1 Pita 1 - Kulimama Kwakupya

¹ Ami Pita, ntumwana wa Yeshu Kilishitu. Nikutikitila lin̄wati elye kukwenu bakuhatiwa kuli Nyambi banapanzana kwinga bayeni mu litunga lya Pontashi na Ngalatiya na Kapandoshiya na Esha na Mbitiniya.

² Nyambi Tate wamihatile ngonehe ahanganikile ngayi Moyo Wakuyela umiyeleshe, ngayi mwombatale Yeshu Kilishitu na kuyoweshiwa na mukeza wendi.

³ Tuyemezenu Nyambi na Tata Mwene wetu Yeshu Kilishitu! Ou mu nceshe zendi za kuhanya, ha kushangula Yeshu Kilishitu unatupana wumi wawupya na kulumbeza mumwetu,

⁴ Nyambi unamiholekele muyilu likona lyakubula kubola, hinge kubipa, hinge kubundala.

⁵ Enu mukulamiwa na ngovu za Nyambi ndaba ya kukulupila, hantu kupuluka kuya kunawahishiwi mwaka kunaholoko ha shikati shakukotoka.

⁶ Wahililenu mu byuma ebye, hinge ngayi ha shikati shashishe mukapita mu byezeko byabingibingi.

⁷ Ebye binezi ngayi kukulupila kwenu kuya kunapitakana ngolinde iya yalobanga hinge ndi yinayeleshiwi mu mundilo, nohobene kukulupila kwenu kwinge kwakupwisha, mwanga enu mukatambule kuyemeziwa na maleema oho Yeshu Kilishitu akaholoka.

⁸ Yeshu ou mukuhaka hinge ndi munabulu kumumona shikati shino, munamukulupili, kami mukuwahilila na kutangala shikuma.

⁹ Pe mukutambula ncungu ya kukulupila kwenu, niko kupuluka kwa myoyo yenu.

¹⁰ Bamiluwe balubulwile bya nceshe eze zinamizili, bashingishishile na kuyipwiziza bya kupuluka oku.

¹¹ Moyo wa Kilishitu ou wekalile mumwabo watoyele bya makando a Kilishitu na wuwahe uya ukamukonka. Bamiluwe bashingile kulimuka ngayi byuma ebye bikatendiwa shikati ngani kami bikekala nahiti.

¹² Nyambi wabalubwilile ngayi milimo yabo, kaliha ya nibo bamwine, ngoboni ya kutendela enu, nibo bambile byakupwisha ebye munayuvwu wuluno. Bengile bakakushimikila ncango zaziwahe na ngovu za Moyo Wakuyela watumiwile kufuma kuyilu, hinge mangeloyi nanibo bakushinga kulimuka ebye byuma.

Ikalenu bakuyela mitima

¹³ Nohobene mitima yenu ilibalakanye. Mushangame na kulumbezela shikuma nceshe za Nyambi oho Yeshu Kilishitu akaholoka.

¹⁴ Ikalenu nehe bana bakwombatala, hinga kami mubokela ku byuma bya mwaka mwatendelenga mu wulube.

¹⁵ Ngoboni ngonehe Nyambi ou wamihanine wenga wakuyela, nahiyo kami nanenu ingenu bakakuyela mu biheka nimwabyo.

¹⁶ Ndaba kwatikitiwa ngayi, “Ingenu bakakuyela, ndaba ami nili wakuyela.”

¹⁷ Nyambi shihota ufwasho, niye ukuyata muntu kwezekesha na ntendelo yendi ndi mukumwihana ngayi Tate oho mukulombela, pe mutendelenu milimo na bowa oho mushili muno mu kaye.

¹⁸ Mukulimuka shiwahe shuma eshe bamikulizile nasho ku nyinkalo yenu yowa mwatambwile ku bankaka zenu, kaliha wamikuliza na byuma byakubola byakufweka nehe shiliva na ngolinde.

¹⁹ Ngoboni na mukeza wa ndando yayinene wa Kilishitu, owu wengile ngo mwana mbelele wakubula mulandu na libala.

²⁰ Mwashikuma Nyambi wamwimikile mwaka oho kaye shilolo kalengiwe, ngoboni waholokele ha bikati byakukotoka ndaba yanenu.

²¹ Kupitila mumwendi mukukulupila muli Nyambi, ou wamushangwile ku bafu, kami wamupanine wuwahe, nohobene kukulupila na kulumbeza kwenu bili muli Nyambi.

²² Ndaba munayeleshe mitima yenu ha kwombatala kupwisha, haya lihakenu na shishemo shakubula shishweka ku bawushinda bakakukulupila, monenu ngayi munalihaka umo na wamina na mutima wakuyela.

²³ Ndaba munahemuwu kabili, kaliha ku mbuto yakubola ngoboni ku mbuto yakubula kubola. Mbuto eyeyinengi lizu lya Nyambi likuyoya na kwikala mwaka nimwawo.

²⁴ Nehi kwatikitiwa ngayi, “Muntu nimwendi ukufweka ngo mwila, kami wuwahe wendi nimwawo wenga ngo ntemo za mwila. Mwila walebukanga, na ntemo zawo zapulumukanga.

²⁵ Ngoboni lizu lya Mwene lyekala mwayile myaka.” Elye lizu nizo ncango zaziwahe zashimikiwile kukwenu.