1 Kolinte 4 - Kulimama Kwakupya

Bantumwana ba Kilishitu

¹ Shashiwahe muntu atuhanganike ngayi tuli bakamilimo ba Kilishitu na bakamilimo bakulama ncimpi za Nyambi.

² Shuma shikushingiwa ku bakamilimo ngayi muntu awaniwe wakupwisha.

³ Ngoboni shinengi shuma shashishe shikuma ngayi ninyanciwe kukwenu, hinge kunyanciwa na muntu. Kami hinge amimwine kulinyanca nifwako.

⁴ Nifwawo mulandu kukwami, ngoboni hinge ndi shilinoho, kwamba nifwako ngayi nifwawo mulandu. Mwene niye ukanyanca.

⁵ Nohobene hinga muyata muntu, oho shikati shilolo shikume, tatililenu hantu Mwene unezi, ou ukaleta ha mwana byuma bya mincimpwe byaholekiwile, pe ukamonekesha bihanganiko bya mitima ya bantu, niho muntu nimwendi ukatambula kuli Nyambi kuyemeza kunamufwanini.

⁶ Bawushinda, byuma ebye ninamba binakundama kukwami na kuli Apoloshi. Nikushinga ngayi mulilongeshe kutontoloka kwa biya byatikitiwa ngayi, “Hinga wikala na bihanganiko bya kupitakana ebye byatikitiwa.” Ngayi mubule kuliyemeza hinge kulishepesha umo na wamina.

⁷ Kati yani unakwingi ngayi obe unatapuluku ku baminobe? Kami bishini ulinabyo ebye wabulile kupanikiwa? Haya ndi wabitambwile, ndabangani ukuliyemeza ngo ngayi kaliha byengile bishemo?

⁸ Kati muli na byuma nimwabyo ebye mukushinga ndi? Kati mwaheta kale ndi? Kati mwengakale bamyene kwakubula etu ndi? Mwashikuma nikushinga ngayi shinga mwengakale bamyene, ngayi nanetu kami twinge bamyene hamo nenu.

⁹ Ndaba nikuhanganika ngayi Nyambi unatuyaka ha kumoneka etu bantumwana ku mamaninino ngonehe bantu banayatiwili lufu. Ndaba tunatendiwi shimonekesho ku kaye nimwako, kaliha ku bantu tuhu ngoboni na ku mangeloyi.

¹⁰ Ndaba ya Kilishitu tukwinga bakuyeba, ngoboni enu mukwinga bakangana muli Kilishitu. Etu tuli bakupopa, ngoboni enu muli bakushuma. Enu mukutambula maleema, ngoboni etu tukunyanciwa.

¹¹ Kuleta ku shikati shino tuli na nzala na linyotwa, tuli na wuvu. Bantu bakutukama, kami munzi mwakwikala tufwawo.

¹² Tukukalamana na kutenda milimo na maboko etu ngayi tulilele. Bantu bakututukana, twalombanga ngayi Nyambi abatandalishe, hinge tukushushuliwa tukushumankana.

¹³ Oho bantu bakututungula, tukukumbula na mazu amawahe. Kukuma na shikati shino tunengi bakukendiwa hano hanci, kami tunengi ngonehe ncwashwa za muno mu kaye

¹⁴ Nikutikita byuma ebye, kaliha kumiyenesha ngoboni nikumishiwulula ngonehe bana bami bakuhakiwa.

¹⁵ Hinge muli na balongeshi bakubula kutwesha kulabiwa mukuyoya kwenu muli Kilishitu, mufwabo batatizenu babengi. Ndaba muli Kilishitu Yeshu ami nafutuku kwinga tatiyenu ha kumishimikila ncango zaziwahe.

¹⁶ Nohobene nikumilomba ngayi muhembwilize ami.

¹⁷ Ndaba yanebye nakutuma kukwenu Timoteo, mwanami nahaka, wakupwisha muli Mwene. Niye ukamyanukisha zinzila zami za muli Kilishitu, eze nikulongesha ku myanya nimwayo mu matengo nimwawo.

¹⁸ Wuluno bamo banatatiki kuliyemeza, ngo kukeza kukwenu nifwako.

¹⁹ Ngoboni ndi Mwene uketabila wuluno nikeza kukwenu, nikalimuka ebye bakwamba na ngovu eze balinazo.

²⁰ Ndaba Wene wa Nyambi kaliha kwamba tuhu, ngoboni ngovu.

²¹ Haya mukushinga bishini? Kati nikeze kukwenu na lunyanzi, hinge ndi mu shishemo na mutima wa kulilimbwilisha?