Zona 3 - Ia Foforuna Naiungene

Zona Ne Lao Nineve

¹ Ianimu tuna ghe neke ngengene lao nga Iahova ka Zona kaike fafatani:

² “Va tana, o lao ghu ka ia malau leghaha Nineve, o la kudo ghini kave ghu nonomoho ta vananigho ini ara ka ira noni.”

³ Zona neke nomohi ia ngengenena Iahova neke va tana ghu laona Nineve. Nineve mu kaike malau leghaha—e hio lito ravata mala ghahe kamotina.

⁴ Ka ia ravata kenuna, Zona neke tatanigai la haghele ka malau leghaha ani, neke la kudo ghini kave ghu iahi: “!Rodana ngavulu ravatani ma ta mehara e age huara ghu ghatu Nineve!” ne ghua ghidi.

⁵ Ira nonidi Nineve dike va hohoghonai God. Maneri dike kudo ghini kave ghu ta mala filuna ka mahai ira leghu noni nga, mala va vona pokobaikina tatanigaina ka ira noni faa dufu ghu ka ira rekahadi noni.

⁶ Ka ia dufu laona ia tuturi ka ia mane ginitaukelana Nineve, manei neto tetu vona ma to magali hio kaini ghu ia nona poko sodu, va piha ghini pokobaikina taghonai, nohe hinaena ka fatena kofele.

⁷ Iamu tuna ghe neke va kavei nga manei kaike ngengene ta gigima ani Nineve: “Iahi mu ngengene va gigima ka ia mane ginitaukela nia ira nona nonifaa, e ghua: “Oka va malumi ghu hei noni, ba, pusi meusu, ba, bulumakau ba sipisipi, ta linginina kaike leghutau ghu; oka va malumuri ghu ta mahai sesehuna, ba, ketuhuna.

⁸ Nga leghu noni nga, nia pusi meusu nga e ghua mu, edi va piha ghidi pokobaiki taghodi edi magali nakele lao ghu ka God, nai kairira ira puhidi ta muko nia ira vari magara ka maneri, e ghua.

⁹ ?Hei ne avohina? Haeba God e age holari mo ia nganganana, e posi leghui ghu ia haala ta mamaghuana ka manei mala deona gada age leme ghu ghita.”

¹⁰ Ka ia age finini God heve dike riva ghinina maneri, nia tato fihiki kairira maneri ira puhidi ta muko e ghua, manei neke holari ia nganganana neke deo ghu vanadi laona ia vari va kilasa neke to mala vanadi lao neke ghuao manei.