Tatanigaina 47 - Ia Foforuna Naiungene

¹ Zosepu neke hiori ghu gahau ka ira tahinamane, dike lao ghu ka ia mane ginitaukela neke la turi ghua ghu iahi, “Nogu mama nia ira tahigumane e ghua dito la meha sabara sipadi Kenani taremehadi ira nodi sipisipi, gouti, bulumakau, nia ira vahina leghutau ta taghori nga maneri e ghua. Maneri mu to au ghu ghatunaina ka ia hori Goseni.”

² Ianimu tuna ghe neke turi va fafahaka vanani lao nga manei ia ginitaukela ghidira ira tahinamane, neke ghua.

³ Ia mane ginitaukela neke notohori ira tatahinamane, “?Heve mu rivana ka ghau?” “Faghina agho, ghai mu a mane kopui sipisipi, taghe dike ghuaro la ira faamai,” dike ghua ungene tughuna.

⁴ “Ghai mu nato la meha mala au ka kava iahi, vununa ia songe ne toraina muko ka ia kava Kenani to deo ghedi sesehu ghu nomai tagukava popohi idi. O va malumu ghai ghu ko ta auna ghai ka ia horina Goseni.”

⁵ Ia mane ginitaukela neke kahe ghua iahi ka Zosepu, “Nou mama nia ira tahiumane e ghua dito la meha ka agho.

⁶ Faete vanadi kaike malau ka ia kamotona kavana Izipi mala auna ka maneri. O vanadi ia kava ta toraina veha ka ia kavana Izipi. Va malumuri ta au va gimana maneri ka ia horina Goseni. Nia noto avohori la agho kehara ka maneri ta kururi kaikadolo mala rivana, o nakairi maneri ta mala kopu ghidira ira nogu bulumakau taghogu.”

⁷ Hio haghele laoi tuna Zekopu ia nona mama taghona neke ghua Zosepu, la va fafahakina manei ka ia mane ginitaukela ghinina manei. Zekopu neke vanani ghu ia va veha ia mane ginitaukela.

⁸ “Niha komuhuu mu agho?” neke ghua notohona ia mane ginitaukela.

⁹ Zekopu neke ungene tughui ghu, “Ara nato ke ghahei malau iahi peka giliona 130 komuhu. Komuhu iranimu ghu mu, deo gedi ke tehi ghu nia dike toraina mamarutana e ghua, deona gedi ke varifata ghu ka ira tehi komuhu dike ghahe lao meharo ira faagu ara,” neke ghua ghini.

¹⁰ Ke vanani leghuni tuna ia va veha ia mane ginitaukela neke ghua Zekopu ghe neke ghahe kaini nga.

¹¹ La va au hinaeri tuna nona mama nia ira tahinamane ani Izipi neke ghua Zosepu, vanadi kavana ka ia kobosona ta toraina veha ka ia kava gheremena ia malau leghaha Ramesesi leghuina taghe neke kahe va gigimaio ia mane ginitaukela.

¹² Zosepu neke va ghono vanadi ghano molamo nona mama nia ira tahinamane nia ira leghu taremehana nga nona mama taremehadira ira rekaha teri, leleghuna ka ira niha rekaha ta sopai kururi maneri.

Ia Songe Giliona Izipi

¹³ Ia songe neke toraina muko fuludu hae ghe hae ghu giliona Izipi nia Kenani e ghua, dike toraina lemei mahai ghu ira noni.

¹⁴ Zosepu neke tatabara ghidi ghu ira witi ka ira nonidi Izipi nia Kenani, neke hio laori ghu ira rongodi ka ia tolima ia ginitaukela.

¹⁵ Ka dike to kai va noghariro ira leghu rongo nga ira nonidi Izipi nia Kenani, ira nonidi Izipi dike la meha ka Zosepu dike kahe ghua ghu iahi, “!O vanamai ghano, ghatu a leme ghai! Ira rongo ka ghai to nogha purukutu,” dike ghua.

¹⁶ “Noto deo ghau rongo la, o vanagu tagukava popohi nira ka ghau taghe holaradira ghano ta vanamuna ara,” neke ghua ungene tughuna Zosepu.

¹⁷ Maneri dike hio mehari ghu ka Zosepu ira tagukava popohi ka maneri, neke vanadi ghano ghu manei, mala holaradira ira nodi hose, sipisipi, gouti, bulumakau nia dongiki e ghua. Ka komuhu ianimu manei lamu neke va ghono vanadi ghanona mala holaradira ira leghu nodi tagukava popohi nga.

¹⁸ Ka ia keha komuhu leghuna komuhu ianimu maneri dike meha ka Zosepu dike kahe ghua ghu iahi, “Faghina agho, ghai deo ga boka poikai ghu ia hohoghona ghinina tato nogha purukutu idi ira rongo ka ghai nia tato nouna agho ira tagukava popohi ka ghai, e ghua. To deo ta au hinaena ta mala vananighona ghai, nga tinimai idi nia ira kava ka ghai lama e ghua di aura.

¹⁹ !Riva ghidi keha leghutaura, mala aka leme la ghu ghai! Tabara ghai taghomai nia nomai kava idi e ghua mala hoholarana ka ghano. Ghai a meha nona noni mala varituhu ia mane ginitaukela nia e age kutadi ghu manei ira kava ka ghai, e ghua. O vanamai witi mala posi va doli ghai ta auna ghu nia vanamai subudi witi e ghua a mala boka numa ghidi ghu ka ira nomai galahedi kava nunuma.”

²⁰ Zosepu neke tabara vanani ghu ia mane ginitaukela ira leghu kava nga ani Izipi. Leghu noni Izipi nga dike tutuufu ta mala tatabara ghidira ira nodi galahedi kava nunuma vununa ia songe neke toraina muko fuludu. Ia kamotona kava neke meha nona ghu ia mane ginitaukela.

²¹ Leleghonana mu ira leghu noni nga sipa ka ia keha pelona fofotaina Izipi dufu ghu ka ia keha va kukuruna, neke hiori Zosepu mala meha nona noni mala varituhuna ia mane ginitaukela.

²² Ghe manei deo geke tabarari ghu ira kava ka ira hiama, vununa maneri dike hio ghano tudu ma ka ia mane ginitaukela. Ira ghano neke vanadio ia mane ginitaukela mu neke fatadi mo ghu maneri. Neke ghua ianimu ghe, dike deo nga maneri tatabara ghidi laora ka manei ira kava ka maneri.

²³ Zosepu neke kahe ghua iahi ka ira noni, “!Nonomoho meha ka ara! Ghatunaina ara nato tabara hio ghau taghomughi nia ira nomu kava e ghua vananina ia mane ginitaukela. Irahi ghu mu subudi witira ka ghau, o mala boka numa ghidi ghu ka ira nomu galahedi kava sare.

²⁴ Ghe ka ia fafata haharui ghau, kaike taho ka leleghu gaha taho ka witi mu, o toraina vanani lao ia mane ginitaukela. Ira keha rodana taho ka leleghu gaha taho mu, subudi mala numa ka ira galahedi kava nunuma nia mala ghano ka taghomu nia ira nomu rekaha nia ka heiri ta au ka giliodi ira sugamu, e ghua.”

²⁵ “Agho noto hio va doli ghaina,” dike ghua ungene tughuna. “Ghai na va manemane ta meha mala nona noni mala varituhuna ia mane ginitaukela.”

²⁶ Zosepu neke nakaini ghu kaike vetula ghidira ira leghu kava nga ani Izipi ia ta riva nga ka ravata iahi. Vetulana mu, ira noni edi toraina vanani ia mane ginitaukela kaike taho ka leleghu va gahana taho ka ira haharui maneri. Ira kava ta nodi ira hiama lama dike deona gedi ke meha nona ghu ia mane ginitaukela.

²⁷ Zekopu nia ira noni ka manei dike au ani Izipi ka ia horina Goseni ka dike meha taghotagho nia hugararo maneri.

²⁸ Zekopu neke au Izipi tazoi vitu komuhu nia ira komuhuna ia doli kamoto ka manei geke 147 ghu, neke ghua.

²⁹ Ka ia zukuru namona ia fafata mala leme ka Zekopu, manei neke kudoi Zosepu ia tuunamane neke va kahe ghini ghu, “O nai mehai kameu nia ka pekadi kakabologu idi o naiungene ghu ta deona go age gilu ghinagu ghu aiahi Izipi.

³⁰ Nga ka ia lemegu ara mu, o hio kaveau Izipi o gilu ghinagu ghu ani Kenani ka dike gilu ghidiro ira faagu.” “Ara a riva ghini mo ghatu heve ta fangai nia agho,” neke ghua ungene tughuna Zosepu.

³¹ “O va bebereana vanagu, ta age riva ghinina agho ianimu,” neke ghua Zekopu. Va bebereana vanani tuna neke ghua Zosepu. Ianimu tuna ghe neke maimanihi hinae nga Zekopu ka heluna vavagenao va totoana ghinina God.