Zemesi 1 - Ia Foforuna Naiungene

Ia Va Kenuna Pagahaina: Zemesi Ne Tuturi Ghini Ia Va Sisivai Ghini Ghita Ka Ia Noda Va Hohoghona 1:1-18 Ungene Veha Ka Zemesi

¹ Leta iahi mu sipana ka ara Zemesi ia nona noniriva God nia ia Lod Zisas Kraes. E lao ghu ka ira Ziu ta noni kiloau dike pirararo hae ghe hae ghu ka malau iahi peka.

Ia Va Hohoghona Nia Au Va Gima

² Ghau tahiguro, taghe kaike fafata mala va ghazaghaza o ghua, neto dufu ghau la leghu kokolodi lelemeana nga,

³ vununa to avohi ghau mu, ira va sisiva ghini ghau ka ia nomu va hohoghona mu, e age toka ghini ghau ta au va nadu tuduna.

⁴ O tetu va gima tudu ma dufu ghu ka ia va nonoghana, e mala age zeolo nia kamoto e ghua ghu ira dolimu, deona heve ta malanga ghinina.

⁵ Hei ka ghau neto deoi ngangana ta veha la, agho geala o verevere fangai God e vananigho ghu, vununa God mu e tufa ka ia va manemane ka heiri haroharo, deona ge tahori ghu ira muko, nia age vananigho tuna ghatu, e ghua.

⁶ Ghe noto verevere la, agho o toraina va hohoghonai God ka hihingou nia, deona go ngana palupalu ghu. Hei noni ia ta ngana palupalu mu, taghe ta ghua nia ia raghina tahi ta dafe lao mehai nia, e ghua ma.

⁷ Noni ta ghuara ianimu ghu mu, e deo heve ta boka age vanadira ia Lod;

⁸ maneri mu edi ngana palupalu nia lao ghe meha ghu edi ghua ma ka ira heve ta riva ghidi maneri.

⁹ Ira noni kiloau ta malanga mu, edi toraina va manemane neto hure vonari la God ka ia papala fate,

¹⁰ nia ira noni kiloau ta taghotagho tuna gedi toraina va manemane ghu, neto nai va hinaeri la God ka ia papala peka e ghua. Vununa ira ta taghotagho mu, edi age lufuru deo ghidi taghe ira havoro mauke, edi ghua ghatu.

¹¹ Ia taunu ta sisito e la vona meha fate, e saligari ghu ira sesehu nia e age va lufururi ira havoro ngovalarira ira ridiradangadi, e ghua. Taghe ianimu, edi age ghua haro molamo ira noni ta taghotagho edi age ogoro haro ghu ka ia fafata rugusi ghidi maneri ira ghaghahedi rivai nodi bisinisi.

Ira Va Sisivaini Ghita Nia Ira Auau

¹² God mu e va beanari ira noni ta tetu va gima ka giliodi ira vari va sisivai, vununa dito age paufuri la maneri vari va sisivai iranimu, maneri edi age hioi ghatu ia tabara ka ia doli neke naiungene ghinio God ka heiri ira ta namaha ghini.

¹³ Neto meha la ia vari va sisivai ka agho, “Auau iahi ne meha ka God,” oka ghua ghu. Vununa ia muko e deo ge boka auaui ghu God nia manei ge deo ghu boka auauina hei noni, e ghua.

¹⁴ Auau mu, e la meha ka ira lao hihingo ta muko ghita, ta koroho kave ghita ghu age va takolo ghitana.

¹⁵ Lao hihingo ta muko irahi lamu ta batu ghini ghita laona ka ia sasake; ia sasake tuna ge batu ghini ghita lao ghu ka ia leme, e ghua.

¹⁶ Oka ghahe va zea la ghu, ghau tahiguro.

¹⁷ Vahina leghutau ta veha nia kalasa e ghua mu, sipa mehadi fate ka God ia va vuha ka ira leghutau ta va meha fegala ka kolangana. God mu e varifata tudu ma. Manei mu taghe ira mamaelu ta nagoromo ke holara ira ta ghua, eka ghua ghu.

¹⁸ Ka ia nona lao nanafa taghonai, neke faete ghita ghu manei ta mala vanada dolina ka ia nona saoro ta hohoghona, ta toraina mala meha tongovonana ghu ka ira leghu nona neke va vuhariro nga.

Ia Va Paluna Pagahaina: Zemesi Ne Tuturi Ghini Taghe Heve Ta Ghuana Mu Ia Va Hohoghona 1:19–5:6 Ia Va Melongo Nia Ungene Nonomoho

¹⁹ Ghau taremehaguro, ghau geala o mamagali ka ia nonomoho, mamahuge ka ia ngengene nia mamahuge ka ia haala ghau, e ghua.

²⁰ Ia hala ka ia noni e deo ge boka nai va lotorori ghu ira leghutau ta lao nanafa ghidi God.

²¹ O kai hazari ghu ira sare sota nia muko ta au ka ira dolimu, hioi ghu ka ia unuhu ia nonomoho neke numa ghinio God ka hihingomu nira, mala hio va doli ghauna.

²² Oka gogosu ghu go suna nonomoho kakato ma ghu ka ia ngengene God, nga o riva ghini ta kahei ani manei.

²³ Vununa noto suna nonomoho lama ghau, noto deo ghu leghuina, ghau mu taghe ta ghua nia lama ira noni ta mato laori ira hihilidi taghodi ka ia tiro, e ghua ma.

²⁴ Maneri edi mato va vehari taghodi gedi ke ghahe nga, ghe magali ma edito ke ngana kairi ghu ira hihilidi, e ghua.

²⁵ Nga noto mato va gigimai la noto au ghu ghau ia vetula ta torai veha ia ta va kalasa ghau, noto riva ghidi ghu ira ta kahei manei, deona go ngana kairi ghu heve noke nomohoriro, God e age va beana ghau ghatu ka ira heve ta riva ghidi ghau.

²⁶ Taghou mu noni kiloau noto ghua la agho, ghe deo tuna go boka vato ghini ghu lalameu nia, noto ghua la, agho mu no sunare va kingoigho mo taghou nia ia kiloau ka agho tuna ge deo lighorona ghu, e ghua.

²⁷ Kiloau ta kalasa nia lotoro ta veha vananina God ia Mama mu: ia ta hio suteri ghita ira rekaha ta deo nodi mama nodi uke nia ira fotati ta lemekai e ghua ka ira mamarutana ta dufuri maneri, nia ka va malumi ghu malau iahi peka ta va mukoighona, e ghua.