Zona 1 - Ia Foforuna Naiungene

Zona Ne Huhughi Iahova

¹ Ianimu tuna ghe ne tetu nga Iahova neke va kahe ghini ghu Zona ia tuunamane Amitai:

² “Va tana o lao ghu ka ia malau leghaha Nineve, o la tuturi beana vanadi ghu, la torai ungene tonorina ira noni, vununa ara nato finini ia muko ka maneri.”

³ Ghe Zona neke tetu vona neke kabai pelo kaini Iahova ghahe vai laona ka keha pelonao mo ani Tasisi. Ghahe hinae lao tuna ka ia malau Zopa ka neke la dufuio manei kaike vaka neke mala laono Tasisi. Leghuna tabari ia pasisi, manei neke haghe ka ia vaka neke tepetepe lao ghu Tasisi pelo kainina Iahova.

⁴ Ghe Iahova neke va ghahe laoi ia leghahaina dafe ka tahi ani, va vuha vonarira ira leghahai raghi geo neto ke age nona va piati ghu ia vaka.

⁵ Ira leghu mane riva nga ka ia vaka dike maughedi dike sopai nakele lao ghu ka ira sopai nodi god taghodi. Nia kai laori tuuna ira kako ka tahio mala va sasananoina ia vaka, dike ghua. Ka fafata ta ghua ianimu maneri mu, Zona neke to kusu hinae lao gilio ka mala va hahaghe ani to la epu melukai ghu.

⁶ Ia mane posi gili neke hinae lao ka manei neke la kahe ghua ghu iahi, “?Heve mu ta epu ini agho? !Tetu vona o nakele lao ghu ka ia nou god! Haeba manei e age dudumana ghini ghita mo, e deo ghu ge age va malumi ghu ta lemena ghita.”

⁷ Ianimu tuna ghe di kahe ghua nga iahi ka vari taghodi ira maneriva ka vakana, “Meha, da feferai ghahipa beana ghu mala hadu kaveina hei mo ne hihio ghinina va hake ghitana ka lelemeana iahi.” Riva ghini tuna ianimu ge hoto lao ghu ka Zona, neke ghua.

⁸ La notohi tuna dike ghua, “?Va kahe ghini ghai, hei mo ne hotoina va hake ghitana ka leghu mamarutana irahi nga? ?Heve mo mu rivana ka agho? ?Hae mo mu noke sipa mehana agho? ?Hae mo mu solosona ka agho? Ka ira noni heve mo noke sipa mehana agho?”

⁹ “Ara mu noni Hiburu, a va totoana ghini ghu Iahova ia God na ka kolangana fate, neke va vuhaio ia tahi nia ia kava karanona,” ne ghua ungene tughuna manei.

¹⁰ Leghahaina mamaghu neke auna ka maneri, dike notoho ghu, “Heve mo noto ke riva ghinina agho?” (Maneri dike avohi neke pelokainina manei Iahova, vununa manei neke to kusu va kahe ghidi.)

¹¹ Nia kahe ghua tuna iahi dike ghua, “?Heve mo geala ta va riva ghinighona ghai mala va bulei na tahi ini, vununa tahi ini neto age vai muko nia ke muko laoni ne ghua?”

¹² Kahe ghua tuna iahi ne ghua Zona, “O hure kai laoau ka tahio, e age bule hinae ghu manei, vununa ara na avohi mo ta paluhaguna ara mu meha va hake ghauna ka mukoinare ta mamaghuana iahi.”

¹³ Ira maneriva ka ia vaka dike toraina riva va gigima ta mala gelugelu va kalae laoina ia vaka ka kava karangonao mo. Ghe maneri dike deo bokadina, vununa ia tahi neto ke toraina age muko nia ke muko laoni, neke ghua.

¹⁴ Ianimu tuna ghe dike nakele lao nga ka Iahova, “Agho Iahova dudumana ghini ghai, oka va malumu ghai la ghu ta lemena vununa ia dolina mane iahi e age kodaka. Oka va hoto ghini ghai meha ghu ta atungina kaike mane ta kalasa, vununa taghou, Iahova, noto riva ghini ia ta veha vananigho taghou.”

¹⁵ Ianimu tuna ghe dike hure kai kave laoi nga Zona ka tahio, neke bule hinae ghu ia tahi.

¹⁶ Ira mane dike maughini Iahova neke au ghu ia leghahaina mamaghu ka maneri, dike riva ghini ghu kaike veala ka Iahova, nia rivai naiungene tuna, dike ghua.

¹⁷ Ghe Iahova ne va ghahe laoi kaike leghahai namari mala gomuina Zona, neke au ghu manei lito ravata nia lito redu ka giliona ia namari.