Tatanigaina 49 - Ia Foforuna Naiungene

Ira Va Nonoghadi Ngengene Ka Zekopu

¹ Ianimu tuna ghe neke kudo varighara ghidi nga Zekopu ira tuunamane neke kahe ghua ghu iahi, “Au varighara lilohoau, a va kahe ghini ghau ghu heve ta sopai age dufuna ka ghau keha nareo:

² “Ghau ira tuugumane ara Zekopu, Nonomoho meha ka ara Isiraeli ia nomu mama.

³ “Rubeni, ia doli va kenuna ka ara, ia fuana gigima ka ara Nia ia va kenuna rekaha ka ia nake gigimano ara. Ta toraina varanga nia mana fuluduri leghu tuugumane nga.

⁴ Agho mu taghe ologho ta marutana va bekotina o ghua, Ghe agho e deo go age tongovona fuludu lao ghu, Vununa agho noke epu tana ia ghaseboro irogha ka ara Deona goke va vonavonai ghu ia vavage ka nou mama.

⁵ “Simoni ghe Livae mu edi tatahina ta varifata puhidi ka ngovala noni. Ira leboto sisilufu mala magara ka maneri palu mu mala ngongovala.

⁶ Ara deo ga age holara ghu ka ira turi poika maneri palu, Deo haro ga holara ghu ka ira haedu maneri palu, Vununa dike atungu noni ka halari Nia dike taraha va zeketeri ira bulumakau mala hilava nodina.

⁷ Tibiri e zoghuri maneri palu vununa ka ia haala ta ngaziri maneri palu, nia edi deori dudumana ka noni, Ara a age va rirahi ia pagusu ka maneri palu ka ia kamotona kava Isiraeli. Mala va au henihenirira ka ia ta au ira keha butubutudi Isiraeli.

⁸ “Zuda, ira tahiumane edi age helahela ghinigho agho. Agho o age paufuri ira kana ka agho. Ira tahiumane edi age maimanihi hinae ka kenuu agho.

⁹ Zuda, agho mu taghe kaike laioni e ghua, Ta atungi ia ghena ghano, ghe take leghu nga ka ia korosana, la epu nadoro hinaena. E deo hei ta kabai gatogatoina.

¹⁰ Zuda e age posini ia mana mala kopu ka manei, Nia ira pagusu ka manei edi age kopu tudu ma. Ira butubutu noni edi age va vonavonai manei, maimanihina ka ia leghu puhi ka kenuna manei.

¹¹ Manei e piliga laoi ka kaike hekena gerepi ia nona rekahana dongiki, Ka ia hekena gerepi ta toraina veha, vununa dito puina tehi kakai. Manei e tapala nona poko ka waeni, e tapala nona poko sodu ka kolona gerepi ta busaka, vununa waeni to tehi kakai.

¹² Ira hibana edi age busaka ka ketuhu waeni, Ira hingana edi age ghighiho ka ketuhu miloki.

¹³ “Zebulani e age au ka gheremena ia tahi, ta kaike malau mala sighoto ka ira vaka; Ia kava ka manei e age nadoro dufu lao Saedoni.

¹⁴ “Isaka mu taghe kaike dongiki ta gigima ta epu hinae ka varihoataidi palu baiki mala va hahaghe.

¹⁵ Ghe manei ne finini ta vehana ia malau mala maghoso nia ta vehana ia kava, nia e va manemane hure leghutau ta tahuna nia ta mala meha kaike mane mala varituhuna.

¹⁶ “Dani mu e age kaike mane kopu maladi ira noni ka manei, taghe ta ghua la ira keha butubutudi Isiraeli.

¹⁷ Dani mu taghe kaike adogho ka ia gheremena hangana, taghe kaike adogho ta lelemeana ka ia gheremena hangana, Ta ghaniri ira susubina hose, mala va fera ghini kavena leghu mo ia ta haghei.

¹⁸ “Iahova, ara na afa ghinigho ta hio va doliauna agho.

¹⁹ “Gadi mu edi age magari kaike pukuna noni ta sisiko, Ghe manei e age fihiki e bozo leghuri ghu.

²⁰ “Ia kava ka Asa mu e age fuai ghano ta toraina veha, va ghonorira ira ghano ta fatadi ira mane ginitaukela.

²¹ “Nafutalae mu taghe kaike dia ta leleghu hihingona purudu rukufu lao mehana, ta kuru tuuna ta veveha ghedi.

²² “Zosepu, agho mu taghe kaike heke gerepi ta pigha, ta doli ka gheremena kaike ketuhu futu, ta pauku kalahu ira hobona ka kaike hidi riringi.

²³ Ira kana dike rapata va mukoigho, dike bozoigho ghu feraighona ka ira nodi tupi bokala.

²⁴ Ghe ia bokala ka agho neke nadu ma neke au ghu, Nia ira kameu dike hio gigima Ka ia gigima ia God ka Zekopu ta Torai Mana, Ka ia ta kopui sipisipi nia ia ta kagara ghini Isiraeli.

²⁵ Ia God ta va totoana ghini ara e age toka ghinigho, Ia God Torai Mana e age va vehaigho, ka ia veha ta meha ka ia nanare ka kolangana fate nia ka ira veha ta meha ka ira ketuhu futu ta au pekani ka giliona ia kava, Manei e age va vehaigho ka ia va tehiri ira pagusu ka agho.

²⁶ Tugu maneo, va veha ta vananigho idi ara edi veha fuluduri ira veha ka ira vuhuku sepa, ba voruhu toghunaidi. Zosepu, ara na verevere fangari va veha irahi ta agena ka agho, vununa agho mu ia ta babatu ka ira tahiumane.

²⁷ “Benizemeni, agho mu taghe kaike wulufu ta nona varighani. Ka ia fufugho agho o rapatari o atunguri ghu ira kana ka agho, Ka ia saighona agho o tufari ira leghutau ka maneri.”

²⁸ Irahi lamu ira tazoi palu bubutudi Isiraeli nia iahi lamu heve neke kaheina nodi mama ka ia sopai vanadi ira ngengene va nonoghadi ta fata ka ira sopai tuunamane.

Ia Leme Nia Giugilu Ka Zekopu

²⁹ Ianimu tuna ghe neke kahe ghua nga iahi Zekopu ka ira tuunamane, “E deo sepana age leme ghu ara mala holara taremehadira ira faagu. O gilu ghinagu taremehana nogu mama nia nogu kakamane ka ia lianga ta au ka giliona ia galahena kava Eforoni ia tanina ka ia butubutu Heti,

³⁰ ani Makapela visi fateona mo Mamare ka ia kava Kenani. Ebarahamu neke tabari ka Eforoni lianga iahi nia kava iahi e ghua, mala kaike kava mala gilui nonina.

³¹ Aianimu lamu dike gilu ghidira maneri Ebarahamu nia Sera ia ghaseborona. Aianimu lamu dike gilu ghidira maneri nogu mama Aesake nia Rebeka ia ghaseborona. Nia aianimu lamu nake gilu ghinina ara Lea ia ghaseborogu.

³² Ia galahena kava nia ia lianga ka giliona manei mu neke tabarari ka ia butubutu Heti. O gilu ghinagu aianimu.”

³³ Ka ia neke to noghao manei vanadira ira turi ta mala riva ghidi ira tuunamane, manei neke epu hinae ghe neke leme ghena nga.