Tatanigaina 46 - Ia Foforuna Naiungene

Zekopu Nia Ia Fototatamana Ka Manei Di Lao Izipi

¹ Zekopu neke va tanari ghu ira vahina leghutau neke kuruino nga, neke ghahe vai lao ghu Izipi mo. Ka ia la dufuna Biaseba, manei neke togoroi veala lao ka ia God Aesake ia nona mama manei.

² Ka ia reduna, God neke ngengene lao ka Zekopu ka kaike hahaima. “!Zekopu! !Zekopu!” neke ghua kudoina. “!Heve, ara aiahi!” neke ghua ungene tughuna Zekopu.

³ “Ara mu God ia God ka nou mama,” neke ghua ia leo. “Oka maugheu ghu laona Izipi, vununa ara a age va tehiri ira pagusu ka agho edi age kaike leghahai butubutu noni ghu aianimu.

⁴ Ara a ghahe taremehau lao agho ani Izipi ghatu, nia ara ake toraina hio leghu mehari ghatu ira pagusu ka agho ka kava iahi, e ghua. Zosepu e age au taremehau agho mala bakisirira hibaunira ka ia lemeu agho.”

⁵ Ianimu tuna ghe neke ghahe kaini nga Biaseba Zekopu. Ira tuunamane dike va haghe laoi manei, ira nodi rekaha teri nia ira ghaseborodi e ghua ka ira mala haghe ta korohori ka dongiki neke to va ghahe vanadi laono ia mane ginitaukelana Izipi.

⁶ Zekopu nia ira pagusu ka manei e ghua, dike lao ghu Izipi hio taremehadi laona ira nodi tagukava popohi nia ira vahina leghutau nga dike kururiro maneri ka ia audi Kenani, e ghua.

⁷ Zekopu neke hio taremehana lao Izipi ira tuunamane nia ira tuudimane ira tuuna, nia ira tuunaghase nia ira tuudighase ira tuuna, e ghua—ia kamotona pagusu ka manei.

⁸ Irahi mu babaolodira ira pagusu ka Zekopu dike laoro Izipi: Rubeni mu ia tuunamane ta kenu Zekopu.

⁹ Ira tuunamane Rubeni mu: Hanoke, Palu, Hezironi nia Kami.

¹⁰ Ira tuunamane Simoni mu: Zemueli, Zamini, Ohadi, Zakini, Zoha nia Saulu ia tuunamane kaike fotatina Kenani.

¹¹ Ira tuunamane Livae mu: Gesoni, Kohati nia Merari.

¹² Ira tuunamane Zuda mu: Era, Onani, Sela, Perezi nia Zera. (ghe Era ghe Onani mu dike to leme ani Kenani). Ira tuunamane Perezi mu: Hezironi ghe Hamulu.

¹³ Ira tuunamane Isaka mu: Tola, Pua, Zasubu nia Simironi.

¹⁴ Ira tuunamane Zebulani mu: Seredi, Eloni nia Zalili.

¹⁵ Maneri lamu dike tuunamanera Zekopu neke va uraharira Lea ani Padani Aramu taremehana laona Daina ia keha tuunaghase. Varigharadira ira pagusu ka manei dike doliro ka Lea mu litofulu lito ghu.

¹⁶ Ira tuunamane Gadi mu: Zifioni, Hagi, Suni Eziboni, Eri, Arodi nia Areli.

¹⁷ Ira tuunamane Asa mu: Imina, Isiva, Isivi nia Beraea. Neke keradi fotatina mu Sera. Ira tuunamane Beraea mu: Heba nia Malakieli.

¹⁸ Maneri tazoi onomou lamu dike pagusunara Zekopu ka Zilipa ia fotati mala varituhu. Zilipa mu, Labani neke vanani laona Lea ia tuunaghase taghonai.

¹⁹ Ira tuunamane Reseli ia ghaseborona Zekopu mu: Zosepu nia Benizemeni.

²⁰ Ani Izipi mu Zosepu neke au palu tuunamane, Manase ghe Eferemu ka Asenati ia tuunaghase Potifera, kaike hiamana Oni.

²¹ Ira tuunamane Benizemeni mu: Bela, Beka, Asibele, Gera, Namani, Ehi, Rosi, Mupimi, Hupimi nia Adi.

²² Tazoi rodana irahi lamu dike pagusunara Zekopu ka Reseli.

²³ Ia tuunamane Dani mu: Husimi.

²⁴ Ira tuunamane Nafutalae mu: Zazieli, Guni, Zeza nia Silemu.

²⁵ Irahi lamu rekaha dike dolira ka Zekopu ghe Biliha taremehadi ira rekaha tahidi teri. Biliha mu kaike fotati mala varituhu. Labani neke vanani lao Reseli ia tuunaghase taghonai—vitu varigharadira.

²⁶ Varighardira ira toraina pagusu ka Zekopu dike laoro Izipi mu neke onomo-ngavuluai onomo ghu deona ge tahori ghu ira ghaseborodi ira tuunamane.

²⁷ Palu tuunamane Zosepu mu dike dolira ani Izipi neke va vitu-ngavuli ghu ia varigharana fototatamana ka manei dike laoro aianihi Izipi.

Ia Fototatamana Ka Zekopu Di Sabara Goseni

²⁸ Zekopu neke kusu va ghahe kenu laoi Zuda mala la kahe ghinina Zosepu ta meha dufurina ghu ani Goseni. Ka ia la sabaradi ani Goseni,

²⁹ Zosepu neke haghe lao ka ira nona mala haghe ta korohori ka hose mala la dufuina nona mama. Ka ia la varidudufudi, Zosepu neke la abai nona mama la nakele soduai na.

³⁰ Zekopu neke kahe ghua iahi ka Zosepu, “Ghatunaina ghe ga va tana leme ghegu nga, vununa ara nato finigho taghogughi ta dolina nga agho.”

³¹ Ianimu tuna ghe neke kahe ghua nga iahi Zosepu ka ira tahinamane nia ka ia kamotona fototatamana nona mama, “Ara a toraina lao ghatu ka ia mane ginitaukela a la va kahe ghini ghu iahi, ‘Ira tahigumane nia ia kamotona fototatamana ka nogu mama dike auro ka ia kavana Kenani dito la meha ka ara.

³² Ara a la va kahe ghini ghatu manei ta mane kopui sipisipina nia kopui bulumakauna ghau, nia va kahe ghini haro tato hio meharira ghau ira nomu tagukava popohi nia ira vahina leghutau nga ta taghori ghau, e ghua.

³³ Ka ia kudo ghau ia mane ginitaukela ta notoho ghau ghu heve mu rivana ka ghau, ta ghuana,

³⁴ o toraina va kahe ghini noke kopui tagukava popohina ghau ka ia kamotona dolimu taghe dike ghuaro ira faamu ta ghuana. Ka ghaghahena iahi ta age va malumu ghauna manei auna ka ia horina Goseni.’ Neke kahei nga iahi Zosepu mu vununa ira noni Izipi edi hakohako ghidi ghedi ira noni ta kopui sipisipi.”