Zone 15 - Ia Foforuna Naiungene

Zisas Ne Va Tanari Maneri Ka Ia Hangana Ta Lao Ka Ia Luru Hekena Getisemeni 15:1–17:26 Zisas Ia Toraina Vununa Heke Ta Hohoghona

¹ “Ara mu ia torai vununa heke naroho ta hohoghona nia nogu Mama tuna mu ia mane ta kopui nunuma, e ghua.

² Manei e kodaka kairi ira leghu hobodi taka boka fua ghu, nia kuta ghidi tuna ira hobodi ta fua, mala edi pigha laoni ghu, e ghua.

³ Ghau mu neto ke kusu va fegala ghau, vununa ghau no va hohoghona ka nogu vari va kakahei idi.

⁴ O au parekete taremehagu ara, nia ara ga age au parekete taremehamu ghu ghau, e ghua. Ia hobona mu, e deo ge boka fua ghu taghonai kakaike, nga e au va gima lao tudu ma ka ia vununa heke, ghe ge boka fua nga manei. Taghe iala molamo, ghau e deo go boka fua ghu noto deo la go au parekete meha ghu ka ara.

⁵ “Uve, ara lamu ghu mu ia vununa heke, nia ghau lamu ira hobona, e ghua. Heiri ira ta au parekete meha ka ara nia heiri ka ira ta au parekete lao ara, e ghua mu, edi age pigha ira fuadi. Noto au nenema la ka ara, e deo heve ta boka riva ghinina ghau.

⁶ Heiri ira ta deo gedi au va gima ghu ka ara mu, taghe ira hobodi ta taraha kairi kaike noni ta sakomo kai laori ghu, nia leleme tuna ira ta ghua. Kokolodi hobodi ta ghuara irahi mu, e mala sene varighara ghidi ka kaike momotu, nia saligari tuna, e ghua.

⁷ Nga noto au parekete va gima meha la ghau ka ara, nia au va gima tuna ira ngengene ka ara ka ghau neto ghua la, heve leghutau ta fangaina ghau mu, e age vanamu ghatu.

⁸ Ira nogu noni nonofoi ta hohoghona mu edi fua va tehi. Iahi mu e va varangi nogu Mama.

⁹ “Taghe ta namaha ghinagu ini la ia Mama na ghua, na namaha ghini ghau haroma ghu ara. O au ghu ka namaha ini ara.

¹⁰ Noto leghuri la ghau nogu ungene va gigima idi, ghau o age au va gima ka namaha ini ara ghatu, taghe nato ke leghuri idi la ara ira ungene va gigima ka nogu Mama, ta au va gima ini ghu ka ia nona namaha manei.

¹¹ Ara nato ke va kahe ghini ghau leghutau irahi, o boka mala kuru ghau ghu ghau ia va ghazaghaza ta varifata ka ta kuruau ini ara, nia e age hokoto tuna ia va ghazaghaza ka ghau, e ghua.

¹² Ungene va gigimana ka ara mu iahi, o vari namahai ghemu, taghe ta namaha ghini ghau ini la ara.

¹³ E deo namaha ta faa fuludina ia ta vanadi agho doliu nia ira nou noni baere.

¹⁴ Ghau mu ira baere ghu ka ara, noto leghuri la ghau heve nato ke ungene va gigimarira ara ka ghau.

¹⁵ Ara mu, e deo ghu ga va kudo ghini ghau noni mala varituhu ghu, vununa ira noni mala varituhu mu edika avohi ghedi ghu heve ne riva ghinina ia faghinadi. Nga ghau mu, ira baere a ghua ta va kudo ghini ghauna ara, vununa ara nato ke va kahe ghini ghau ira leghu turi neke va kahe ghinaguro nga nogu Mama.

¹⁶ Eka ghua ghu ghau mu noke faeteauna ara, nga ara mo nake faete ghauna ghau nake vanamuna ghu ia riva, ta mala ghahe ta la fua va pighana ghu ghau ka ia kokolona fuana ta au toghunai. Ianimu tuna ghe ge age vanamu nga nogu Mama heve leghutau ta fangaina ghau ka babaologu ini ara.

¹⁷ Iahi ghu mu ungene va gigimana ka ara, o vari namahai.

Ia Vari Kikipana Ka Malau Iahi Peka

¹⁸ “Neto kikipana ghini ghau la malau iahi peka, o ngana avohi ma ghau neke kusu kikipana ghinaguna ara manei.

¹⁹ Noto nona la ghau malau iahi peka, ira noni ka malau iahi peka taghe nodi taghodi edi age ghua ghini ghau namaha ghini ghauna. Ghe ara nato ke faete kave ghau ka malau iahi peka, eka nona la ghu malau iahi peka mu ghau. Ne ghua mamu ghe, ne kikipana ghini ghau nga malau iahi peka.

²⁰ O ngana avohori ira ngengene nake va kahe ghini ghauro ara, ‘Ira noni mala varituhu mu eka varanga fuludi ghu ia nona faghina,’ nake ghuao. Dito ke ngovalau la ara ia faghinamu, maneri edi age ngovala ghau molamo ghau ghatu. Nia dito ke leghuri la maneri ira vari va kakahei ka ara ia faghinamu, maneri edi age leghuri haro molamo ira tau ka ghau.

²¹ Ira noni ka malau iahi peka edi age kikipana ghini ghau ghatu, vununa ghau no nogu ara, nia vununa di deo gedi avohi ghedi ghu God neke tuhu mehauno ara, e ghua.

²² Gake deo la ga meha tuturi vanadi ghu ara, geala maneri e deo gedi fini avohi ghu ta hotorina muko. Nga ghatunaina mu, e marutana vanadi maneri kaheina dike deo gedi ke rivai muko ghu ta ghuana.

²³ Hei ia ta kikipana ghinagu ara mu ne kikipana ghini haroma nogu Mama.

²⁴ Gake deo la ara ga riva ghidi ghu ira hahaima va ghilaghila ta deo heini ta boka riva ghidira, ka vari hoataidi maneri, geala e deo mamu gedi ke hotori ghu muko. Ghe maneri dike finiau mo riva ghidira ara leghutau irahi, ghe maneri edi kikipana ghinagu ngama ara nia nogu Mama, e ghua.

²⁵ Iahi mu ne age va ghuduvi ia ta kahe ghua iahi ka ira Kakangava Ta Maduana: ‘Ia kikipana ghinagu ara maneri, ne deo fafahakana ma,’ ia ta ghua.

²⁶ “Ghe ghatu ara, a tuhu mehai ia Mala Vari Tokai, ia Tarunga ta va podoli ia hohoghona ghinina God, ia ta sipa meha ka ia Mama. Manei e age turi kave ghinagu ara ghatu.

²⁷ Ghau tuna, go age turi vanadi haro ghu molamo ira keha noni ghinaguna ara e ghua, vununa ghau noto ke au taremehagu noke meha ghu ara ka ia torai tatanigainani.”