Zona 2 - Ia Foforuna Naiungene

Ia Verevere Ka Zona

¹ Gilio ka tiana ia namari, Zona neke verevere lao ka Iahova ia nona God.

² Neke kahe ghua ghu iahi, “Ka ia vavahagala, ara nake nakele lao ka Iahova, neke ungene tughuau ghu manei. Gilioni ka ia beku, ara nake kudo fanga toka, noke nomohi ghu agho ia nakele ka ara.

³ Agho noke fera ghinagu lao gilioni ka ia rokasa, ka ia torai va nonoghana tahi peka, hio vidulu ghinaguna ira totolo; Ira leghu nou boghuzu tokofo nga, di piata tamunuau meha.

⁴ Nake kahe ghua ghu iahi, ‘Ara mu toke bozo kaiau ka ia nahaliu; ghe ara ake matoni visi ka nou suga va totoana ta maduana nia mo.’

⁵ Ira kolo ne va luduru dufuau ka taniagu ini, ia rokasa neke gomuau; ira sesehutahi dike pipiha liloho ka paugu ini.

⁶ Ka ira torai va nonoghadi vuhuku pekani, nake luduru hinae laona; ia kava peka neke bara kaputu va gimau fuludai, Ghe agho noke hio vonai ka ia golava ia doli ka ara, Agho Iahova nogu God.

⁷ “Ka ia neke to nona ukuhu lao no ia doli ka ara, nake nganaigho nga Iahova, neke dufu age ghu ia nogu verevere ka agho, ka ia nou suga va totoana ta maduana.

⁸ “Heiri ira ta va totoana lao ka ira nguzunguzu ta deo lighorodi, di fihiki kairi ira nodi dudumana.

⁹ Ghe ara taremehana kaike koze kudo veha, a age veala vananigho. Heve nato ke nai ghini ungenena ara, a age riva ghini va veha. Ia Vari Va Doli mu e meha ka Iahova.”

¹⁰ Ianimu tuna ghe neke va kahe ghini nga ia namari ia Iahova ta la kamusu kai kaveina Zona ka kava karangonao.