Tatanigaina 7 - Ia Foforuna Naiungene

Ia Leghahai Ologho

¹ Ianimu tuna ghe neke kahe ghua nga iahi Iahova ka Noa, “Haghe ka zaghimaha nia agho nia fototatamana kamoto nia ka agho e ghua, vununa ara na finigho agho kakaike lama no lotorona ka ira leghu noni nga ka malau iahi peka.

² Hio taremehau kaike manena nia kaike ghasena ka vitu kokolodi tagukava ta fata ka mala mahai nia mala rivai veala, nia kaike manena nia kaike ghasena ka ira leghu kokolodi tagukava ta deo ge fata ghu ka mala mahai nia mala rivai veala, e ghua.

³ Hiori haro molamo vitu manedi nia vitu ghasedi ka ira leghu kokolodi memeha nga. O riva ghini iahi mala ira leghu kokolodi tagukava nga nia memeha nga, edi ke age nanakai leghu ghu maneri ka ira leghu pelodi nga ka malau iahi peka.

⁴ Vitu ravata tatanigai ghatunaina, ara a age va mehai ia nanare, ia ta age zoghu ma ta lao ghu ka giliodi rodana-ngavulu ravata nia redu mala takusu kai kaverira ka fatena malau iahi peka ira leghu va vuha dolidi nga nake va vuhariro ara.”

⁵ Noa neke riva ghidi ghu ira leghu neke ungene va gigimario nga Iahova ka manei.

⁶ Ka ia fafata mehana ia ologho ka malau iahi peka, Noa neke onomo ghobi komuhuna.

⁷ Manei nia ia ghaseborona taghona, nia ira tuunamane nia ira ghaseborodi e ghua dike haghe laona ka ia zaghimaha mala pelo kainina ia ologho.

⁸ Kaike manena nia kaike ghasena ka ira leghu kokolodi tagukava nga, memeha nga nia ka ira leghu va vuha nga ta tagu ka ia kava ta fata nia taka fata ghu ka mala mahai nia rivai veala,

⁹ dike haghe laora ka ia zaghimaha taremehana Noa, leghuina neke kahe va gigimaio God ka Noa.

¹⁰ Nia leghudi ira vitu ravata geke la meha ghu ia ologho va foudina malau iahi peka, neke ghua.

¹¹ Ka ia va tazoi vituna ravata ka ia va paluna hihile ka ia komuhu va 600 komuhuna Noa, ira leghu futuna nga ia leghahai kolo ka pekana ia kava dike purusu kave ka ravata ianimu, nia ira ghasolodi kolo ka kolangana gedi ke tobehe ghu, dike ghua.

¹² Nia ia nanare geke zoghu hinae ghu ka giliodi rodana-ngavulu ravata nia redu, neke ghua.

¹³ Ka toraina ravata ianimu, Noa nia ia ghaseborona dike haghe ka giliona ia zaghimaha taremehadi ira tuudimane babaolodira Semu, Hamu nia Zafeti, nia ira ghaseborodi, e ghua.

¹⁴ Dike hio taremehadira maneri ka giliona ia zaghimaha mu ira leghu kokolodi tagukava mauke nga nia tagukava popohi nga ta faa nia ta rekahadi, nia ira leghu kokolodi memeha nga, e ghua.

¹⁵ Kaike manena nia kaike ghasena e ghua ka ira leghu va vuha ta dolidi nga dike haghera ka ia zaghimaha taremehana Noa,

¹⁶ taghe neke to ungene va gigimaio God ka Noa. Bakisini tuna ia makatana neke ghua Iahova ka leghuna tato auno Noa gilio.

¹⁷ Rodana-ngavulu ravata neke ologho ma neke lao ghu, neke age rokasa ghu fatana ka ia zaghimaha ta felo ghale vonana ka ia fatena kava.

¹⁸ Ia kolo neke vona ma neke vona ghu neke to felo ghu ia zaghimaha ka fatena ia kolo.

¹⁹ Ia kolo neke toraina age rokasa fuludu, dike to luduru ghu ka giliona ia kolo ira vuhuku ta toraina vona.

²⁰ Ia kolo neke vona ma neke vuhai rokasa fuludi ghu rodana kangafa ka fatedi ira vuhuku.

²¹ Leghu va vuha dolidi nga ka malau iahi peka dike lemera—leghu memeha nga, tagukava nga, nia noni nga, e ghua.

²² Vahina leghutau nga ka ia kava ta hio hihingo dike lemera.

²³ Iahova neke hio kairi ira leghu va vuha dolidi nga dike auro ka ia kava—ira noni, ira tagukava, nia ira memeha. Dike au hinaera mu Noa lama nia heiri dike au taremehanao manei ka ia zaghimaha e ghua ma.

²⁴ Ia kolo neke ologho tamuni malau iahi peka ka giliona kaike ghobi gahafulu ravata.