Zemesi 2 - Ia Foforuna Naiungene

Oka Toka Kaike Pelo Ghu Ka Ira Noni

¹ Ghau taremehaguro, noto au ghau va hohoghona la ka ia noda Lod Zisas Kraes ia ta pelara, oka kaike pelo ghu ka ia nomu varisute ta vanadi ghau ira noni.

² Taghe iahi la, taghe ge la meha la ka ia haedu ghau kaike noni ta va vona ringi ta golu nia poko ta veveha e ghua, nia la meha haro molamo tuna kaike noni ta kuma ta va vona poko ta pereu, ge ghua la.

³ Va vonavona fuludu laoi tuna ghau ia noni ta va vona poko ta veveha go kahe ghua ghu iahi, “Hioi nonohe ta veveha iahi,” go ghua ghini ghu, nia ke kahe ghua tuna iahi ka ia noni ta kuma, “O la tetu meha aianihi, ba, o nohe hinae ka kavana peka,” go ghua ghini ghu,

⁴ ghau mu to age hoto ghau ta rivai fofotana ka vari taghomughi nia no rivai varifate ta va dedeke ka ira nganganamu ta muko, e ghua.

⁵ Vanemoho talinga meha ghau taremehaguro. God neke faeteri ira noni ta kuma ka malau iahi peka ta mala taghotaghona ka ia va hohoghona. Maneri ghu mu ta age hio kadolina ia ravutu neke naiungene ghinio God ka heiri ira ta namaha ghini manei.

⁶ Ghe ghau mu ta ngovalaridi ira noni ta kuma. Ira ta taghotagho lamu di nagoto hinae ghauna, ta kakanaka ghini ghau lao nira ghu ka kenudi ira ta varifate.

⁷ Maneri lamu dike ungene va mukoina ia babaolona va vonavona Zisas Kraes, ia neke kudo ghauno.

⁸ Uve, e veha mamu ta toraina leghuina ghau ia vetula ginitau ka ia Lod ta au ka ira Kakangava Ta Maduana ia ta kahe ghua iahi, “Namaha ghini ia keha taremehau noni taghe taghou la ta ghua ghinina,” ia ta ghua.

⁹ Ghe ia varisute ta vanadi ghau ira noni neto kaike pelo la, ghau mu noto age sasake, to age hoto ghau ghu ta buhutina vetula ianimu.

¹⁰ Nia ia noni ta deo ge leghui ghu kaike pelona ka ia vetula mu, e varifata ma ta deona manei ge leghui ghu ia kamotona vetula.

¹¹ Vununa ia God haro neke kaheio, “Oka zave kunui ghu kerauau,” neke ghuao lama, neke kahei harona, “Oka vari atungu ghu,” ta ghua iahi. Geta deo ghu agho go zave kunui ghu kerauau, ghe noto vari atungu la agho, to buhuti haroma agho mu ia vetula kamoto ka God.

¹² O ngengene nia o riva taghe ira noni ta age fateri ghatu ia vetula ta va kalasa ghita, o ghua.

¹³ Vununa ghatu e deo dudumana ta age vanamuna ghau ira ta deo go dudumana ghidi ghu ira keha noni. Nga ia noni ta va podoli ia dudumana mu, e boka tetu mo ka ia varifate deona ge maughena ghu.

Ia Va Hohoghona Nia Ira Riva

¹⁴ ?Ghau taremehaguro, heve veha mu ta la au mehana ka ghau ira ta kahei ne kuru ghau va hohoghona ira ta ghua, noto deo la go va podoli ghu ka ira nomu riva? ?E boka hio va doli ghau mo va hohoghona ianimu?

¹⁵ Taghe go fini la ghau kaike taremehamu noni kiloau mane, ba fotati ta malangai ghano, ba poko,

¹⁶ go kahe ghua ghu iahi, “Veha mo, ghahe gheu va veha nia God e va beanigho; au va dangava nia mahai va veha,” go ghua ghini ghu. ?Heve veha mu ta la au mehana ka riva ianimu noto deo la go vanani ghano ba poko ghu noni ianimu?

¹⁷ Taghe iala e ghua molamo mu ia va hohoghona: neto taghonai kakaike la, neto deo ghu ge ghahe taremehana riva ghu, e leme.

¹⁸ Ghe haeba kaikeu ka ghau e age kahe ghua iahi, “Agho no auigho va hohoghona, nga ara mu di au mo ira riva ta veha nake riva ghidiro,” e age ghua bana. O va podolo vanagu meha ghu ia nou va hohoghona ta deo ge ghahe taremehana riva ghu, a age va fini ghinigho ghu ara ia nogu va hohoghona ka ira heve ta riva ghidi ara.

¹⁹ Ghau no va hohoghonaina mu, kaike God mo ta auna, no ghua. !Puina veha! Ira nazahina di va hohoghonai harona iahi, di nanazara ghu maughedina.

²⁰ !Ghau noni ta kingo! ?No torai kabai va fini ghini ghau ia va hohoghona taka ghahe taremehana riva ghu mu e deo lighorona, ta ghuana?

²¹ ?E deo go nganai ghu ghau mu, ia faada Ebarahamu neke nainio manei Aesake ia tuunamane ka fatena ia sopebeana mala veala ghinina, ghe neke age veha vanani nga God, ta ghuana?

²² Ghau no finini ia va hohoghona nia ira riva ka manei e ghua dike riva varigharara. Ia va hohoghona ka manei mu neke age kamoto ghu ka heve neke riva ghidiro manei.

²³ Neto ke meha hohoghona ghu mu ira Kakangava Ta Maduana ta kahe ghua iahi, “Ebarahamu neke va hohoghonai God, neke kahe kavei ghu God ta lotoro ghenana manei,” ia baere ka God mu manei, dike ghua ghini ghu ira noni.

²⁴ O fini ghu ghau; ghita mu da meha lotoro taremehana God ka ira heve ta riva ghidi ghita, nga eka ghua ghu ka ia va hohoghona lama.

²⁵ Rehabu ia ta kikirasei tabara mu kaike va ghaghao ta varifata haro ka iahi. Manei mu neke meha lotoro ka God ka ira riva manei ka ia fafata hio suteri ta poikari ghu ira mane ta sigho poika, ke va ghahe va vehari ghedi tuna ka ia keha hangana, neke ghuao.

²⁶ Taghe ia tini mu e leme neto deo tarungana la; e ghua molamo mu ia va hohoghona e leme ghu neto deo la ge ghahe taremehana riva ghu.