1 Kolinte 10 - Kulimama Kwakupya

Kushiwulula ha tunankishi

¹ Bawushinda nikushinga ngayi mwanuke ebye byatendiwile ku bankaka zetu bendelenga na Moshesha. Nimwabo balamiwile munceto ya likumbi, pe nimwabo bombokele Liwate lya Kufubila.

² Pe mu likumbi na mu liwate, bengile ngo bazubilishiwile kuli Moshesha.

³ Nimwabo balile byakulya bimo bya moyo.

⁴ Nimwabo banwine bya moyo umo, ndaba banwinenga ku limanya lya moyo liya lyabakonkelenga, liyo limanya lyengile Kilishitu.

⁵ Ngoboni wingi wa bantu, Nyambi kaliha wawahililile nabo, nibyo bafwililile mu libelelengwa.

⁶ Byuma ebye byatendiwile byenga mwanza kukwetu, ngayi hinga tulishoza byuma bya wubi, ngonehe nibo batendele,

⁷ hinga kulemesha tunankishi ngonehe bamo mukati kabo batendele. Ngonehe kwatikitiwile ngayi, “Bantu bekalile hanci na kulya na kunwa, niho bakatukile, pe bashindile.”

⁸ Hinga tutenda wunjenge ngonehe bamo kukwabo batendele, ha mutena umo kwafwile bantu makulukazi makumi abili na ahatu.

⁹ Hinga twezeka Mwene, ngonehe bamina mukati kabo bamwezekele, kami bafwile ku mayoka.

¹⁰ Hinga mwikala na ntongawishi ngonehe bamo kukwabo batongawukile, bazihiwile ku Lingeloyi lya Lufu.

¹¹ Byuma ebye nimwabyo byatendiwile ku bankaka zetu kwinga mwanza kukwetu. Nimwabyo ebye byatikitiwa mu kutubela, etu tukuyoya mu matena a mamaninino.

¹² Nohobene niye ukuhanganika ngayi unashumankana, akeye kutina awa.

¹³ Byezeko ebye binezi kukwenu, bifwako kulishiya na byezeko ebye byezanga ku bantu nimwabo. Nyambi wakupwisha wufwako kwitabila ngayi mwezekiwe kupitakana eshe mukutwesha. Ngoboni oho mukezekiwa, niye ukamiwanina nzila ya kupulukilamo, ngayi mukatweshe kushumankana.

¹⁴ Nohobene bawushinda bakuhakiwa, tinenu kulemesha tunankishi.

¹⁵ Nikwamba kukwenu ngonehe ku bantu ba ngana bakufwanina kulimuka ebye nikwamba.

¹⁶ Oho tukunwa mu nkomoki ya kutandalishiwa, twalombanga kuli Nyambi ngayi ayitandalishe, kati kaliha tukulilumikila mu mukeza wa Kilishitu ndi? Oho tukulya linkende elye tukupabula, kati kaliha tukulilumikila mu lutu lwa Kilishitu ndi?

¹⁷ Ndaba kuli linkende limo, etu nimwetu hinge ngayi tuli babengi, tuli lutu lumo, ndaba nimwetu tuli bakakutambula shitapilo sha linkende limo.

¹⁸ Monenu Baishalela. Kati nibo bakulya bya zinkombela kaliha baya bakwinga bakakutambula shitapilo sha shihanda ndi?

¹⁹ Niho nikamba nahiti? Kati kanankishi kenga shuma shamina, hinga nkombela ya kutupula ku tunankishi yenga shuma shamina ndi?

²⁰ Byo, ngoboni nikwamba ngayi, byuma ebye Bakalitunga bakukombelela, bakubitupula ku mayimbwe, kaliha kuli Nyambi. Kushinga nifwako ngayi mulilumikile na mayimbwe.

²¹ Kutwesha mufwako kunwa mu nkomoki ya Mwene na nkomoki ya mayimbwe. Kutwesha mufwako kulila ha tebulu ya Mwene na kulila kami ha tebulu ya mayimbwe.

²² Kati tukushonkomona Mwene ku lihungu ndi? Kati etu tukumupitakana ku ngovu ndi?

Lemekenu Nyambi bikati nimwabyo

²³ Byuma nimwabyo byakwitabilishiwa, ngoboni kaliha nimwabyo byabiwahe. Byuma nimwabyo byakwitabilishiwa, ngoboni kaliha nimwabyo byakuyavwa.

²⁴ Muntu hinga ashinga byendi tuhu, ngoboni shinene ashingile baminendi.

²⁵ Mukutwesha kulya nyama nimwayo bakulandisha ku myanya yakulandishila, mubilye nakubula kwipula ndaba ya shikeketima.

²⁶ Ndaba kwatikitiwa ngayi, “Kaye nebye binenzalamo nimwabyo byenga bya Nyambi.”

²⁷ Ndi mukakubula kukulupila ukukwihana ku kulya, nanobe ukushinga kuya, kalye nimwasho akakupanika, nakubula kwipula ndaba ya shikeketima shobe.

²⁸ Ngoboni ndi muntu wamina ukamba kukwobe ngayi, “Ebye byakulya binatupuliwi ku tunankishi,” hinga ulya, ndaba ya niye unakumoneshe na ndaba ya shikeketima shobe.

²⁹ Kaliha shikeketima shobe, ngoboni sha wamina. Bamo bakamba ngayi, “Bishini kushoboloka kwami kunanyanciwi ku shikeketima sha muntu wamina?

³⁰ Ndaba ndi ami nikukambilila kuli Nyambi ndaba ya kulya kwami, ndabangani muntu akunyanca sha kulya nikulya na kukambilila kuli Nyambi?”

³¹ Nohobene, hinge ndi mukulya, hinge ndi mukunwa, hinge ndi nimwasho mukutenda, tendenu nimwabyo ku wuwahe wa Nyambi.

³² Hinga mupukalisha Bayunda, hinge ndi Bakamatunga, hinge ku litengo lya Nyambi.

³³ Tendenu ngonehe ami nikutenda ku bantu nimwabo mu byuma nimwabyo nakubula kushinga bya wuwahe wami amimwine, ngoboni bya wuwahe wa babengi ngayi bapuluke.