Tatanigaina 50 - Ia Foforuna Naiungene

Ia Tinina Zekopu Dike Hio La Gilu Ghini Ani Kenani

¹ Zosepu neke rorogho turunguhu hinae lao ka ia hihilina nona mama nakele muko hihingo ghinina, neke angohi ghu.

² Zosepu neke va kahe ghidi ira nona maneriva tadi avohoa ghini ia riva mala sute tini ta leme ta va tanaina ia tinina nona mama, dike nai ghini lao mereseni ghu maneri Zekopu.

³ Neke hio rodana-ngavulu ravata mala va hokotina riva ianimu, vununa ianimu lamu nai fafata ta mala riva ghini tuduna maneri kokolona riva iahi. Ira nonidi Izipi dike nakele muko hihingo ghini ghu Zekopu vitu-ngavulu ravata.

⁴ Ka ia neke to age fuluduo ia fafata mala au nakele muko hihingo, Zosepu neke kahe ghua iahi ka ira nona manefaa ia mane ginitaukela, “Noto veha vanamu la ghau, o hio vanagu lao ko ka ia mane ginitaukela turi iahi:

⁵ ‘Ka ia neke to age namo leme ghenao nogu mama, manei neke va kahe ghinagu ta va bebereanana ara ka taghonai, mala la gilu ghinina ara ka ia lianga beku neke to va tanaio taghona ka ia kavana Kenani. O va malumuau ghu ko ta la gilu ghinina ara nogu mama, ghe gake la leghu meha nga ghatu.’”

⁶ Ianimu tuna ghe neke ungene tughu nga ia mane ginitaukela, “Lao o la gilu ghini ghu nou mama leghuina taghe noke naiungene ghinio agho mala riva ghinina.”

⁷ Zosepu neke lao ghu Kenani mala la gilu ghinina nona mama. Ira leghu nona manefaa nga ia mane ginitaukela, ira noni ta posi papala ta vona ka ia suga manei, nia ira leghu mane ta kenu nga ani Izipi e ghua, dike leghu taremehana laona Zosepu.

⁸ Zosepu neke hio kamoto taremehana lao molamo ira ta au ka ia sugana taghona, ira tahinamane nia ira dike auro ka ia sugana nona mama, e ghua. Ira nodi rekaha teri nia ira nodi sipisipi, gouti nia bulumakau lama dike aura leghu ka ia horina Goseni.

⁹ Ira mane ta ghahe ka ira mala haghe ta korohori ka hose nia ira mane ta haghe hose e ghua, dike lao taremehana harona manei. Neke kaike leghahai pukuna noni ghu dike laora ka ia giugilu.

¹⁰ Ka ia la sabaradi ani Atadi ka gheremena Ketuhu Zodani ka ia galahena mala bota va lufuru hinae subudi witi mala fotarira ira ghanodi ka ira kafudi, maneri dike la nakele muko hihingo va fafaa soduai aianimu ghinina Zekopu. Vitu ravata Zosepu neke riva ghidi aianimu ira ghaghahedi riva nganaleghu mala nakele muko hihingo ghinina nona mama.

¹¹ Ira butubutu nonidi Kenani dike auro aianimu dike kahe ghua iahi ka ia finiri nakele muko hihingodira ira noni ani Atadi, “!Ira noni Izipi di toraina nakele muko hihingodi!” dike ghua. Ianimu la ghe dike va kudo ghini Ebolo Miziraimu nga babaolonana malau ianimu, fafahakanana mu, “Muko hihingo ka Izipi.”

¹² Ka ghaghahena ianimu dike riva ghidira ghu ira tuunamane Zekopu taghe heve neke to kahe ghidi va gigimaro nodi mama.

¹³ Maneri dike hio laoi ia tinina ani Kenani, dike la gilu ghini ghu ani Makapela visi fateona mo ia malau faana Mamare ka giliona ia galahena kava neke to tabario Ebarahamu ka Eforoni ia tanina ka ia butubutu Heti, mala kaike malau mala giugiluna.

¹⁴ Leghuna gilu ghini nona mama, Zosepu neke leghu lao Izipi taremehadira ira tahinamane nia ira keha noni haroharo dike lao taremehanaro manei mala gilu ghinina nona mama.

Zosepu Neke Kahe Ghidi Va Veha Leghuni Ira Tahinamane

¹⁵ Leghuna ia lemena nodi mama, ira tahinamane Zosepu dike maughedi dike kahe ghua ghu iahi, “?Heve da age ghua ghatu neto raghe leghu la Zosepu, to kabai ke lifu leghuri ghu ira leghu muko dake va riva ghiniro ghita manei?”

¹⁶ Va ghahe lao ngengene tuna ka Zosepu kahe ghuadina iahi, dike ghua, “Nou mama neke va kahe ghini ghai iahi ghe neke leme nga manei:

¹⁷ ‘O va kahe ghini Zosepu nogu ngengene irahi: Ara na fangaigho ta kai hazarira agho ira sasakedi nia ira zea ta muko fuludu ka ira tahiumane dike riva ghidiro maneri ka agho.’ Ghai ira noniriva ka ia God ka nou mama na fangaigho ghu ta kai hazarira ira sasake ka ghai.” Ka ia hioi Zosepu nonomoho iahi, manei neke nakele ghena.

¹⁸ Ianimu tuna ghe dike la meha nga ira tahinamane dike maimanihi hinae ghu ka kenuna manei kahe ghuana iahi. “Ghai mu nou mane mala varituhu agho,” dike la ghua ghini.

¹⁹ Ghe Zosepu neke kahe ghua iahi ka maneri, “Oka maughemu ghu. God lama ta kuruina ia mana mala varifate, eka ghua ghu ara.

²⁰ Ghau mu noke toraina kabai va mukoau mamu ara, ghe God neke fihikini ka veha. Manei neke kabai hio va doliri tehi noni ka lemei mahai. Ianimu lamu heve ne dufuna ghu. Tehi noni di doli ghedira.

²¹ E deo ghu heve ta maughinina ghau. Ara ta age hio sute ghauna ghau nia ira nomu rekaha, e ghua.” Neke ghua ghu mamu ianimu. Manei neke va kahe ghidi hohoghona ghu ka ira ngengene varisute toraina va veharira ira hihingodi.

Ia Leme Ka Zosepu

²² Zosepu neke au ma ani Izipi taremehadira ira fototatamana ka nona mama. Manei neke to 110 komuhuna ghe neke leme nga.

²³ Manei neke boka doli dufuri mo ira tuuna Eferemu nia ira rekaha ta nodi kakamane Eferemu, e ghua. Manei neke doli dufuri molamo ira rekaha ka Makia ia tuunamane Manase, neke hio pausuri ghu nia age kutadi tuna taghonai neke ghua.

²⁴ Kaike ravata, Zosepu neke kahe ghua iahi ka ira tahinamane, “Ara mu to namo leme. Ghe God e toraina toka ghini ghau mo ghatu. Nia ghatu manei e age batu ghini ghau kave ka kava iahi e hio lao ghau ghu Kenani ka ia kava neke naiungene ghinio manei mala vanadina Ebarahamu, Aesake nia Zekopu, e ghua.”

²⁵ Ianimu tuna ghe neke fangari nga Zosepu ira noni ta va bebereanana maneri, “Ghau o naiungene ka ara ta age hio taremehamuna ghau tinigu ini ka ia batu ghini ghau lao God ka kava ianimu,” neke ghua ghidi.

²⁶ Zosepu neke leme ghu ani Izipi ka neke 110 komuhunao manei. Maneri dike riva ghini ia tinina mala deona ge boe ghu manei, ghe dike nakai hagheli nga ka kaike kiri.