1 Kolinte 12 - Kulimama Kwakupya

Bishemo bikufuma ku Moyo Wakuyela

¹ Wuluno ndaba ya bishemo bya Moyo, bawushinda, kushinga ngayi mwikale mu wulube nifwako.

² Mukulimuka ngayi oho mwengile Bakamatunga, mwatwaliwile mu zinzila za kushanwisha za kulemesha tunankishi twakubula kwamba.

³ Nohobene nikushinga muyuvwishishe ngayi kowa muntu unatwamininiwi na Moyo wa Nyambi ukutwesha kwamba ngayi, “Yeshu akutiwe,” kami kowa muntu ukutwesha kwamba ngayi, “Yeshu wenga Mwene,” ndele na Moyo Wakuyela.

⁴ Nikobili bishemo bya mishoboshobo, ngoboni Moyo umo.

⁵ Kami kuyili milimo ya mishoboshobo, ngoboni Mwene umo.

⁶ Kuzili zinzila zazingi za kutenda milimo, ngoboni Nyambi umo ukutenda nimwabyo mu nimwabo.

⁷ Ku muntu na muntu, kuholoka kwa Moyo kunamoneke mu nzila yamina ngayi mwanga wuwahe winge wabo nimwabo.

⁸ Ku muntu umo, Moyo wapanikanga lizu lya ngana, ku wamina ou Moyo umo wapanikanga lizu lya kalimukisho.

⁹ Ku wamina, ou Moyo umo wapanikanga kukulupila, pe ku wamina ou Moyo umo wapanikanga ngovu za kunyongomanisha.

¹⁰ Ku wamina wapanikanga kutenda bikomokesho, ku wamina kulubulula, ku wamina kulimukisha kutapuluka kwa bishemo bya Moyo na kwa myoyo yamina. Ku wamina wapanikanga kwamba zindimi za mishoboshobo, ku wamina wapanikanga kutontolola zindimi.

¹¹ Ngoboni Moyo umo wakulifweka, niye watendanga nimwabyo ebye, niye wapanikanga ngonehe akushinga ku muntu na muntu.

Lutu lumo na bimamo byabingi

¹² Ngonehe lutu lwenga lumo, hinge ndi luli na bimamo byabingi, biya bimamo nimwabyo bya lutu lumo hinge ndi byabingi, byenga bya lutu lumo. Nohobene na Kilishitu kami nisho ekala.

¹³ Ndaba nimwetu twazubilishiwile mu lutu lumo, hinge ndi tuli Bayunda hinge Bakamatunga, hinge ndi tuli bandungo hinge bakakushoboloka nimwetu twanwishiwile mu Moyo umo.

¹⁴ Ndaba lutu kaliha lwenga tuhu shimamo shimo, ngoboni lwekala na bimamo byabingi.

¹⁵ Ndi liwulu likamba ngayi, “Ndaba ami kaliha nili liboko, pe ami kaliha nili shimamo sha lutu,” kati likubula kwinga shimamo sha lutu hakwamba ebye ndi?

¹⁶ Kami ndi litu likamba ngayi, “Ndaba ami kaliha nili liho, pe kaliha nili shimamo sha lutu,” kati likubula kwinga shimamo sha lutu hakwamba ebye ndi?

¹⁷ Shinga lutu nimwalwo lwenga liho, shinga lukuyuvwa nahiti? Shinga lutu nimwalwo lwenga litu, shinga lukuhumba nahiti?

¹⁸ Ngonehe eshe bili, Nyambi wayakile bimamo mu lutu shimo na shimo ngonehe ashingile ngayi bikale.

¹⁹ Shinga nimwabyo byenga shimamo shimo, shinga lutu luli kuti?

²⁰ Ngonehe eshe bili, byenga bimamo byabingi, ngoboni lutu lumo.

²¹ Liho kutwesha lifwako kwamba ku liboko ngayi, “Kuku shinga nifwako!” Kami mutwe kutwesha wufwako kwamba ku mawulu ngayi, “Kumishinga nifwako!”

²² Nohobene, bimamo bya lutu ebye bikumoneka kupopa, nibyo bikushingiwa shikuma.

²³ Kami bimamo bya lutu ebye tukuhanganika ngayi kaliha bikushingiwa shikuma, nibyo tukukobelela shikuma, pe bimamo biya bikubula kumonesha wuwahe, nibyo tukukobelela na wuwahe wakupitakana.

²⁴ Ngoboni bimamo byetu byabiwahe, kushinga kubikobelela tufwako. Nyambi niye mwine nawaniki bimamo bya lutu hamo, kami unapaniki maleema akupitakana ku bimamo biya binabulu kufwanina maleema,

²⁵ ngayi lutu lubule kulitapulula, ngoboni ngayi bimamo bilifulankane shimo na shamina.

²⁶ Ndi shimamo shimo sha lutu shikuyanda, pe bimamo nimwabyo bikuyanda hamo nasho, ndi shimamo shimo shikuyemeziwa, pe bimamo nimwabyo bikuwahilila hamo.

²⁷ Wuluno enu muli lutu lwa Kilishitu, kami umo na wamina, muli bimamo bya lutu.

²⁸ Nyambi unayaka mu nimwabo mu litengo, ha kutatika bantumwana, ba wubili bamiluwe, ba wuhatu bakakulongesha, niho bakakutenda bikomokesho na baya bali na ngovu za kunyongomanisha, na baya bakutwesha kuyavwa baminabo na bakakutwaminina na bakakwamba mu zindimi.

²⁹ Kati nimwabo bantumwana ndi? Kati nimwabo bamiluwe ndi? Kati nimwabo bakakulongesha ndi? Kati nimwabo bakakutenda bikomokesho ndi?

³⁰ Kati nimwabo bali na ngovu za kunyongomanisha ndi? Kati nimwabo bakakwamba mu zindimi ndi? Kati nimwabo bakakulubulula ndi?

³¹ Ngoboni shingenu shikuma bishemo byabinene. Haya nikumimonesha nzila ya kukangana shikuma.