1 Kolinte 15 - Kulimama Kwakupya

Kushanguka kwa Kilishitu

¹ Haya bawushinda, nikushinga kumyanukisha ncango zaziwahe, ziya nashimikilile kukwenu kami mwazitambwile, pe niho hanemana kukulupila kwenu.

² Munapuluku naneze ncango, ndi mukukwatisha shikuma ku mazu aya nashimikilile kukwenu. Ndelewa, pe kowa ebye munakulupili.

³ Ndaba namipanikile ebye natambwile biya byabinene shikuma ngayi, Kilishitu wafwililile wubi wetu ngonehe kwatikitiwa,

⁴ ngayi wafundiwile, pe washangukile ha mutena wa wuhatu ngonehe kwatikitiwa,

⁵ pe walimonekeshele kuli Pita, niho kami ku balikumi na babili.

⁶ Munyima yanebye, walimonekeshele ha shikati shimo ku bawushinda bakupitakana myanda mutanu, babengi kukwabo bashilikuyoya, ngoboni bamo banalangana tulo.

⁷ Niho alimonekeshele kuli Yakoba, pe niho alimonekeshele ku bantumwana nimwabo.

⁸ Ku mamaninino walimonekeshele kami na kukwami, hinge ndi nili muntu wahemuwile ha shikati shakubula kufwanina.

⁹ Ndaba ami wamushe ku bantumwana, kaliha nafwanini kutoyiwa ngayi ntumwana, ndaba nayandishile litengo lya Nyambi.

¹⁰ Ngoboni na nceshe za Nyambi, nili ngonehe nili, kami nceshe ampanine kaliha zengile tuhu zanahiya, ngoboni ninatende milimo shikuma, kupitakana bantumwana nimwabo, hinge noho kaliha amimwine, ngoboni nceshe za Nyambi ziya zili nanami.

¹¹ Nohobene, hinge ndi ami, hinge ndi nibo, ebye nibyo tukushimikila, kami ebye nibyo munakulupili.

Kushanguka kwetu

¹² Haya ndi ncango zetu zikwamba ngayi Kilishitu washangukile ku bafu, pe bamo mukati kenu bakwamba nahiti ngayi kowa kushanguka ku bafu?

¹³ Ngoboni ndi kowa kushanguka ku bafu, pe shinga Kilishitu kaliha washangukile.

¹⁴ Kami ndi Kilishitu kaliha washangukile, pe ebye tukushimikila byowa, pe enu kami munakulupili byowa.

¹⁵ Shinene etu, pe tuli bapaki ba mahalo ba Nyambi, ndaba tunamba ngayi Nyambi washangwile Kilishitu, ou abulile kushangula, ndi mwashikuma ngayi bafu kushanguka bafwako.

¹⁶ Ndaba ndi bafu kushanguka bafwako, pe Kilishitu kaliha washangukile.

¹⁷ Kami ndi Kilishitu kaliha washangukile, pe kukulupila kwenu kwenga kowa, kami pe mushili mu wubi wenu.

¹⁸ Nohobene, na bya bakakukulupila banalangana tulo muli Kilishitu banalobo.

¹⁹ Ndi mu wumi wuno tuhu nimo tukulumbeza Kilishitu, pe tukukalikiza shikuma kupitakana bantu nimwabo.

²⁰ Ngoboni Kilishitu unashanguku ku bafu niye wa kutatika kushanguka ku baya nimwabo banalangana tulo twa lufu.

²¹ Ndaba nehi lufu lwezile na muntu umo, na kushanguka ku bafu kami kunezi na muntu umo.

²² Ndaba ngonehe bantu nimwabo bakufwa ndaba ya Andama, nahiyo kami muli Kilishitu bantu nimwabo bakashanguka.

²³ Ngoboni muntu nimwendi na nzila yendi. Kilishitu niye unatatiki, pe munyima oho Kilishitu akaboka, na Bakakilishitu bakashanguka.

²⁴ Niho kukeze kukotoka. Kilishitu ukamanisha wene nimwawo, na batulela nimwabo, na ngovu nimwazo, pe ukapanika Wene kuli Nyambi Tate.

²⁵ Ndaba Kilishitu ukufwanina kulela, hantu Nyambi nayaka bakankole bendi nimwabo kunceto ya mawulu endi.

²⁶ Lufu niye mukankole wa mamaninino kukulobeshiwa.

²⁷ Ndaba Nyambi unayaka byuma nimwabyo munceto ya mawulu endi. Haya oho kunambiwi ngayi byuma nimwabyo binayakiwi munceto yendi, kaliha ngayi na Nyambi uli munceto yendi, ndaba niye nayaka nimwabyo munceto ya Kilishitu.

²⁸ Pe oho byuma nimwabyo bikabomba kuli Kilishitu, pe na Mwana niye mwine ukalishisha kuli Nyambi ou wayakile byuma nimwabyo munceto yendi, ngayi Nyambi akalele ha byuma nimwabyo.

²⁹ Ndi kowa kushanguka, pe baya bakuzubilisha bantu ndaba ya bafu batendanga bishini? Ndi bafu kushanguka bafwako, bishini bakuzubilishiwa bantu ndaba ya bafu?

³⁰ Kami ndabangani etu tukwikala mu malamo shikati nimwasho?

³¹ Bawushinda wami, lufu nikwenda nalwo ha mutena na mutena. Nikwamba ebye ndaba yakupwisha na wuwahe ou nilinawo hahenu muli Kilishitu Yeshu.

³² Ndi byengile bihanganiko byanahiya bya bantu ngayi nilwe na twanzama ku Efweshe, pe nawanaho bishini? Ndi bafu kushanguka bafwako, pe ngonehe kwatikitiwa ngayi, “Tulye na kunwa, ndaba nzona tukafwa.”

³³ Hinga mwongeziwa, binzililo byabibi byabipishanga biheka byabiwahe.

³⁴ Bokenu ku bihanganiko byenu byabiwahe hinga mutenda wubi. Mukufwanina kwikala na lisheni, ndaba bantu bamina, kalimukisho ka Nyambi bafwako.

Kushanguka kwa lutu

³⁵ Ngoboni muntu wamina ukepula ngayi, “Bafu bakashanguka nahiti? Kami bakekala na lutu lwanahiti?”

³⁶ Obe muntu wakuyeba! Oho wakubanga mbuto mu limvu, kaliha yamenanga tuhu, ndele taha yinafu.

³⁷ Kami ebye wakubanga, lwenganga tuhu lupeka, kampe lwa loto hinga lwa mushobo wamina, kaliha lutu lwa mbuto iya yamenanga munyima.

³⁸ Ngoboni Nyambi wapananga lutu lwa uya mbuto ngonehe akushinga, mbuto nimwayo wayipananga lutu lwayo bene.

³⁹ Nyama ya nimwabyo bikuyoya kaliha yalifweka. Bantu bekala na nyama ya mushobo umo, tuyamana twekala na nyama ya mushobo washenge, tuyoni ya mushobo washenge, na zinci kami mushobo washenge.

⁴⁰ Kami kuzili zinyutu za kuyilu na zinyutu za mu litunga, ngoboni wuwahe wa zinyutu za kuyilu washenge kami wuwahe wa zinyutu za mu litunga washenge.

⁴¹ Mutena wekala na wuwahe wawo, na ngonda kami na wuwahe wendi, na nyenye na wuwahe wazo, kami hinge nizo nyenye zili na wuwahe wakulishiyashiya.

⁴² Nahiyo kami na kushanguka kwa bafu nisho kukekala. Lutu lukuvumbikiwa lwakubola, ngoboni oho lukashanguka lukenga lwakubula kubola.

⁴³ Lukuvumbikiwa hinga lwenga lwakubula maleema, lukashanguka hinga lwenga lwaluwahe. Lukuvumbikiwa hinga lwenga lwaluboto, ngoboni lukashanguka na ngovu.

⁴⁴ Lukuvumbikiwa hinga lwenga lutu lwa wuntu, ngoboni lukashanguka na lutu lwa moyo. Mwashikuma kwekala lutu lwa wuntu, nohobene nikoluli kami lutu lwa moyo.

⁴⁵ Kami kwatikitiwa ngayi, “Muntu wa kutatika Andama watendiwile moyo wakuyoya.” Pe Andama wa kukotoka ukenga moyo wakupana wumi.

⁴⁶ Bya moyo kaliha nibyo byezanga ha muntanzi, ngoboni bya nyama, munyima niho kwize bya moyo.

⁴⁷ Andama wa kutatika, wafumine ku lukungu lwa hanci, Andama wa wubili, wafumine muyilu.

⁴⁸ Ngoboni bahano hanci balifweka na uya wafumine hano hanci, nahiyo kami, aba ba muyilu bakalifweka na uya wafumine muyilu.

⁴⁹ Nehi twekalile na shifwekesha sha uya wahano hanci, nahiyo kami tukekala na shifwekesha sha uya wa muyilu.

⁵⁰ Wuluno nikwamba ebye bawushinda, ngayi nyama na mukeza kutwesha kukona Wene wa Nyambi bifwako, kami byakubola kutwesha kukona byakubula kubola bifwako.

⁵¹ Monenu nikumitongweza ncimpi, kukalangana nimwetu tufwako, ngoboni nimwetu tukafutuka,

⁵² wanguwangu, mukukopola kwa liho, ha ntolombita yakukotoka, ndaba mpandula yikavuma, na bafu bakashanguka nakubula kubola, nanetu tukafutuka.

⁵³ Ndaba shakubola eshe shikufwanina kuvwala shakubula kubola, kami shakufwa eshe shikufwanina kuvwala shakubula kufwa.

⁵⁴ Nohobene oho shakubola eshe shinavwala shakubula kubola, kami shakufwa eshe shinavwala shakubula kufwa, niho kukatendiwa shambo shatikitiwa ngayi, “Lufu lunaminiwi mu kukoma!”

⁵⁵ “Obe lufu, kuhuma kwobe kulikuti? Obe shinzimbi, kukoma kwobe kulikuti?”

⁵⁶ Kuhuma kwa lufu kwenga wubi, na ngovu za wubi zenga ndayano.

⁵⁷ Ngoboni nkushi kuli Nyambi, ou ukutupana kukoma na Mwene wetu Yeshu Kilishitu!

⁵⁸ Nohobene, bawushinda wami bakuhakiwa, shumenu nakubula kuhenya, nakuhanya mu mulimo wa Mwene mwaka nimwawo ndaba mukulimuka ngayi mulimo wenu kaliha wa ntalu muli Mwene.