1 Kolinte 9 - Kulimama Kwakupya

Biya anafwanini kutenda ntumwana

¹ Kati kaliha nashoboloko ndi? Kati kaliha nili ntumwana ndi? Kati kaliha namonene Yeshu Mwene wetu ndi? Kati enu kaliha muli mikabo yami muli Mwene ndi?

² Hinge ndi bamo kuntambula ngayi nili ntumwana bafwako, ngoboni mwashikuma kukwenu nili ntumwana. Ndaba wumi wenu muli Kilishitu ukumpaka ngayi nili ntumwana.

³ Ebye nibyo nakumbula bantu bakunyipwiziza.

⁴ Kati kaliha ninafwanini kupanikiwa byakulya na byakunwa ndi?

⁵ Kati kaliha binatufwanini kutenda ngonehe bakutenda baminetu bantumwana, ngonehe bawushinda muli Mwene hamo na Pita, kwendanga na bakazetu bakakukulupila ha mikala ndi?

⁶ Kati ami na Mbanambashi etu tuhu tunafwanini kutenda milimo ya maboko ngayi tuwane kuliyoyesha ndi?

⁷ Kati kuli kanzita ukulishingila bya kuliyavwa nabyo ndi? Kati kuli ukukuna mfuba ya shinyanca ukubula kulya ku mikabo yayo ndi? Hinge ndi yani ukulisha mbelele wakubula kunwako mahwe?

⁸ Kati nikwamba ebye na ngana za wuntu ndi? Kati Ndayano za Moshesha zifwako kwamba byambo bimo ndi?

⁹ Ndaba kwatikitiwa mu Ndayano za Moshesha ngayi, “Hinga ufwika kanwa ka pulu oho ukuliyavwishayo ha kupula mayila.” Kati Nyambi oho anamba ebye ukulifulankana tuhu bya mapulu ndi?

¹⁰ Kati wufwako kwamba ebye ndaba yanetu ndi? Mwashikuma byatikitiwila etu. Ndaba muntu ukulima na nou ukuteza bakutenda mulimo wabo na kulumbeza ngayi bakatambule shitapilo kunebye bakateza.

¹¹ Ndi etu twakunine kukwenu byuma bya moyo, kati tufwako kutwesha kuteza kukwenu byuma bya kuliyavwisha nabyo ndi?

¹² Ndi bamina bakutwesha kutambula kukwenu byuma, kati etu kaliha tunafwanini kubapitakana ndi? Ngoboni kuliyavwisha ebye binatufwanini tufwako. Nohobene, tunetabili byuma nimwabyo kutina tushinkila ncango zaziwahe za Kilishitu.

¹³ Kati kulimuka mufwako ngayi bakakutenda milimo mu Litala lya Nyambi, balyanga byakulya bya muyo mu Litala? Pe na bakukombelela zinkombela ha shihanda batambulanga shitapilo sha ha shihanda.

¹⁴ Nohobene Mwene wambile ngayi aba bakushimikila ncango zaziwahe, banafwanini kuwana bya kubayoyesha ku mulimo wakushimikila ncango zaziwahe.

¹⁵ Ngoboni ami shilolo niliyavwishe ngovu eze zinafwanini kami kaliha ni kutikita byuma ebye ngayi mwanga muntendelebyo. Shashiwahe kukwami ngayi nifwe kupitakana ngayi muntu wamina amanishe kuliyemeza kwami.

¹⁶ Oho nikushimikila ncango zaziwahe, nifwasho shuma sha kuliyemeza, ndaba Mwene niye wantongwezele. Makando kukwami ndi nikubula kushimikila eze ncango zaziwahe!

¹⁷ Ndaba ndi nikutenda ou mulimo na shifungo shami, nili na ncungu. Ngoboni nikutenda ou mulimo ndaba wunengi mulimo ou nafwanini kutenda ndaba Mwene wampanikilewo.

¹⁸ Haya ncungu yami yanahiti? Yinengi eye, ngayi oho nikushimikila ncango zaziwahe, nishimikile kwakubula ndando, ngayi nibule kutambula binamfwanini hakushimikila ncango zaziwahe.

¹⁹ Nili muntu wakushoboloka, kaliha nili ndungo wa muntu, ninalitende kwinga ndungo wa bantu nimwabo ngayi nikoke bantu babengi.

²⁰ Ku Bayunda nafutukile ngonehe Kayunda ngayi nikoke Bayunda. Hinge ngayi kaliha nili munceto ya Ndayano za Moshesha, ngoboni nengile ngo nili munceto ya ndayano, ngayi nikoke aba bali munceto ya ndayano.

²¹ Ku Bakamatunga, nengile ngonehe nibo, ngayi nibakoke. Kaliha ngayi nikubula kwombatala Nyambi, ndaba nili munceto ya ndayano za Kilishitu.

²² Ku bakakukulupila kwakushe, nengile ngonehe mukakukulupila kwakushe ngayi nikoke bakakukulupila kwakushe. Ku bantu nimwabo nengile ngonehe nibo ngayi ndi shikutwesheka nitweshe kupulwishako bamo.

²³ Nikutenda byuma ebye nimwabyo ndaba ya ncango zaziwahe ngayi nitambule hamo nabo shitapilo sha mfuywezi.

²⁴ Mwashikuma himulimuka ngayi bakakwituka benganga babengi, ngoboni umo tuhu niye watambulanga ncungu. Itukenu nahiyo ngayi mukatambule ncungu.

²⁵ Muntu nimwendi mukakwituka, walizilikilanga ku byuma nimwabyo. Bakutenda ebye ngayi batambule munana uya ukabola, ngoboni etu tukatambula munana wakubula kubola.

²⁶ Nohobene nikwituka nahiyo, nakubula nkani. Nikulwa nahiyo, kaliha ngonehe umo ukukama mu mpepo.

²⁷ Nikulama lutu lwami na kuluyinga ndungo yami, kutina ngayi oho nashimikili baminami, ami nikenge mukakuyumbiwa.