Tatanigaina 8 - Ia Foforuna Naiungene

Ia Ologho Ne Vai Hinae

¹ Ghe God deo geke nganakaini ghu Noa nia ira vahina tagukava popohi nga nia ira leghu tagukava mauke nga e ghua, dike au taremehanaro ka ia zaghimaha. Manei neke va fofolofo mehai ia dafe ka fatena ia kolo neke va hinaei ghu ia kolo.

² Ira futudi ketuhu ka pekana ia kava nia ira ghasolodi ketuhu ka kolangana dike bakisi, neke to age nodo ghu ia nanare zoghu hinaena ka kolangana,

³ nia ira kolo gedi ke age vai hinae ghu vona mehadira ka ia kava neke ghua. Leghudi 150 ravata ia kolo neke to age hinae,

⁴ nia ka ia va tazoi vitu ravatana ia va vituna hihile, ia zaghimaha neke meha nohe hinae ka kaikeu ka ira vuhuku ani Ararati.

⁵ Ia kolo neke vai hinae ma dike vuhai age dodoruana ghu ira fatedi vuhuku ka ia va kenuna ravata ka ia va tazona hihile.

⁶ Leghudi rodana-ngavulu ravata, Noa neke tobehi ia vuidana zaghimaha neke riva ghinio manei,

⁷ neke va alava kave laoi ghu kaike memeha leghaha ta va kudo ghini raveni. Manei neke alava lao meha neke ghua ma neke vuhai karango hinae ghu ia kolo ka ia kava.

⁸ Ianimu tuna ghe neke va alava kave laoi nga Noa kaike babahulu mala hadu kaveina geto vai hinae la ia kolo geto karango ghu ia fatena kava, ta ghuana.

⁹ Ghe ia babahulu neke deo hae neke boka la dekena, vununa neke kolo kamoto nga ia fatena kava. Ke alava leghu lao tuna ka Noa ka zaghimahana, neke ghua. Noa neke va tuhu kave laoi ia kamena neke hio hagheli ghu ka zaghimahana ia babahulu.

¹⁰ Manei neke afani keha vitu ravata ghe neke va alava kave laoini nga ia babahulu.

¹¹ Ka fafata iahi mu, ia babahulu neke alava leghu meha ka manei ka ia saighona, taremehana kaike dodolina kalana olivi ka ia mangana. Ianimu tuna ghe neke avohi nga Noa neke to hinaena ia kolo.

¹² Ke afani tuna keha vitu ravatani neke ghua manei, ghe neke va alava kave laoini nga ia babahulu. Ka fafata iahi mu ia babahulu to deo ke la leghu mehana ka Noa.

¹³ Ka ia va kenuna ravata ka ia va kenuna hihile ka ia komuhu foforu, ka neke age onomo ghobi kaike komuhunao Noa, ia kolo neke to age karango hinae ka ia kava. Ianimu tuna ghe neke hio kaini nga Noa ia totoufuna ia zaghimaha neke finini ghu neke to karangona ia kava.

¹⁴ Ka ia va varadaki vituna ravata ka ia va paluna hihile, ia kava neke to karango kamoto.

¹⁵ Ianimu tuna ghe neke kahe ghua nga iahi God ka Noa,

¹⁶ “Kave meha ka zaghimahana, agho nia ghaseborou nia, nia tuumane nira nia ghaseborodi nira, e ghua.

¹⁷ Hio kave taremehau leghu kokolodi memeha nga nia leghu tagukava nga e ghua ta au ka giliona zaghimahana, edi mala rusa va tehi ghu mala auna maneri ka ira leghu pelodi nga ka malau iahi peka.”

¹⁸ Noa nia ia ghaseborona, nia ira tuunamane nia ira ghaseborodi e ghua dike kave kaini ghu ia zaghimaha.

¹⁹ Ira leghu tagukava nga nia ira leghu memeha nga—ira vahina ta rizu nga ka ia kava—dike ghahe kavera ka ira sopai kokolodi nodi pukudi taghodi.

²⁰ Ianimu tuna ghe neke riva ghini nga Noa kaike sopebeana vananina Iahova. Manei neke hio sopa kaike ka ira leghu kokolodi tagukava nga nia memeha nga ta fata ka rivai veala, neke saliga kamotori ghu ka fatena ia sopebeana taghe kaike veala ta ghua ghidira.

²¹ Ia hurangina ia veala neke veha vanani Iahova, neke kahe ghua ghu iahi ka taghonai, “E deo kalasukai ke age nakaininani ara ia kava ka pekana tibiri, vununa ka ira heve leghutau ta riva ghidi ira noni, geta avohi ghu ara ka ia fafata ta foforu nga maneri tadi mukona ira nganganadi. E deo kalasukai ke age va eongorirani ara leghu va vuha dolidi nga, taghe ta riva ghini iahi ara ghatunaina.

²² “Neto au ghu malau iahi peka, e age au tudu ma ia fafata mala numa nia mala haharui, ia kaporo nia dangava, ia komuhu nia rabongi. redu nia ravata deo kalasukaina gedi age nogha ghu.”