Zone 2 - Ia Foforuna Naiungene

God Ne Va Podoli Ani Galili Zisas Mu Ia Kraes Ta Ghuana 2:1-12 Ia Varihio Ani Kena

¹ Palu ravata leghuna kudori Zisas Filipi ghe Nafaneli, kaike varihio neke auna ka ia malau fafaana Kena aianihi Galili. Ia nona uke Zisas neke holara haroma ka varihio ianimu.

² Zisas nia ira nona mane nonomoho e ghua, dike fangari haro molamo ta mala la holarana ka varihio ianimu.

³ E deo ngama ge nogha ghu ia mahai varighara, to age nogha ghu ia waeni. Kahe ghua tuna iahi ka Zisas neke ghua nona uke, “Maneri dito noghari waeni,” neke ghua ghini.

⁴ Kahe ghua tuna iahi ka nona uke neke ghua Zisas, “?Uke, ne heve ghe no meha nga agho ka ara ghinina iahi? Ia fafata ka ara e deo nga ge dufu ghu,” neke ghua Zisas.

⁵ Ghe nona uke neke va kahe ghidi ira noniriva, “Ghau o riva ghidi ma heve leghutau ta va kahe ghini ghauna manei.” neke ghua ghidi.

⁶ Ira Ziu edi kururi puhi mala leghuri ghinina ia tihiri ira kamedi nia taghodighi e ghua. Vununa ka va fafahaka ianimu, dike nakairi ghu aianimu ka ta au ani maneri onomo zagi leghaha mala nakai kolo ta riva ghidi ka ghahipa. Kaikeu ka maneri e boka va foudi mo ka vitu ngavulu e dufu ghu ka kaike ghobi tazo lita.

⁷ Va kahe ghidi tuna ira noniriva ta va foudu ghidi ketuhura ira zagi, neke ghua Zisas, dike va foudu luavurari ghu.

⁸ Ianimu tuna ghe neke va kahe ghidi nga manei, “Tokolo kaveri keha kolo o hio laori ghu ka ia mane ta manefaana mahai varighara ini,” neke ghua ghidi. Hio vanani lao tuna manei, dike ghua.

⁹ Ne ketuhu va sisiva ghini ghu ia kolo manefaana mahai varihio ini, ia kolo neke to kusu fihiki ka waeni. Manei e deo geke avohi ghena ghu, hae mo neke sipa mehana mu waeni iahi, ghe ira noniriva dike tokolo kaveio mu dike avohi mo. Ianimu tuna ghe neke kudo nenemai nga ia mane neke varihio no,

¹⁰ neke va kahe ghini ghu, “Leghu noni nga mu e kusu vanadi tudu ma ia waeni ta toraina veha. Ka leghuna tato age hio va tehi ketuhuo maneri ghe, ge va kave vanadi nga tuna mu ia waeni ta deo ge suri veha ghu. Ghe agho mu noto ke naini ma ta dufu ini ghu ghatunaina ia waeni ta toraina veha,” neke ghua ghidi.

¹¹ Zisas neke riva ghini va kenuna hahaima iahi ka ia malau fafaana Kena ka ia Babarana Galili. Aianimu neke va podolina manei ia nona varanga, dike va hohoghonai ghu ira nona mane ta nonofoi.

¹² Leghuna la holara ka ia varihio, manei neke hinae lao ka ia malau fafaana Kapaniumu taremehana nona uke nia ira tahina mane nia ira nona mane ta nonofoi e ghua, dike la au ghu aianimu keha ravata terira.

God Ne Va Podoli Ani Zudia Zisas Mu Ia Kraes Ta Ghuana 2:13–3:36 Zisas Ne Va Kalasi Ia Sugana God

¹³ Neke to namo dufu ia fafatana ia mahai varighara va manemanena ia Ghahe Fuludu, neke vona lao ghu Zisas aianihi Zerusalemu.

¹⁴ Ka ira galahedi ka ia Sugana God, manei neke finiri ira noni dike tatabara ghidiro ira bulumakau, sipisipi nia ira babahulu bora e ghua mala rivai veala. Manei neke finiri haro molamo ira noni nohedira ka gheremedi ira nodi tevo, ta holara laorira ka ia rongo ira Ziu, ira rongodi ka ira keha soloso.

¹⁵ Zisas neke riva ghini kaike naroho mala vari ruza, ghe neke bozo kai kaveri nga ira leghu noni nga ka ia galahena ia Sugana God taremehadira ira sipisipi nia bulumakau, e ghua. Manei neke va koputuri ira tevo, neke ikasa kairi ghu ira rongo kunegeledi ka ira noni dike hoholara rongo dike auro ghu.

¹⁶ Ianimu tuna ghe neke va kahe ghidi nga manei ira noni dike tatabarai babahulu boraro, “!Hio kaveri aiahi leghutau irahi! Nodo taghe malau mala makete ta ghua ghinina nona suga ini nogu Mama,” neke ghua ghidi.

¹⁷ Ira nona mane ta nonofoi dike age ngana fata laoi heve neke ghua ghe neke riva ghini nga manei iahi, ka ia fafata ngana laori maneri ira Kakangava Ta Maduana ta kahe ghua iahi, “Ia namaha ka ara ta vanani ia nou suga e burungu taghe kaike totoi ka giliogu ini ara,” ia ta ghua.

¹⁸ Ghe ira ta babatu ka ira Ziu dike kahe ghua iahi, “O riva vanamai kaike hahaima va ghilaghila mala va podolina ne kuruigho mamu mana agho mala riva ghidira leghutau irahi, ta ghuana,” dike ghua ghini.

¹⁹ Ungene tughuri tuna neke ghua Zisas, “O huara kaini ia Ringifota ta Maduana ka God, ake age va tetu leghui ghu ara ka giliodi lito ravata mo.”

²⁰ “?Oke age va tetu leghui ma agho ka giliodi lito ravata mo?” dike ghua notohina. “!Ia Ringifota ta Maduana ka God mu, neke hiori rodana ngavuluai onomo komuhu va tetuina!” dike ghua ghini.

²¹ Ghe Ringifota ta Maduana ka God neke turi ghinio Zisas mu ia tinina taghonai lama.

²² Ka leghuna ia tetu leghu manei ghe, dike ngana leghui nga ira nona mane ta nonofoi heve neke to va kahe ghidiro manei. Age va hohoghonari tuna ira Kakangava Ta Maduana nia ira heve neke to kaherio Zisas, dike ghua.

²³ Ka ia fafata auna Zisas aianihi Zerusalemu ka ia mahai varighara va manemanena ia Ghahe Fuludu, tehi noni dike finiri ira hahaima va ghilaghila neke riva ghidiro manei, dike age va hohoghona ghu ka manei.

²⁴ Ghe Zisas e deo geke rangerangeri ghu, vununa manei neke avoho va vehari ira hihingodi ira noni haroharo.

²⁵ E deo ghu hei neke kuhana ghinina manei mala va kahe vananina ghinina ia aꞌauna noni, vununa manei to kusu avoho va vehai heve ta auna ka ira hihingodi ira noni.