Tatanigaina 48 - Ia Foforuna Naiungene

Manase Ghe Eferemu

¹ Keha fafatara leghuna iahi, kehara dike kahe ghua iahi ka Zosepu, “Nou mama ne toraina faa vanani fogara,” dike la ghua ghini. Ne nomohi ghu manei ianimu, manei neke hiori Manase ghe Eferemu ira palu tuunamane mala la fininina nona mama.

² Ka ia va kahe ghini Zekopu kehara neke to sabarana Zosepu mala fininina manei, Zekopu neke toraina va kato neke nohe vona ghu ka ia vavagena.

³ Zekopu neke kahe ghua iahi ka Zosepu, “God Torai Mana neke podolo ka ara ani Luzi ka ia kavana Kenani neke vanagu veha ghu.

⁴ Manei neke kahe ghua iahi ka ara, ‘Ara a age vananigho tehi rekaha ghatu mala ira pagusu ka agho edi meha tehi butubutu noni ghu. Ara a age vanadi ira pagusu ka agho kava iahi Kenani mala age nodi toghunaina maneri.’”

⁵ Ianimu tuna ghe neke kahe ghua nga iahi Zekopu ka Zosepu, “Ira palu tuumane agho Eferemu ghe Manase dike doliro ani Izipi ghe nake mehao nga ara aiahi mu, nogu rekaha ara. Maneri palu mu edi age nogu rekaha pausu ara, edi kururi ghu mana taghe Rubeni ghe Simoni la ira palu tuugu mane ara.

⁶ Noto age kuruigho la agho keha tuu manerani keha nareo, maneri mu edi age nou agho. Ghe kava kaikadolona ka maneri mu e la meha ka ia kobosona kava kaikadolo Eferemu ghe Manase.

⁷ Na riva ghini nga ara iahi mu, vununa nake muko hihingogu fuludu ghini nou uke Reseli neke leme mehao Kenani ka ia leghu sipagu ara ani Padani Aramu, nake gilu ghinio ghu ara ka ia gheremena hangana ta lao ani Efarati.” (Efarati mu Betilehemu ghatunaina.)

⁸ Ne finiri ghu Zekopu ira tuunamane Zosepu, manei neke notoho, “?Heiri mu rekaha mane irahi? neke ghua.

⁹ “Irahi mu tuugu mane ara toke vanaguna God aiahi Izipi,” neke ghua Zosepu ka nona mama. Kahe ghua tuna iahi neke ghua Zekopu, “Hio namo mehari ka ara a boka vanadi ghu ara ia va veha.”

¹⁰ Zekopu mu neke to deo ge boka fifini va veha ghu, vununa manei neke puina mamanekusu. Zosepu neke hio namo laori ghu ira tuunamane ka nona mama neke angohori nia abari neke ghua ghu manei.

¹¹ Zekopu neke kahe ghua iahi ka Zosepu, “Ara nake toraina deo ga nganai ghu ta boka ke finigho leghuna, ghe God neto va malumuau ghe ta finiri harora tuu mane idi agho.”

¹² Ianimu tuna ghe neke rizu ghaheri nga Zosepu ira palu rekaha mane ka kununari Zekopu, neke maimanihi dufu hinae ghu ka kavana ka kenuna manei.

¹³ Zosepu neke nakaini Eferemu ka mairinao mo Zekopu nia Manase ka mautunao mo, neke ghua.

¹⁴ Ghe Zekopu neke vari kalahu ghidi ira kamena neke va fara laoi ghu ia kame mautuna ka paunao Eferemu geta rekaha ghu manei, nia ia mairina ge va fara laoi ghu ka paunao Manase neke ghua, geta kusu doli ghu manei.

¹⁵ Ianimu tuna ghe neke va vehai nga manei Zosepu kahe ghuana iahi, “!Ia God dike riva vananio nogu kakamane Ebarahamu nia nogu mama Aesake! ia God neto ke batu ghinagu to mehano ghu taghe kaike ta batu ghidi nia kopu ghidi ira nona sipisipi ia ta ghua ka ia kamotona doli ara dufu ghu ka ravata iahi,

¹⁶ ia engizeli neto ke va mehaio manei neke hio va doliauno ghu ka leghu lelemeana nga, agho o va vehari palu rekaha mane irahi. Na verevere fangai mala ira noni edi va kudo ghidi pagusuna ghu Isiraeli nia mala ira noni edi age va kudo ghidi pagusudi ghu molamo Ebarahamu ghe Aesake, ira faagu ara. Nia na verevere fangai God edi hugara va tehi ghu ira pagusu ka maneri hae ghe hae ghu ka kava iahi peka.”

¹⁷ Ka ia finini Zosepu neke va fara laoina nona mama ia kame mautuna ka ia pauna Eferemu, manei deo geke veha vanani ghu. Manei neke posi laoi ghu ia kame mautuna nona mama kabai nakai laoina ka ia pauna Manase mo.

¹⁸ Zosepu neke kahe ghu iahi ka nona mama, “Deo mama, Manase mo neke kusu dolina. Va fara laoi kame mautuu nia ka pauna ini mo manei.”

¹⁹ Ghe nona mama neke pake ghena neke kahe ghua ghu iahi, “Ara na avohi mo tuugu maneo, ara na avohi mo heve na riva ghinina. Ira pagusu ka Manase edi age kaike butubutu noni mo lamo ghatu edi age noni tongovodi ghu. Ghe ia tahinamane ta rekahana manei e age varanga fuludi manei, nia ira pagusu ka manei gedi age tehi butubutu noni ghu e ghua.”

²⁰ Manei neke va beanari ghu maneri palu haroharo ravata ianimu kahe ghuana iahi, “Ira nonidi Isiraeli edi age kaheri babaolomu nira ghau palu ka ia va beana noni maneri. Maneri edi age kahe ghua iahi, ‘Ghai na verevere fangai God e age toka ghini ghau ghu taghe neke toka ghidio la Eferemu ghe Manase,’” edi age ghua. Ka ghaghahena ianimu, Zekopu neke nakai kenui Eferemu ka Manase.

²¹ Ianimu tuna ghe neke kahe ghua nga iahi Zekopu ka Zosepu, “Ara mu to namo leme, ghe God e age au taremehau agho e age hio leghu laoigho ghu ani Kenani, ka ia kava ira faamu.

²² Nia ka agho, eka ghua ghu ka ira tahiumane, ta age vananighona ara Sekemu, ia kava ta toraina veha nake hio tadio ara ira nonidi Amoa ka magara ka ia nogu leboto sisilufu mala magara nia bokala, e ghua.”