Zemesi 4 - Ia Foforuna Naiungene

Leghui Ia Puhina God

¹ ?Heve mo mu ne va magara, vari hahala ghauna ghau ka vari hoataimu nira taghomu? Iranimu lamu ira lao hihingo ta malamu ma taghomu lama, ta magara ghau ta au nira ghu gilio ka hihingomu nganganamu nira.

² Ghau no kabai ghidi ira leghutau ta deo ghau, ghe no deo go boka hiori ghu, noto vari atungu ghu. Ghau no toraina hagalai leghutau, ghe no deo go boka hiori ghu, noto vari hahala ghu magarana. Ghe no deo nga kuru ghauna heve ta kabai ghidi nira ghau mu, vununa ghau e deo go fangai ghu God.

³ Nia geta fanga ghu ghau ghe, e deo boka hiorimura, vununa ira nganganamu ghau di zea. Ghau no fangari ira leghutau ta boka mala veveha ghini ghau ma taghomu lama.

⁴ !Ghau mu taghe kaike fotati ta zave kunui keranau, no ghua! ?E deo go avohi ghu ghau mu, noto namaha ghini la ghau malau iahi peka, God mu e nomu kana ghau, ta ghuana? Nia noto faeti la ghau malau iahi peka ta mala nomu baerena, ghau no naini God ta mala nomu kanana.

⁵ ?Ba, ghau no ngana palupalu ghini iahi? ?“Ia Tarunga Ta Maduana ta nai mehai God ka gilioda ghita mu, e toraina kuhana ghini ghita ta au hohoghodana,” ia ta ghua ka ira Kakangava Ta Maduana?

⁶ Ghe ia varisute ta vanada kakato manei mu e ke gigima fuludu laoni. Taghe ta kahei iahi la ka ira Kakangava Ta Maduana, “God e nai hinaeri ira ta hadu varanga, nga e vanadi kakato ira ta unuhu ia nona varisute,” ia ta ghua.

⁷ O nai hinae ghau ghu taghomu ka kenuna God. Taga tetui Satana, e age pelo kai ghau ghu manei.

⁸ O meha namo ka God, e age namo meha ghu God ka ghau. Tihiri kamemu nira ghau ira ta au ghau sasake; va kalasari hihingomu nira, ghau ta tatangana kobiri.

⁹ Au ka muko hihingo, nakele adoꞌado nia nakele vavahagala. Nodo paghona o tatanigai nakele ghu. Au turunguhu ka ia dudumana, nga oka au va manemane ghu.

¹⁰ O nai hinae ghau taghomu ka kenuna ia Lod, e age hure vona ghau ghu manei va vonavona ghauna.

Oka Fateri Ghu Ira Keha Noni

¹¹ Ghau taremehaguro, oka vari ungene va muko ghu. Noto ngovali, ba, fatei la ghau ia keha taremehamu noni kiloau, ghau mu no ngovali nia fatei ma ia Vetula. Ghau mu eka mane varifate ghu go boka kahei ghu ne lotoro ba ne zea ia vetula ta ghuana. Nga rivana ka ghau mu mala leghui ma.

¹² Taghonai God lama mu, ne riva ghinina ia vetula nia manei lama mu manefatena, e ghua. Manei lamu ta boka hio va dolirira, nia ngovalarira e ghua ghu mu ira noni. ?Taghou mu hei no ghua ghe, no muko agho no ghua ghini nga ia keha noni taremehau?

Balau Ghini Ia Va Varavaranga

¹³ Nonomoho meha, ghau ira ta kahe ghua iahi, “Ravata ini, ba fugho, ghita da age ka ia kokolona malau leghaha ia ta ghua iahi, da age au ghu aianimu fatana kaike komuhu. Aianimu ta age rivai bisinisina ghita ghatu da age rivai va tehi rongo ghu.”

¹⁴ Ghau deo ghe go avohi ghu heve ta age ghuana ia doli ka ghau fugho. Ghau mu taghe kaike pukina gufu ta podolo birusuna fafata ma nia ke ogoro ma tuna ta ghua nia.

¹⁵ Nga geala ghau, o kahe ghua iahi, “Neto lao nanafa la ka God, ghita da au da riva ghidi ghu leghutau irahi,” geala o ghua.

¹⁶ Ghe ghau e deo go riva ghini ghu ianimu, nga no hadu varanga, no helahela ghini ghau ghu taghomu ka vahina leghutau nga. E zea ghu mu to hadu varanga la.

¹⁷ Hei neto deo la ge riva ghini ghu ia veha ta avohi taghonai e mala riva ghini ia ta ghua, manei mu neto sasake.