba.

⁹ Ndaba bantu nimwabo bakwamba eshi mwatutambwile oho twezile kukwenu naneshi mwatengulukilile kuli Nyambi oho mwafumine ku tunankishi ngayi mwinge bakamilimo ba Nyambi wakuyoya na kupwisha,

¹⁰ ngayi mutatilile Mwanendi ou ukafuma kuyilu, uya ashangwile ku bafu, niye Yeshu ou ukutulamwina ku wukali ukeza.