Zone 20 - Ia Foforuna Naiungene

Ia Tetuleghu Ka Kraes 20:1-10

¹ Ka ia fufugho reduna Sade fata nagoromona nga, Mere ia tanina Magidala neke lao ka ia lianga beku, neke la finini ghu neke to va pidu ghaheina ia ghahipa babakisina ia makatanana ia lianga beku.

² Purudu lao tuna ka Saemoni Pita nia ka ia keha mane ta nonofoi ia ta namaha ghini taghonai Zisas, neke ghua Mere, neke la kahe ghua ghu iahi, “!Maneri dito hio kavei ia tinina ia Lod ka ia lianga beku, na deo ghu ghai avohi ghemaina hae mo dito la nakainina!” neke la ghua.

³ Purudu lao tuna ka lianga beku ani dike ghua Pita nia keha mane nonofoi ani, e ghua.

⁴ Maneri palu haro dike purudu, ghe ia keha mane nonofoi neke purudu kenui Pita neke kusu la dufu ghu ka lianga ani.

⁵ Manei neke rorogho va rero haghele lao neke finiri ghu ira poko lineni, ghe manei deo geke haghele lao ghu.

⁶ Ianimu tuna ghe, neke la sabara nga Saemoni Pita neke haghele lotoro lao ghu ka giliona lianga beku ani. Manei neke finiri ira poko lineni libodira aianimu.

⁷ Manei neke finini haro molamo ia poko neke mala piha lilohonao ia belehuna Zisas. Poko ianimu ghu mu, taghe neke pipidu nakai va vehai neke ghua, neke libo nenema ghu ka ira keha poko neke mala pipihanao Zisas.

⁸ Ianimu tuna ghe neke haghele lao haro nga molamo ia keha mane nonofoi neke kusu la dufuno. Ne finini ghu ta ghuana ianimu, manei neke age va hohoghona.

⁹ Ka fafata ianimu maneri deo ngama gedi ke va fafahakari ghu ira heve neke kaherio ka ira Kakangava Ta Maduana, ghini Zisas mu e ke tetu leghu ka ia leme, ia ta ghua.

¹⁰ Ianimu tuna ghe dike leghu lao nga tuna ka sugadio.

Ira Podolo Ka Kraes 20:11–21:25 Zisas Ne Podolo Ghini Mere Ia Tanina Magidala

¹¹ Mere neke tetu nakele ghena ka peghuruna lianga beku ani. Manei neke nakele ghena ma neke rorogho mato haghele lao ghu ka giliona lianga beku ani.

¹² Ka fafata ianimu manei neke finiri palu engizeli ta va vona poko ghiho nohedira ka neke auno ia tinina Zisas, kaikeu ka ia visi belehuna mo nia ia keha ka visi tabalana ghahenaro mo, dike ghua.

¹³ “?Ne heve ghe, no nakele nga agho?” di ghua ira engizeli notohina. “!Maneri dito ke hio ghahei ia nogu Lod, na deo ghu avohi gheguna hae mo dito ke la nakainina!” ne ghua ungene tughuna Mere.

¹⁴ Leghuna kahei ianimu, Mere neke doka leghu neke finini ghu Zisas tetuna gheremena mo, ghe manei deo geke fini avohi ghu.

¹⁵ “?Fotati agho, ne heve ghe no nakele nga agho?” neke ghua notohona Zisas. “?Hei mu no haduina agho?” Ka ia nganganana Mere mu, ia mane ta kopui nunuma bana nga neke ghua, neke kahe ghua ghu iahi, “!Faghina agho, noto ke hio ghahei la agho ia tinina, va kahe ghinagu hae mo noto la nakainina, a la hioi ghu!” neke ghua ghini.

¹⁶ “!Mere!” neke ghua Zisas. Fihiki lao tuna ka manei ge kahe ghua ghu iahi neke ghua, “!Raboni!” (Iahi mu kaike ngengene Erameiki, ia ngengene ka ira Ziu fafahakanana mu “Mane Vari Va Kakahei,” e ghua.)

¹⁷ “!Oka posiau ghu go au ghu!” neke ghua Zisas, “vununa ara e deo nga gake vona leghu lao ghu ka ia Mama. !Nga o lao ka ira nogu mane ta nonofoau, o la va kahe ghidi ghu, ta leghu lao ini ara ka manei ia nogu Mama ara nia nomu Mama ghau, ia nogu God ara nia nomu God ghau e ghua!”

¹⁸ Lao tuna neke ghua Mere ia tanina Magidala ge la va kahe ghidi ghu ira ta nonofoi neke to finina taghonai ia Lod, neke ghua. Mere neke va kahe ghidi ghu molamo maneri ghidira ira leghutau neke va kahe ghinino Zisas.

Zisas Ne Podolo Ghidi Ira Nona Mane Ta Nonofoi

¹⁹ Ka saighonana Sade ianimu, ira noni ta nonofoi dike au varighara ka giliona kaike suga ta loke va gima ira makatanana, vununa dike maughidi ghedi ira noni babatu ka ira Ziu. Heve ba ne ghua ma, to tetu ghu Zisas ka hoatadi maneri kahe ghuana iahi, “!Bule e au ka ghau!” neke la ghua.

²⁰ Leghuna kahe ghuana ianimu, manei neke va podolo vanadi ira kamena nia ia ghaghahona e ghua. Ira noni ta nonofoi dike toraina age va ghazaghaza fuludu fininina ia nodi Lod.

²¹ Zisas neke va kahe ghidini, “!Bule e au ka ghau!” neke ghua ghidi. “!Taghe neto ke tuhu mehauo la ia Mama a ghua, a tuhu ghahe ghau ghu ara!”

²² Ianimu tuna ghe, neke hingo kunuri nga neke va kahe ghidi ghu, “!O hioi ia Tarunga Ta Maduana!

²³ Vununa ia Tarunga Ta Maduana neto batu ghini ghauna ghau ghatunaina, heve sasake ta kai hazarira ghau ka hei noni mu to kai hazari. Nga noto pake ghemu la ghau kai haza tadira ira muko ka maneri mu, e deo ge kai haza tadi ghu.”

Zisas Ne Podolo Ka Tomasi

²⁴ Kaike ghu ka ira tazoi palu mane nonomoho, babaolonana Tomasi (Sua ia ta ghua ghini) neke deo geke au taremehadi ghu ira noni ta nonofoi ka ia fafata mehana Zisas.

²⁵ Turi vanani tuna dike ghua, “!Ghai nato ke fini ia Lod!” dike ghua ghini. Ghe manei neke ungene tughuri, “!Ara a toraina finiri ira bakorana nila ka kamena ari, a posi laori ghu bakora iranimu ka kilogu idi, nia nai laoi tuna kamegu ini ka giliona ghaghahona ani e ghua, ghe ga age va hohoghona nga.”

²⁶ Kaike kolabana leghuna ianimu, ira nona noni ta nonofoi dike la varigharani ka ia suga, neke au taremehadi haroma ghu Tomasi. Ira babakisidi ira makatanana suga mu dike loke, ghe Zisas neke meha tetu ka hoataidi maneri, ghe neke kahe ghua nga iahi, “!Bule e au ka ghau!” neke la ghua.

²⁷ Ianimu tuna ghe, neke kahe ghua lao nga iahi ka Tomasi, “!O finiri tuna kamegu idi, o nai mehai ghu kilou nia aiahi! Va tuhu kave mehai tuna kameu nia go nai haghele mehai ghu ka ghaghahogu ini, e ghua! !Nodo ngana palupalu iamu ka agho, o va hohoghona ghu!”

²⁸ Ianimu tuna ghe neke kahe ghua nga iahi Tomasi, “!Nogu Lod nia nogu God!”

²⁹ Va kahe ghini tuna neke ghua Zisas, “!Ghe no va hohoghona nga agho mu, vununa agho no finiau ara. Ka beana ghedira heiri ira ta va hohoghona, geta deo mo gedi finiau ghu ara!” neke ghua Zisas.

Fafahakanana Ghe Neke Kangavi nga Zone Buka Iahi Ka Manei

³⁰ Keha tehi hahaima va ghilaghilani neke riva ghidira Zisas ka kenudi ira nona noni ta nonofoi ta deora ge kangava hinaeri ghu ka buka iahi.

³¹ Ne kangava hinaeri nga irahi mu, o mala va hohoghonai ghu ghau Zisas mu ia Mesaea, ia Tuuna God ta ghuana, mala ka ia va hohoghonai manei, o boka age hioi ghu ghau ia doli soduai.